عَننَبِ سَكَرِ.
2.
ﭑ نَشَ يِ لَامَتُنيِ تٌ؛ ﭑ بَرَ قٍرِ نَانِ تٌ. 
ﭑ بَرَ مَلٍكّ مَشْرِن، نَشَن نُ وْيّنمَ ﭑ نَ، «مُنسٍ نَ يٍيٍ رَ؟» عَ نَشَ ﭑ يَابِ، «سّنبّمَيٍ نَن يٍيٍ رَ نَشٍيٍ يُدَيَ، عِسِرَيِلَ، نُن دَرِ سَلَمُ رَيٍنسٍنشِ.» 
نَ تّمُي، عَلَتَلَ نَشَ شَبُي نَانِ مَسٍن ﭑ بّ. 
ﭑ نَشَ مَشْرِنيِ تِ، «يٍيٍ قَشِ مُنسٍ رَبَدٍ بٍ؟» عَ نَشَ ﭑ يَابِ، «يِ قٍرِ نَانِ مِسَالِشِ سّنبّمَيٍ نَن نَ نَشٍيٍ يُدَيَ رَيٍنسٍنشِ مِشِ يٌ مُ نْ عَ شُنيِ رَكٍلِدٍ. كْنْ يِ شَبُييٍ قَشِ عٍ مَفَاشُدٍ نّ، عٍ سِ فبّتّ سّنبّمَيٍ رَبِرَ، نَشٍيٍ كٍلِشِ يُدَيَ بْشِ شِلِ مَ عَلَكٌ عٍ شَ يُدَيَكَيٍ رَيٍنسٍن.» 
ﭑ نَشَ يِ لَامَتُنيِ تٌ؛ شّمّ ندٍ نُ نَ، مَنِيَ لُوتِ نُ سُشُشِ عَ يِ رَ. 
ﭑ نَشَ عَ مَشْرِن، «عِ سِفَ مِندٍن؟» عَ نَشَ ﭑ يَابِ، «ﭑ دَرِ سَلَمُ نَن مَنِيَقٍ، عَلَكٌ ﭑ شَ عَ فبٌي نُن عَ كُيّيَ كٌلٌن.» 
مَلٍكّ نَشَن نُ وْيّنمَ ﭑ نَ، عَ نَشَ سِفَ يَرٍ، مَلٍكّ فبّتّ نَشَ قَ عَ رَلَندٍ. 
عَ نَشَ عَ قَلَ عَ بّ، «عِ فِ، سَ عَ قَلَ يِ سّفّتَلَ بّ، عَ دَرِ سَلَمُكَيٍ نُن شُرُ سٍيٍ قَمَ نّ وُيَدٍ هَن تّتّ مُ نْ عٍ رَبِلِندٍ سْنْن.» 
عَلَتَلَ شَ مَسٍنيِ نَن يَ؛ «ﭑ تَن يَتِ عٍ مَكَنتَمَ نّ. ﭑ لُمَ نّ عٍ بّ عَلْ تّتّ تّ دَاشِ، ﭑ مَ نْرّ قَ لُ عٍ تَفِ.» 
عَلَتَلَ شَ مَسٍنيِ نَن يَ؛ «وٌ وٌ فِ، وٌ وٌ فِ! وٌ شَ كٍلِ حَمَنّ مَ نَشَن نَ كْولَ مَ.» عَلَتَلَ شَ مَسٍنيِ نَن يَ؛ «سِنفٍ ﭑ نُ بَرَ وٌ رَيٍنسٍن يّ دُنِحَ مَ. 
سِيٌن مِشِيٍ، وٌ وٌ فِ. وٌ تَن نَشٍيٍ نَ بَبِلْن، وٌ شَ كٍلِ نَا.» 
مَنفّ عَلَتَلَ نَشَ عَ مَسٍن ﭑ بّ، عَ نَشَن شّيشِ بِنيّ كُي، قٍ قَلَقٍ يِ سِيٍ شَ قٍ رَ نَشٍيٍ وٌ تْورْشِ؛ «نَشَن عَ بّلّشّ دِنمَ وٌ رَ، عَ لُشِ نّ عَلْ نَ كَنيِ بَرَ عَ بّلّشّ دِن عَلَ رَ.» 
ﭑ نَ كٍلِ عٍ شِلِ مَ، عٍ قِندِ عٍ شَ كٌنيِيٍ شَ كٌنيِيٍ رَ. نَ كُي وٌ عَ كٌلٌنمَ نّ عَ مَنفّ عَلَتَلَ نَن ﭑ شّيشِ. 
«دَرِ سَلَمُكَيٍ، وٌ وٌ شُي عِتٍ سّيوّ كُي، بَرِ مَ ﭑ قَمَ نّ لُدٍ وٌ تَفِ.» عَلَتَلَ شَ مَسٍنيِ نَن نَ كِ. 
سِ وُيَشِ قَمَ نّ عَلَتَلَ مَ نَ لْشْي، عٍ قَ قِندِ ﭑ مَ حَمَ رَ. ﭑ لُمَ نّ وٌ تَفِ، وٌ قَ عَ كٌلٌن عَ مَنفّ عَلَتَلَ نَن ﭑ شّيشِ وٌ مَ. 
يُدَيَ مَن قِندِ مَ عَلَتَلَ فبٍ نَن نَ عَ شَ بْشِ سّنِيّنشِ كُي. عَ مَن قَمَ نّ دَرِ سَلَمُ سُفَندِدٍ. 
عَدَ مَدِ بِرِن شَ عَ سَبَرِ عَلَتَلَ بّ، عَ نَ كٍلِقٍ عَ شَ يِرٍ سّنِيّنشِ.