مَتِيُ.
2.
عِسَ بَرِ بّتّلّيمُ تَا نَن كُي، يُدَيَ بْشِ مَ، مَنفّ هٍرٌدٍ شَ حَمَنّ. نَ وَشَتِ، كَرَ مْشْ ندٍيٍ نَشَ قَ دَرِ سَلَمُ كٍلِ سٌفٍتٍدٍ بِرِ رَ، 
عٍ نَشَ مَشْرِنيِ تِ، عٍ نَشّ، «يُوِقِيٍ شَ مَنفّ نَشَن بَشِ بَرِدٍ، عَ نَ مِندٍن؟ مُشُ قَشِ نّ مُشُ شَ قَ سُيِدِ عَ بّ، بَرِ مَ مُشُ بَرَ عَ شَ تُنبُي تٌ سٌفٍتٍدٍ بِرِ.» 
مَنفّ هٍرٌدٍ تٌ نَ قٍ مّ، عَ تَن نُن دَرِ سَلَمُكَ بِرِن نَشَ كْنتْقِلِ. 
عَ نَشَ سّرّشّدُبّ كُنتِفِيٍ نُن سّرِيّ كَرَ مْشْيٍ مَلَن، عَ شَ عٍ مَشْرِن عَلَ شَ مِشِ سُفَندِشِ بَرِ مَ دّننَشّ. 
عٍ نَشَ عَ يَابِ، «عَ بَرِ مَ بّتّلّيمُ تَا نَن كُي، يُدَيَ بْشِ مَ، بَرِ مَ نَمِحْنمّ عَ سّبّشِ، 
‹عِ تَن بّتّلّيمُ، نَشَن نَ يُدَيَ بْشِ مَ، عِ تِدٍ مُ شُرُن يُدَيَ تَا شُنفبٍيٍ يَ مَ، بَرِ مَ مَنفّ قَمَ كٍلِدٍ عِ تَن بّتّلّيمُ نّ، نَشَن ﭑ مَ عِسِرَيِلَ حَمَ رَحّرّ مَ، عَلْ شُرُ سٍ دّ مَدٌنيِ شُرُ سٍيٍ رَحّرّ مَ كِ نَشّ.›» 
نَ كُي، هٍرٌدٍ نَشَ نَ كَرَ مْشْيٍ شِلِ فُندٌ رَ، عَ عٍ مَشْرِن تُنبُي مِنِشِ وَشَتِ نَشَن مَ. 
نَ دَنفِ شَنبِ، عَ نَشَ عٍ شّي بّتّلّيمُ يِ شّيرَيَ رَ، «وٌ سِفَ، وٌ شَ سَ وَكِلِ يِ دِيْرّ قٍنقٍ رَ. وٌ نَ عَ تٌ، وٌ شَ قَ ﭑ نَكٌلٌن عَلَكٌ ﭑ قَن شَ سَ سُيِدِ عَ بّ.» 
كَرَ مْشْيٍ تٌ فّ مَنفّ شُي رَ مّدٍ، عٍ نَشَ سِفَ. عٍ مَن نَشَ تُنبُي تٌ، عٍ سَ نَشَن تٌ سٌفٍتٍدٍ بِرِ رَ. تُنبُي نَشَ حّرّ عٍ يَ رَ هَن عَ نَشَ تِ دِيْرّ يِرٍ شُن مَ. 
عٍ تٌ تُنبُي تٌ، عٍ نَشَ سّيوَ كِ قَنيِ رَ. 
عٍ نَشَ سٌ بَنشِ كُي، عٍ نَشَ دِيْرّ تٌ عَ نفَ مَرِيَمَ يِ رَ. عٍ نَشَ عٍ مَفٌرٌ بْشِ، عٍ سُيِدِ دِيْرّ بّ. نَ تّمُي، عٍ نَشَ سَنبَسٍيٍ رَ مِنِ عٍ شَ كٌتٍ كُي، عٍ شّيمَ، سُرَيِ قَنيِ، نُن مِرِ لَبُندّ قِ دِيْرّ مَ. 
نَ دَنفِ شَنبِ، عَلَ تٌ نُ بَرَ عٍ رَكٌلٌن شِيٍ كُي عَ عَ مُ لَنمَ عٍ شَ فبِلٍن هٍرٌدٍ يِرٍ، عٍ نَشَ فبِلٍن عٍ شَ بْشِ مَ كِرَ فبّتّ رَ. 
كَرَ مْشْيٍ سِفَ شَنبِ، مَرِفِ شَ مَلٍكّ نَشَ مِنِ يُسُقُ مَ شِيٍ كُي، عَ عَ مَسٍن عَ بّ، «كٍلِ. دِيْرّ نُن عَ نفَ شَنِن مِسِرَ بْشِ مَ. وٌ شَ لُ مّننِ هَن ﭑ وْيّنمَ عِ بّ تّمُي نَشّ، بَرِ مَ هٍرٌدٍ دِيْرّ قٍنمَ نّ عَلَكٌ عَ شَ عَ قَشَ.» 
يُسُقُ نَشَ كٍلِ كْي رَ، عَ دِيْرّ نُن عَ نفَ شَنِن مِسِرَ. 
عٍ نَشَ لُ مّننِ هَن هٍرٌدٍ نَشَ قَشَ، عَلَكٌ مَرِفِ نَشَن مَسٍن نَمِحْنمّ سَابُي رَ، عَ شَ كَمَلِ، «ﭑ بَرَ ﭑ مَ دِ شِلِ، عَ شَ كٍلِ مِسِرَ.» 
هٍرٌدٍ تٌ عَ كٌلٌن عَ كَرَ مْشْيٍ بَرَ عَ مَدَشُ، عَ بْحّ نَشَ تٍ عَ حَاشِ رَ. عَ نَشَ يَامَرِ قِ، دِ شّمّ بِرِن شَ قَشَ بّتّلّيمُ نُن عَ رَبِلِنيِ بِرِن، نَشٍيٍ مُ نُ حّ سَشَن سْتْ سِندٍن. عَ نَ نَتّ تٌنفٌ نَ كَرَ مْشْيٍ شَ تُنبُي تٌ تّمُي نَن مَ. 
نَ كُي، عَننَبِ يٍرٍ مِ شَ مَسٍنيِ نَشَ كَمَلِ، 
«شُي ندٍ بَرَ مّ رَ مَ، وَ شُي نُن سُننُنيِ فبٍفبٍ نَ عَ رَ. رَشٍلٍ وَ مَ عَ شَ دِيٍ نَن مَ قٍ رَ، عَ مُ تِنشِ مِشِ يٌ شَ عَ مَدُندُ بَرِ مَ دِيٍ مُ عَ بّ سْنْن دُنِحّ.» 
هٍرٌدٍ تٌ قَشَ، مَرِفِ شَ مَلٍكّ نَشَ مِنِ يُسُقُ مَ شِيٍ كُي مِسِرَ بْشِ مَ. 
عَ نَشَ عَ مَسٍن عَ بّ، «كٍلِ، دِيْرّ نُن عَ نفَ تٌنفٌ، عِ شَ فبِلٍن عٍ رَ عِسِرَيِلَ بْشِ مَ، بَرِ مَ نَشٍيٍ نُ وَشِ دِيْرّ قَشَقٍ، عٍ بَرَ قَشَ.» 
يُسُقُ نَشَ كٍلِ، عَ نَشَ دِيْرّ نُن عَ نفَ تٌنفٌ، عٍ فبِلٍن عِسِرَيِلَ بْشِ مَ. 
كْنْ يُسُقُ تٌ عَ مّ عَ عَرَشٍلُسِ نَن قِندِشِ يُدَيَ مَنفّ رَ عَ بَبَ هٍرٌدٍ حْشْي رَ، عَ نَشَ فَاشُ سٌدٍ نَا. عَلَ تٌ وْيّن عَ رَ شِيٍ كُي، عَ نَشَ سِفَ فَلِلٍ بْشِ مَ، 
عَ سَ سَبَتِ نَسَرّتِ. نَ رَبَ نّ عَلَكٌ نَمِحْنمّيٍ شَ مَسٍنيِ شَ كَمَلِ، نَشَن عَ مَسٍنشِ، «عَ شِلِ قَلَمَ نّ، ‹نَسَرّتِكَ.›»