مَتِيُ.
5.
عِسَ تٌ حَمَ تٌ، عَ نَشَ تٍ فٍيَ قَرِ، عَ عَ مَفٌرٌ. عَ قْشِرَبِرّيٍ نَشَ عٍ مَكْرّ عَ رَ. 
عَ نَشَ مَسٍنيِ تِ قْلْ عٍ بّ. 
«سّيوّ نَ مِشِيٍ بّ نَشٍيٍ عٍ يّتّ مَفٌرٌ مَ، بَرِ مَ عٍ قَمَ نّ سٌدٍ عَلَ شَ مَنفّيَ نِينِ بُن مَ. 
سّيوّ نَ مِشِيٍ بّ نَشٍيٍ وَ مَ، بَرِ مَ عٍ قَمَ نّ مَدُندُدٍ. 
سّيوّ نَ مِشِيٍ بّ نَشٍيٍ دِحّمَ، بْشِ قِندِ مَ عٍ تَن نَن كّ رَ. 
سّيوّ نَ مِشِيٍ بّ نَشٍيٍ وَ مَ تِنشِنيِ شْن، عَلْ كَامّتْي وَ مَ دٌنسٍ شْن مَ كِ نَشّ، بَرِ مَ عٍ عَ سْتْمَ نّ. 
سّيوّ نَ مِشِيٍ بّ نَشٍيٍ كِنِكِنِمَ عٍ بٌورٍيٍ مَ، بَرِ مَ عَلَ كِنِكِنِمَ نّ عٍ قَن مَ. 
سّيوّ نَ مِشِيٍ بّ نَشٍيٍ بْحّ قِيشّ، بَرِ مَ عٍ عَلَ تٌمَ نّ عَ شَ قٌنِسِرٍيَ كُي. 
سّيوّ نَ مِشِيٍ بّ نَشٍيٍ لَنيِ قٍنمَ عٍ نُن مِشِيٍ تَفِ، بَرِ مَ عٍ شِلِ قَلَمَ نّ عَلَ شَ دِيٍ. 
سّيوّ نَ مِشِيٍ بّ نَشٍيٍ حَشَنكَتَشِ تِنشِنيِ شَ قٍ رَ، بَرِ مَ عٍ سٌمَ نّ عَلَ شَ مَنفّيَ نِينِ بُن مَ.» 
«سّيوّ نَ وٌ بّ عٍ نَ وٌ كٌنبِ، عٍ نَ وٌ حَشَنكَتَ، عٍ نَ وُلٍ نُن قٍ كٌبِ مْولِ بِرِن قَلَ وٌ شُن مَ ﭑ مَ قٍ رَ. 
وٌ شَ حّلّشِن، وٌ شَ سّيوَ، بَرِ مَ وٌ بَرَايِ فبٌمَ نّ عَرِيَننَ. بٍينُن وٌ شَ بَرِ، عٍ نَمِحْنمّيٍ قَن حَشَنكَتَ نَ كِ نّ.» 
«وٌ مَنِيَشِ قْشّ نَن نَ يِ دُنِحَ عَدَ مَدِيٍ يَ مَ، كْنْ شَ قْشّ مّشّمّشّنيِ بَرَ بَ، عَ قَ مّشّمّشّنمَ دِ؟ عَ تِدٍ يٌ مُ نَ كْرّ، قٌ عَ وٌلِ تَندٍ، مِشِيٍ حّرّ عَ قَرِ. 
وٌ مَنِيَشِ نَءِيَلَنيِ نَن نَ يِ دُنِحَ عَدَ مَدِيٍ يَ مَ. تَا نَشَن دْشْشِ فٍيَ قَرِ، نَ مُ نْمَ نْشُندٍ. 
لَنثُي مُ رَدّشّمَ عَ شَ دْشْ دٍبٍ بُن مَ. عَ دْشْمَ لَنثُي دْشْسٍ نَن قَرِ عَلَكٌ عَ شَ بَنشِ كُي عِيَلَن بِرِن بّ. 
وٌ شَ نَءِيَلَنيِ قَن شَ يَنبَ نَ كِ عَدَ مَدِيٍ يَ مَ، عَلَكٌ عٍ شَ وٌ شَ كّوَلِ قَنيِيٍ تٌ، عٍ وٌ بَبَ مَتْشْ نَشَن نَ عَرِيَننَ.» 
«وٌ نَشَ عَ مَحْشُن عَ ﭑ قَشِ نّ ﭑ شَ تَوُرٍتَ مُنسَ نُن نَمِحْنمّيٍ شَ سّرِيّ بَ عَ عِ. ﭑ مُ قَشِ عٍ بَدٍ شّ، ﭑ قَشِ نّ عَلَكٌ ﭑ شَ عٍ رَكَمَلِ. 
ﭑ شَ نْندِ قَلَ وٌ بّ، دَنمِ كٌورٍ نُن بْشِ نَ نَ، هَلِ سِفِرّ كٍرٍن مُ بَمَ عَلَ شَ سّرِيّ رَ، قٌ عَ بِرِن كَمَلِ. 
نَ كُي، مِشِ يٌ عَلَ شَ يَامَرِ كٍرٍن مَتَندِ، نَ يَامَرِ شُرُن كِيٌكِ، عَ مَن قَ مِشِ فبّتّيٍ رَتَنتَن نَ كُي، عَ كَنيِ قَن شِلِ شُرُنمَ نّ بِرِن بّ عَلَ شَ مَنفّيَ نِينِ بُن مَ. كْنْ مِشِ يٌ عَلَ شَ سّرِيّ رَبَتُ، عَ مِشِ فبّتّيٍ شَرَن نَ رَ، نَ كَنيِ شُننَكٍلِ نَن سْتْمَ عَلَ شَ مَنفّيَ نِينِ بُن مَ. 
ﭑ شَ عَ قَلَ وٌ بّ، شَ وٌ شَ تِنشِنيِ مُ دَنفِ سّرِيّ كَرَ مْشْيٍ نُن قَرِ سّنِيٍ فبٍ رَ، وٌ مُ سٌمَ عَلَ شَ مَنفّيَ نِينِ بُن مَ عَبَدَن.» 
«وٌ عَ كٌلٌن وٌ بٍنبَيٍ يَمَرِ نَشَن نَ، ‹وٌ نَشَ قَشّ تِ. قَشّتِ مَكِيتِمَ نّ.› 
كْنْ ﭑ تَن شَ عَ قَلَ وٌ بّ، نَشَن يٌ بْحّ نَ تٍ عَ نفَشَكٍرٍنيِ شِلِ مَ، نَ كَنيِ مَكِيتِمَ نّ. نَشَن نَ عَ قَلَ نفَشَكٍرٍنيِ بّ، ‹عِ تَن دُفُلَ›، نَ كَنيِ مَكِيتِمَ نّ كِيتِسَ شُنفبٍيٍ يَ عِ. نَشَن نَ عَ قَلَ عَ بّ، ‹عِ تَن شَشِلِتَرٍ!›، نَ كَنيِ وٌلِمَ نّ يَهَننَمَ تّ شْورَ.» 
«نَ كُي، شَ وٌ بَرَ سِفَ سّرّشّ بَدٍ، وٌ قَ رَتُ عَ وٌ نفَشَكٍرٍنيِ شْنْشِ وٌ مَ قٍ ندٍ مَ، 
وٌ شَ وٌ شَ سّرّشّ لُ سّرّشّبَدٍ قّ مَ سِندٍن، وٌ سِفَ وٌ نفَشَكٍرٍنيِ يِرٍ. وٌ شَ لَنيِ شِرِ وٌ نُن وٌ نفَشَكٍرٍنيِ تَفِ، وٌ قَ فبِلٍن وٌ شَ سّرّشّ بَدٍ.» 
«عِ شَ كَتَ وٌ نُن عِ كَلَمُمَ شَ لَن سِننَنيِ مَ، وٌ نَ كِرَ شْن مَ تّمُي نَشّ. شَ نَ مُ عَ رَ عَ عِ شَنِنمَ كِيتِسَ يِرٍ، كِيتِسَ قَن عِ سٌ كْسِبِلِ يِ رَ، نَ قَن عِ سَ فٍيلِ. 
ﭑ شَ نْندِ قَلَ عِ بّ، عِ مُ مِنِمَ مّننِ قٌ عِ كْبِرِ بِرِن قِ هَن بَتَنكَ دْنشْي.» 
«وٌ عَ كٌلٌن وٌ بٍنبَيٍ يَمَرِ نَشَن نَ، ‹وٌ نَشَ يّنّ رَبَ.› 
كْنْ ﭑ تَن شَ عَ قَلَ وٌ بّ، نَشَن يٌ عَ يَ تِ فِنّ ندٍ رَ مِلّ كُي، نَ كَنيِ بَرَ فّ يّنّ رَبَدٍ عَ بْحّ كُي. 
شَ عِ يِرٍقَن يَ قِندِ مَ عِ رَتَنتَنسٍ رَ، عَ بَ نَ، عَ وْلّ. قَتٍ يِرٍ ندٍ بَقٍ نَ، نَ قِسَ دِنّ عِ قَتٍ فُندِ بِرِن وٌلِقٍ يَهَننَمَ. 
شَ عِ يِرٍقَن بّلّشّ قِندِ مَ عِ رَتَنتَنسٍ رَ، عَ بٌلٌن، عَ وْلّ. قَتٍ سَلٌنسٍ ندٍ بٌلٌنقٍ، نَ قِسَ دِنّ عِ قَتٍ فُندِ بِرِن وٌلِقٍ يَهَننَمَ.» 
«عَ مَن مَسٍنشِ نّ، ‹نَشَن وَ مَ مّيقٍ عَ شَ فِنّ رَ، عَ شَ قَتَن كّيدِ سٌ عَ يِ رَ.› 
كْنْ ﭑ تَن شَ عَ قَلَ وٌ بّ، نَشَن يٌ مّي عَ شَ فِنّ رَ، شَ عَ شَ فِنّ مُ يّنّ شَ رَبَشِ، نَ كَنيِ بَرَ عَ نِيَ نَ فِنّ شَ قِندِ يّنّلَ رَ عَ نَ دْشْ شّمّ فبّتّ شْن مَ تّمُي نَشّ. شّمّ نَشَن قَن نَ فِنّ دْشْمَ عٍ مّيشِ نَشَن نَ، عَ قَن بَرَ قِندِ يّنّلَ رَ.» 
«وٌ عَ كٌلٌن وٌ بٍنبَيٍ يَمَرِ نَشَن نَ، ‹وٌ نَشَ وٌ شَ مَرَكَلِ كَنَ، وٌ شَ عَ رَكَمَلِ نّ مَرِفِ بّ.› 
كْنْ ﭑ تَن شَ عَ قَلَ وٌ بّ، وٌ نَشَ وٌ كَلِ قٍوٌ! وٌ نَشَ وٌ كَلِ كٌورٍ رَ، بَرِ مَ عَلَ شَ كِبَنيِ نَن عَ رَ. 
وٌ نَشَ وٌ كَلِ بْشِ رَ، بَرِ مَ عَلَ سَنيِ تِدٍ نَ عَ رَ. وٌ نَشَ وٌ كَلِ دَرِ سَلَمُ رَ، بَرِ مَ مَنفّ شُنفبٍ شَ تَا نَن عَ رَ. 
وٌ نَشَ وٌ كَلِ وٌ يّتّ شُنيِ رَ، بَرِ مَ وٌ مُ نْمَ شُنسّشّ كٍرٍن نَقُفَدٍ، وٌ مُ نْمَ عَ قْورْدٍ. 
وٌ شَ نْندِ قَلَ. شَ عِيٌ نَن عَ رَ، وٌ شَ عَ قَلَ ‹عِيٌ›. شَ عَدٍ نَن عَ رَ، وٌ شَ عَ قَلَ ‹عَدٍ›. سٍسٍ سَ نَ شُن مَ، عَ قَتَنشِ سٍنتَنّ نَن مَ.» 
«وٌ عَ كٌلٌن وٌ يَمَرِ نَشَن نَ، ‹وٌ شَ يَ حْشْ يَ رَ، وٌ شَ حِنيِ حْشْ حِنيِ رَ.› 
كْنْ ﭑ تَن شَ عَ قَلَ وٌ بّ، وٌ نَشَ مِشِ كٌبِ فٍرٍ. شَ مِشِ ندٍ وٌ شّرّ فَرِن، وٌ شَ بٌورٍ سّيتِ قَن تِ عَ بّ. 
شَ مِشِ ندٍ وَ مَ وٌ شَنِنقٍ كِيتِ بَنشِ، عَلَكٌ عَ شَ دٌنمَ بَ وٌ يِ رَ، وٌ شَ وٌ شَ فُبَ قَن لُ عَ يِ. 
شَ مِشِ ندٍ وٌ كَرَشَن وٌ شَ عَ مَتِ حّرّ كُي كِلٌ كٍرٍن، وٌ شَ عَ مَتِ كِلٌ قِرِن. 
نَشَن نَ عِ مَكُلَ، عِ شَ عَ كِ. نَشَن وَ مَ سٍ ندٍ يٌقُقٍ عِ مَ، عِ نَشَ تٌندِ عَ بّ.» 
«وٌ عَ كٌلٌن وٌ يَمَرِشِ نَشَن نَ، ‹وٌ شَ وٌ بٌورٍ شَنُ، وٌ شَ وٌ يَشُي شْن.› 
كْنْ ﭑ تَن شَ عَ قَلَ وٌ بّ، وٌ شَ وٌ يَشُييٍ شَنُ، وٌ شَ عَلَ مَشَندِ مِشِيٍ بّ نَشٍيٍ وٌ حَشَنكَتَمَ. 
نَ كُي، وٌ قِندِ مَ وٌ بَبَ شَ دِيٍ رَ نَشَن نَ عَرِيَننَ، نَشَن كُيٍ عِبَمَ تِنشِنتْييٍ نُن تِنشِنتَرٍيٍ بّ، نَشَن تُنّ رَفٌرٌ مَ مِشِ قَنيِيٍ نُن مِشِ كٌبِيٍ بّ. 
شَ وٌ سَ مِشِيٍ فبَنسَن نَن شَنُمَ، نَشٍيٍ وٌ قَن شَنُشِ، وٌ بَرَايِ مُندُن سْتْمَ نَ كُي؟ هَلِ دُوتِ مَشِلِ كٌبِيٍ نَ مْولِ رَبَمَ. 
شَ وٌ سَ وٌ نفَشَكٍرٍنيِيٍ فبَنسَن نَن شّيبُمَ، وٌ مُنقٍ رَبَقٍ نَشَن قِندِ قٍ نّينّ رَ نَ كُي؟ هَلِ كَاقِرِيٍ نَ مْولِ رَبَمَ. 
نَ كُي، وٌ شَ تِنشِنيِ نُن مَرَقَنيِ شَ كَمَلِ، عَلْ وٌ نَشَن تٌشِ وٌ بَبَ رَ نَشَن نَ عَرِيَننَ.»