مَرَكِ.
4.
عِسَ مَن نَشَ كَوَندِ تِ قْلْ بَا دّ رَ. حَمَ فبٍفبٍ تٌ عٍ مَلَن، عَ نَشَ سَ دْشْ كُنكُي كُي، حَمَ نَشَ لُ بَا دّ رَ. 
عَ نَشَ قٍ وُيَشِ مَسٍن عٍ بّ تَالِيٍ رَ. عَ شَ كَوَندِ كُي، عَ نَشَ عَ مَسٍن عٍ بّ، 
«وٌ وٌ تُلِ مَتِ. شّ رَوَلِ ندٍ نَن مِنِ سَنسِ شْرِ فَرَنسَندٍ. 
عَ تٌ نُ سَنسِ شْرِ فَرَنسَنمَ، شْرِ ندٍيٍ نَشَ بِرَ سَنكِرَ شْن، شْنِيٍ نَشَ قَ، عٍ عٍ دٌن فبِكِ. 
شْرِ ندٍيٍ قَن نَشَ بِرَ فّمّ يِرٍ، بّندّ مُ فبٌ دّننَشّ. نٍيٍ نَشَ بُلَ مَقُرٍن نَ، بَرِ مَ نَ بّندّ مُ تِلِن. 
كْنْ سٌفٍ تٌ شْنْ، نَ سَنسِيٍ نَشَ رَفَن، عٍ شَرَ فبٍن، بَرِ مَ سَنكٍ مُ نُ نَ عٍ بّ. 
سَنسِ شْرِ ندٍيٍ قَن نَشَ بِرَ تُنبٍ كُنسِيٍ تَفِ. تُنبٍ كُنسِيٍ نَشَ فبٌ، عٍ سَنسِيٍ عِشّتّن، عٍ عٍ كَنَ، عٍ مُ بٌفِ يٌ رَ مِنِ. 
سَنسِ شْرِ ندٍيٍ قَن نَشَ بِرَ بّندّ قَنيِ مَ. نَ شْرِيٍ تَن، عٍ كٍرٍن كٍرٍن بِرِن سَنسِيٍ نَشَ تْنسْي رَ مِنِ، ندٍيٍ نَشَ شْرِ تٌنفٌ سَشَن نَمِنِ، ندٍيٍ شْرِ تٌنفٌ سٍننِ، ندٍيٍ شْرِ كّمّ.» 
نَ شَنبِ، عَ نَشَ عَ مَسٍن، «شَ وٌ تُلِ قٍ مّمَ، وٌ وٌ تُلِ مَتِ يِ مَسٍنيِ رَ.» 
عِسَ تٌ لُ عَ شَتِ مَ، عَ قْشِرَبِرّ قُ نُن قِرِنيِيٍ عَ نُن نَشٍيٍ نُ نَ عَ رَبِلِنيِ، عٍ نَشَ عَ مَشْرِن عَ شَ تَالِيٍ مَ. 
عَ نَشَ عَ مَسٍن عٍ بّ، «عَلَ بَرَ قَهَامُي قِ وٌ مَ وٌ شَ عَ شَ مَنفّيَ نِينِ فُندٌ كٌلٌن، كْنْ مِشِ فبّتّيٍ تَن قٍ بِرِن مّمَ تَالِ وْيّنيِيٍ نَن نَ، 
عَلَكٌ ‹عٍ شَ قٍ تٌ عَ قَنيِ رَ، كْنْ عٍ نَشَ عَ عِفبّ. عٍ شَ قٍ مّ عَ قَنيِ رَ، كْنْ عٍ نَشَ عَ قَهَامُ. نَ رَبَشِ نّ عَلَكٌ عٍ نَشَ قَ عٍ يَ رَقِندِ عَلَ مَ، عَلَ قَ دِحّ عٍ مَ.›» 
عَ نَشَ عٍ مَشْرِن، «وٌ تٌ مُ قَ يِ تَالِ كُي كٌلٌنشِ، وٌ تَالِ فبّتّيٍ كٌلٌنمَ دِ؟ 
شّ رَوَلِ نَشَن سَنسِ شْرِ فَرَنسَنمَ، عَ مَنِيَ مِشِ رَ نَشَن عَلَ شَ مَسٍنيِ كَوَندِ مَ. 
مِشِ ندٍيٍ مَنِيَشِ نَ سَنسِ شْرِيٍ رَ نَشٍيٍ بِرَ كِرَ شْن. عٍ نّقّ عَلَ شَ مَسٍنيِ مّ، سٍنتَنّ عَ بَ عٍ شَشِلِ مَ. 
سَنسِ شْرِ نَشٍيٍ بِرَ فّمّ يِرٍ، نٍيٍ مِسَالِشِ مِشِيٍ نَن نَ نَشٍيٍ عَلَ شَ مَسٍنيِ مّمَ، عٍ عَ سُشُ مَقُرٍن سّيوّ رَ. 
كْنْ سَنكٍ تٌ مُ نَ عٍ بّ، عٍ شَ دَنشَنِيَ مُ بُمَ. تْورّ نُن حَشَنكَتّ نَ عٍ لِ عَلَ شَ مَسٍنيِ شَ قٍ رَ، عٍ فبِلٍنمَ نّ عَلَ شَ قٍ قْشْ رَ كٍرٍن نَ. 
سَنسِ شْرِ نَشٍيٍ بِرَ تُنبٍ كُنسِيٍ تَفِ، نٍيٍ مِسَالِشِ مِشِيٍ نَن نَ نَشٍيٍ عَلَ شَ مَسٍنيِ مّمَ، 
كْنْ يِ دُنِحَ كْنتْقِلِ، نُن نَاقُلِ شْلِ، نُن قٍ فبّتّيٍ شْلِ نَن عٍ سُشُمَ هَن عٍ عَلَ شَ مَسٍنيِ بّحِن. نَ كُي، عَلَ شَ مَسٍنيِ مُ نْمَ عٍ بْحّ مَسَرَدٍ. 
سَنسِ شْرِ نَشٍيٍ بِرَ بّندّ قَنيِ تَن مَ، نٍيٍ مِسَالِشِ مِشِيٍ نَن نَ نَشٍيٍ عَلَ شَ مَسٍنيِ مّمَ، عٍ مَن عَ سُشُ، عَ عٍ بْحّ مَسَرَ. شْرِ كٍرٍن بٌفِ تٌنفٌ سَشَن نَمِنِمَ، ندٍيٍ بٌفِ تٌنفٌ سٍننِ، فبّتّيٍ قَن بٌفِ كّمّ.» 
عِسَ مَن نَشَ عَ مَسٍن عٍ بّ، «لَنثُي نْمَ دْشْدٍ دٍبٍ بُن مَ، شَ نَ مُ سَدٍ بُن مَ؟ عَ مُ دْشْمَ لَنثُي دْشْسٍ شَ قَرِ؟ 
بَرِ مَ سٍ نَشَن بِرِن نْشُنشِ، قٌ عَ بِرِن شَ مَكّنّن. سٍ نَشَن بِرِن قِندِشِ فُندٌ رَ، قٌ عَ بِرِن شَ سَ كّنّ مَ. 
شَ وٌ تُلِ قٍ مّمَ، وٌ وٌ تُلِ مَتِ يِ مَسٍنيِ رَ.» 
عِسَ مَن نَشَ عَ مَسٍن عٍ بّ، «وٌ وٌ حْشْ سَ ﭑ مَ مَسٍنيِ شْن. وٌ مَنِيَسٍ نَشَن نَوَلِمَ بٌورٍيٍ بّ، نَ نَن نَوَلِمَ وٌ قَن بّ، عَلَ مَن ندٍ سَ عَ شُن. 
قَهَامُي كَنيِ شَ قَهَامُي شُن مَسَمَ، كْنْ قَهَامُتَرٍ، هَلِ عَ نَشَن دِ مَحْشُنشِ عَ فبٍ رَ، نَ قَمَ بَدٍ عَ يِ رَ.» 
عِسَ مَن نَشَ عَ مَسٍن، «عَلَ شَ مَنفّيَ مَنِيَشِ شّمّ نَن نَ نَشَن سَنسِ شْرِ فَرَنسَنمَ شّ مَ. 
شَ عَ شِقٍ، شَ عَ مُ شِقٍ، كْي نُن يَنيِ، سَنسِ بُلَمَ نّ، عَ تٍ، كْنْ عَ تَن مُ عَ كٌلٌن نَ رَبَمَ كِيٌكِ. 
بْشِ نَن سَنسِ رَ مْمَ عَ يّتّ مَ. عَ بُلَمَ نّ سِندٍن، عَ تٍ، عَ تْنسْي مِنِ، عَ شْرِ قَ رَقٍ. 
عَ نّقّ مْ، عَ كَنيِ عَ شَبَمَ نّ، بَرِ مَ عَ شَبَ تّمُي بَرَ عَ لِ.» 
عِسَ مَن نَشَ عَ مَسٍن، «وٌن نْمَ عَلَ شَ مَنفّيَ مِسَالِدٍ مُنسٍ رَ؟ وٌن نْمَ عَ شَ قٍ مَسٍندٍ تَالِ وْيّنيِ مُندُن نَ؟ 
عَ مَنِيَشِ كٌندٍ شْرِ نَن نَ. عَ نّ سِمَ بْشِ تّمُي نَشّ، عَ شْرِ شُرُن بْشِ سَنسِ بِرِن بّ، 
كْنْ شَ عَ بَرَ بُلَ، عَ قِندِ عَ رَ، عَ بِلِ نُن عَ سَلٌنيِيٍ فبٌمَ دَنفِقٍ سَنسِ بِرِن نَ، شْنِيٍ نُ قَ عٍ تّي سَ عَ كْن نَ، نِينِ بُن مَ.» 
عَ نُ مِشِيٍ كَوَندِ مَ يِ تَالِ وْيّنيِ مْولِ فبٍفبٍ نَن نَ عٍ شَشِلِ بّرّ رَ. 
عَ حَن مُ نُ مَسٍنيِ يٌ تِمَ عٍ بّ شَ تَالِ دَاشِ شَ مَ رَ. كْنْ شَ عٍ نُن عَ قْشِرَبِرّيٍ دٌرٌ بَرَ لُ عَ رَ، عَ نُ عَ بِرِن تَفِ رَبَمَ نّ عٍ بّ. 
نُنمَرٍ تٌ سٌ نَ لْشْي كٍرٍنيِ، عِسَ نَشَ عَ قَلَ عَ قْشِرَبِرّيٍ بّ، «وٌن شّي نَاكِرِ مَ.» 
عَ قْشِرَبِرّيٍ نَشَ كٍلِ حَمَ شُن، عٍ عِسَ شَنِن كُنكُي كُي عَ نُ نَشَن كُي. عٍ نَشَ كُنكُي فبّتّيٍ قَن شَنِن. 
قٌيٍ بٍلٍبٍلٍ نَشَ كٍلِ بَا مَ، مْرْنيِ نُ قَ سَ كُنكُي كُي. 
كْنْ عِسَ تَن نُ نَ شِقٍ كُنكُي شْرّ رَ، عَ شُنيِ سَشِ شُنسَسٍ مَ. عَ قْشِرَبِرّيٍ نَشَ قَ عَ رَشُنُ، عٍ عَ قَلَ عَ بّ، «كَرَ مْشْ، عِ مُ كْنتْقِلِشِ وٌن قَشَقٍ رَ؟» 
عِسَ تٌ شُنُ، عَ نَشَ شَاحّ قٌيٍ مَ، عَ قَ بَا يَمَرِ، «دُندُ! عِ رَشَرَ!» قٌيٍ نَشَ عِتِ، بَا نَشَ رَشَرَ يٍن! 
عِسَ قَ عٍ مَشْرِن، «وٌ فَاشُشِ مُنقٍ رَ؟ هَن يَ دَنشَنِيَ مُ نَ وٌ بّ؟» 
عٍ قَن نَشَ فَاشُ كِ قَنيِ، عٍ نُ عَ قَلَ عٍ بٌرٍ بّ، «ندٍ لَنشِ يِ مَ؟ هَلِ قٌيٍ نُن بَا، عٍ عَ شُي رَبَتُمَ.»