مَرَكِ.
9.
عِسَ مَن نَشَ عَ مَسٍن عٍ بّ، «ﭑ شَ نْندِ قَلَ وٌ بّ، مِشِ ندٍيٍ تِشِ وٌ يَ مَ بٍ، نَشٍيٍ مُ قَشَمَ قٌ عٍ عَلَ شَ مَنفّيَ نِينِ تٌ قَ رَ سّنبّ كُي.» 
شِ سٍننِ دَنفِ شَنبِ، عِسَ نَشَ ثِيّرِ، يَكِ، نُن يَيَ شَنِن عٍ دٌرٌ مَ فٍيَ عِتٍشِ ندٍ قَرِ. مّننِ عِسَ نَشَ مَسَرَ، عَ نْرْ عٍ يَ شْرِ. 
عَ شَ سٌسٍيٍ نَشَ قِيشّ عَ مْولِ ندٍ رَ نَشَن مُ تٌمَ دُنِحَ مَ. 
عَننَبِ عٍلِيَ نُن عَننَبِ مُنسَ نَشَ مِنِ قْشِرَبِرّيٍ يَ شْرِ، عٍ نَشَ عٍ تٌ نَا عٍ نُن عِسَ وْيّنقٍ. 
ثِيّرِ نَشَ عَ قَلَ عِسَ بّ، «كَرَ مْشْ، قٍ قَنيِ نَ عَ رَ مُشُ تٌ نَ بٍ يِ كِ. مُشُ شَ لِنفِرَ سَشَن يَءِلَن، كٍرٍن عِ فبٍ، كٍرٍن عَننَبِ مُنسَ فبٍ، كٍرٍن عَننَبِ عٍلِيَ فبٍ.» 
ثِيّرِ نَ قَلَ نّ عَ تٌ مُ نُ سٍسٍ كٌلٌن عَ نَشَن قَلَمَ، بَرِ مَ عَ تَن نُن عَ بٌورٍيٍ نُ بَرَ فَاشُ كِ قَنيِ رَ. 
نَ شَنبِ، نُشُي نَشَ فٌرٌ عٍ شُن مَ، شُي ندٍ نَشَ مِنِ نُشُي كُي، عَ عَ مَسٍن، «ﭑ مَ دِ مَشَنُشِ نَن يِ كِ. وٌ وٌ تُلِ مَتِ عَ رَ.» 
نَ عِكْرْشِ رَ، عِسَ قْشِرَبِرّيٍ تٌ عٍ يَ رَفٍ، عٍ مُ مِشِ يٌ تٌ عٍ يِرٍ قٌ عِسَ. 
عٍ تٌ نُ نَ فٌرٌقٍ فٍيَ قَرِ، عِسَ نَشَ عَ مَتِنتِن عٍ رَ، عٍ قٍ نَشَن تٌشِ عٍ يَ رَ، عٍ نَشَ عَ قَلَ مِشِ يٌ بّ، هَن بٍيمَنُن عَدَ مَ شَ دِ شَ كٍلِ قَشّ مَ. 
عٍ نَشَ نَ رَفَتَ عٍ شَشِلِ مَ، عٍ نُ عٍ بٌرٍ مَشْرِن، «عَ تٌ عَ قَلَ عَ عَ كٍلِمَ قَشّ مَ، نَ مُنسٍ مَسٍنشِ؟» 
عٍ نَشَ عِسَ مَشْرِن، «مُنقٍ رَ سّرِيّ كَرَ مْشْيٍ عَ قَلَمَ عَ قٌ عَننَبِ عٍلِيَ نَن سِنفٍ شَ قَ؟» 
عَ نَشَ عَ مَسٍن عٍ بّ، «نْندِ نَ عَ رَ. عَننَبِ عٍلِيَ نَن سِنفٍ قَمَ يَتِ، عَ قٍ بِرِن يَءِلَن. عَ مَن سّبّشِ مُنقٍ رَ، عَ قٌ عَدَ مَ شَ دِ شَ تْورّ فبٍفبٍ سْتْ، مِشِيٍ عَ مَبٍرٍ؟ 
كْنْ ﭑ شَ عَ قَلَ وٌ بّ، عَننَبِ عٍلِيَ حَن بَرَ قَ، كْنْ عٍ بَرَ عٍ وَشْنقٍ بِرِن نِيَ عَ رَ، عَلْ عَ شَ قٍ سّبّشِ كِ نَشّ.» 
نَ شَنبِ، عٍ نَشَ سَ قْشِرَبِرّ بٌورٍيٍ لِ، عٍ نُن سّرِيّ كَرَ مْشْيٍ نُ نَ شْرْشْقٍ عٍ شَ وْيّنيِيٍ كُي، حَمَ فبٍفبٍ قَن نُ نَ عٍ رَبِلِنيِ. 
حَمَ قّقّ عِسَ تٌ، عٍ نَشَ كَابَ، عٍ عٍ فِ، عٍ شَ سَ عَ شّيبُ. 
عِسَ نَشَ عٍ مَشْرِن، «وٌ نُن يٍيٍ نَ وْيّنقٍ يِ مْولِ رَ مُنقٍ مَ؟» 
شّمّ ندٍ نَشَ عَ يَابِ حَمَ تَفِ، «كَرَ مْشْ، ﭑ قَشِ ﭑ مَ دِ شّمّ نَن نَ عِ شْن، بَرِ مَ حِننّ نَ عَ قْشْ رَ نَشَن بَرَ عَ دّ بٌبٌ. 
عَ نَ كٍلِ عَ رَ دّدّ، عَ عَ رَبِرَ مَ نّ بْشِ، عَ دّ شُنقّ نُ قَ مِنِ، عَ نُ عَ حِنيِ رَشِن، عَ قَتٍ بِرِن شْرْشْ عَ رَ. ﭑ بَرَ عِ قْشِرَبِرّيٍ مَيَندِ عٍ شَ يِ حِننّ كٍرِ عَ قْشْ رَ، كْنْ عٍ مُ نْ.» 
عِسَ نَشَ عٍ يَابِ، «وٌ تَن دَنشَنِيَتَرٍ بْنسْي، ﭑ شَ لُ وٌ سّيتِ مَ هَن مُن تّمُي؟ ﭑ شَ تِ وٌ بُن مَ هَن مُن لْشْي؟ وٌ قَ نَ دِ رَ ﭑ شْن.» 
عٍ نَشَ قَ عَ رَ عَ شْن. حِننّ تٌ عِسَ تٌ، عَ نَشَ دِ رَبِرَ كٍرٍن نَ، عَ نُ قَ عَ مَحِندِفِلِن بْشِ، عَ دّ شُنقّ نُ مِنِ. 
عِسَ نَشَ عَ بَبَ مَشْرِن، «يِ رَبَمَ عَ رَ كَبِ مُن تّمُي؟» عَ نَشَ عَ يَابِ، «كَبِ عَ دِ مّدِ تّمُي. 
سَنمَيَ وُيَشِ يِ حِننّ عَ رَبِرَ مَ تّ شْورَ، شَ نَ مُ يٍ، عَلَكٌ عَ شَ عَ قَشَ. كْنْ شَ عِ نْمَ قٍ ندٍ رَ، مُشُ مَلِ. كِنِكِنِ مُشُ مَ!» 
عِسَ نَشَ عَ مَسٍن عَ بّ، «عِ نَشّ، شَ ﭑ نْمَ. قٍقٍ مُ نَ نَشَن مُ نْمَ رَبَدٍ مِشِ بّ شَ دَنشَنِيَ نَ عَ بّ.» 
دِ بَبَ قَن نَشَ عَ شُي عِتٍ كٍرٍن نَ عِسَ مَيَندِقٍ رَ، «دَنشَنِيَ نَ ﭑ بّ، كْنْ ﭑ مَلِ ﭑ مَ دَنشَنِيَتَرٍحَ شَ قٍ رَ!» 
عِسَ تٌ حَمَ تٌ، عٍ قَقٍ عٍ فِ رَ، عَ نَشَ وْيّن حِننّ رَ، «عِ تَن حِننّ نَشَن بَرَ يِ دِ دّ بٌبٌ، عِ عَ تُلِ شْرِ، ﭑ بَرَ عِ يَامَرِ، فبِلٍن عَ قْشْ رَ، عِ مَن نَشَ عَ تْورْ سْنْن!» 
حِننّ نَشَ سْنشْ، عَ دِ رَكٍتُن عَ رَ عَ حَاشِ رَ، عَ قَ فبِلٍن عَ قْشْ رَ. دِ نَشَ لُ عَلْ عَ قَشَشِ نّ. مِشِ فبٍفبٍ نَشَ عَ قَلَ، «عَ بَرَ قَشَ.» 
كْنْ عِسَ نَشَ عَ سُشُ عَ بّلّشّ مَ، عَ عَ رَكٍلِ، دِ قَن نَشَ تِ. 
عِسَ تٌ سٌ بَنشِ، عَ قْشِرَبِرّيٍ نَشَ عَ مَشْرِن عٍ دٌرٌ مَ، «مُنقٍ رَ مُشُ تَن مُ نْ نَ حِننّ كٍرِدٍ؟» 
عِسَ نَشَ عَ مَسٍن عٍ بّ، «يِ حِننّ مْولِ تَن كٍرِ مَ مِشِ قْشْ رَ عَلَ مَشَندِ نَن تُن نَ.» 
عٍ نَشَ كٍلِ مّننِ، عٍ فَلِلٍ بْشِ عِفِرِ. عِسَ مُ نُ وَ مَ مِشِيٍ شَ عَ يِرٍ كٌلٌن، 
بَرِ مَ عَ نُ نَ عَ قْشِرَبِرّيٍ شَرَنقٍ نّ. عَ نَشَ عَ مَسٍن عٍ بّ، «عَدَ مَ شَ دِ سَمَ نّ مِشِيٍ بّلّشّ، عٍ عَ قَشَ. عَ شَ قَشّ شِ سَشَن دَنفِ شَنبِ، عَ مَن كٍلِمَ نّ قَشّ مَ.» 
كْنْ عَ قْشِرَبِرّيٍ مُ عَ شَ وْيّنيِ قَهَامُ، عٍ مَن مُ سُو سَ عَ مَشْرِندٍ. 
عٍ نَشَ سٌ كَثّرّنَمُ. عٍ مَن تٌ سٌ بَنشِ كُي، عِسَ نَشَ عٍ مَشْرِن، «وٌ نُ نَ وْيّنيِ مُندُن كِرَ شْن؟» 
كْنْ عٍ مُ سٍسٍ قَلَ، بَرِ مَ عٍ تٌ نُ وْيّنمَ عٍ بٌرٍ بّ كِرَ شْن، عٍ نُ وَ مَ عَ كٌلٌنقٍ نّ نَشَن تِدٍ فبٌ عٍ يَ مَ. 
نَ كُي، عِسَ تٌ عَ مَفٌرٌ، عَ نَشَ يِ مِشِ قُ نُن قِرِن شِلِ، عَ عَ مَسٍن عٍ بّ، «شَ مِشِ يٌ وَ قِندِقٍ يَرٍرَتِ رَ، قٌ نَ كَنيِ شَ قِندِ بِرِن شَ شَنبِرَتِ رَ، عَ قِندِ بِرِن هَيِ قَنمَ رَ.» 
عِسَ نَشَ دِ مّدِ ندٍ تٌنفٌ، عَ عَ تِ عٍ تَفِ. عَ نَشَ دِ مّدِ دْشْ عَ سَن مَ، عَ قَ عَ مَسٍن عَ قْشِرَبِرّيٍ بّ، 
«مِشِ يٌ نَشَن يِ دِ مّدِ مْولِ رَ سّنّمَ ﭑ شِلِ رَ، نَ كَنيِ بَرَ ﭑ تَن يّتّ يَتِ رَ سّنّ. مِشِ يٌ ﭑ نَسّنّ، نَ كَنيِ مُ ﭑ تَن فبَنسَن شَ رَ سّنّشِ. عَ بَرَ ﭑ شّيمَ قَن نَسّنّ.» 
يَيَ نَشَ عَ قَلَ عَ بّ، «كَرَ مْشْ، مُشُ بَرَ شّمّ ندٍ تٌ عَ حِننّ كٍرِ مَ مِشِ قْشْ رَ عِ شِلِ سَابُي رَ. مُشُ بَرَ كَتَ عَ شَ بَ نَ مَ، بَرِ مَ عَ مُ بِرَشِ وٌن قْشْ رَ.» 
عِسَ نَشَ عَ مَسٍن، «وٌ نَشَ عَ رَتْن، بَرِ مَ مِشِ يٌ كَابَنَكٌ رَبَ ﭑ شِلِ سَابُي رَ، نَ كَنيِ مُ نْمَ قٍ حَاشِ قَلَدٍ ﭑ مَ قٍ رَ مَقُرٍن. 
نَ كُي، مِشِ نَشَن مُ عَ عِكٍلِشِ وٌن شِلِ مَ، عَ كَنيِ نَ وٌن بّ نّ. 
مِشِ يٌ وٌ كِ يٍ ﭑ شِلِ رَ وٌ تٌ بِرَشِ عَلَ شَ مِشِ سُفَندِشِ قْشْ رَ، ﭑ شَ نْندِ قَلَ وٌ بّ، نَ كَنيِ مُ فَنمَ عَ بَرَايِ رَ مُكُ.» 
«مِشِ يٌ يِ مِشِ شُرِ كٍرٍن نَتَنتَن، نَشَن دَنشَنِيَشِ ﭑ مَ، عَ قِسَ نَ كَنيِ بّ فّمّ بِنيٍ شَ شِرِ عَ كْنيِ رَ، عَ رَ سِن بَا مَ. 
شَ عِ بّلّشّ قِندِ عِ رَتَنتَنسٍ رَ، عَ بٌلٌن. عِ سٌقٍ عَرِيَننَ عِ بّلّشّ كٍرٍن بٌلٌنشِ، نَ قِسَ عِ بّ دِنّ عِ بّلّشّ قِرِن لُشِ نَ، عِ قَ سِفَ يَهَننَمَ، تّ مُ شُبٍنمَ دّننَشّ. 
شَ عِ سَنيِ قِندِ عِ رَتَنتَنسٍ رَ، عَ بٌلٌن. عِ سٌقٍ عَرِيَننَ عِ سَنيِ كٍرٍن بٌلٌنشِ، نَ قِسَ عِ بّ دِنّ عِ سَنيِ قِرِن لُشِ نَ، عِ قَ وٌلِ يَهَننَمَ. 
شَ عِ يَ قِندِ عِ رَتَنتَنسٍ رَ، عَ بَ نَ. عِ سٌقٍ عَرِيَننَ عِ يَ كٍرٍن كَنَشِ، نَ قِسَ عِ بّ دِنّ عِ يَ قِرِن لُشِ نَ، عِ قَ وٌلِ يَهَننَمَ، 
كُلِ مُ قَشَمَ دّننَشّ، تّ قَن مُ شُبٍنمَ.» 
«تّ سَمَ نّ مِشِ بِرِن مَ، عَلْ قْشّ سَمَ دٌنسٍ مَ كِ نَشّ. 
قْشّ قِندِشِ قٍ قَنيِ نَن نَ، كْنْ شَ قْشّ مّشّمّشّنيِ بَرَ بَ، عَ قَ مّشّمّشّنمَ دِ؟ قْشّ شَ لُ وٌ عِ، وٌ شَ لُ بْحّسَ كُي وٌ بٌرٍ تَفِ.»