يَيَ.
11.
شّمّ ندٍ نُ قُرَشِ بٍتَنِ نَشَن شِلِ لَسَرُ. عَ مَافِنّيٍ قَن نُ سَبَتِشِ نَا، مَرِيَمَ نُن مَرَتَ. 
مَرِيَمَ نَن لَبُندّ تُرٍ سَ مَرِفِ سَنيِيٍ مَ، عَ قَ عٍ مَقُرُكُ عَ شُنسّشّ رَ. عَ تَن نَن مَاشّمّ قِندِ لَسَرُ رَ، نَشَن نُ قُرَشِ. 
نَ كُي، لَسَرُ مَافِنّيٍ نَشَ شّيرَ شّي عِسَ مَ، عَ شَ سَ عَ قَلَ عَ بّ، «مَرِفِ، عِ شَنُنتٍنيِ قُرَشِ.» 
عِسَ تٌ عَ مّ، عَ نَشَ عَ مَسٍن، «يِ قُرٍ مُ سَ رَحْنمَ قَشّ شَ مَ، عَ قَمَ عَلَ شَ نْرّ نَن مَكّنّندٍ، عَلَكٌ عَلَ شَ دِ قَن شَ مَتْشْي سْتْ عَ سَابُي رَ.» 
عِسَ نُ مَرَتَ نُن مَرِيَمَ نُن عٍ مَاشّمّ لَسَرُ شَنُشِ كِ قَنيِ. 
عَ تٌ لَسَرُ قُرَقٍ مّ، عَ مُ سِفَ دّدّ، عَ نَشَ لُ نَا شِ قِرِن مَن. 
نَ شَنبِ، عَ نَشَ عَ قَلَ عَ قْشِرَبِرّيٍ بّ، «وٌن شَ فبِلٍن يُدَيَ بْشِ مَ.» 
عَ قْشِرَبِرّيٍ نَشَ عَ قَلَ، «كَرَ مْشْ، يُوِقِيٍ كَتَشِ عِ قَشَدٍ دّننَشّ يَ، عِ تَن فبِلٍنقٍ مّننِ نّ؟» 
عِسَ نَشَ عٍ يَابِ، «وَشَتِ قُ نُن قِرِن شَ مُ نَ قّيحّن كٍرٍن كُي؟ شَ نَشَن يٌ عَ حّرّ مَ يَنيِ رَ، عَ مُ عَ سَنيِ رَدِنمَ بَرِ مَ يِ دُنِحَ نَءِيَلَنيِ يَنبَمَ عَ بّ. 
كْنْ شَ نَشَن يٌ عَ حّرّ مَ كْي رَ، عَ عَ سَنيِ رَدِنمَ نّ، بَرِ مَ نَءِيَلَنيِ يٌ مُ عَ بّ.» 
عَ نَ قَلَ شَنبِ، عِسَ مَن نَشَ عَ مَسٍن، «وٌن شَنُنتٍنيِ لَسَرُ بَرَ شِ، كْنْ ﭑ سِفَقٍ عَ رَشُنُدٍ.» 
عَ قْشِرَبِرّيٍ نَشَ عَ قَلَ عَ بّ، «مَرِفِ، شَ عَ نَ شِقٍ، عَ يَلَنمَ نّ.» 
عِسَ تٌ لَسَرُ شِقٍ قَلَ، عَ نُ عَ قَشَقٍ نَن مَ، كْنْ عَ قْشِرَبِرّيٍ تَن حْشْ عَ مَ، عَ عَ نُ مَلَبُي شِ شْلِ نَن مَ. 
نَ كُي، عِسَ نَشَ وْيّن عٍ بّ عَ قِيشّ رَ، «لَسَرُ بَرَ لَاشِرَ 
كْنْ نَ رَبَقٍ ﭑ شَنبِ، عَ بَرَ قِندِ سّيوّ رَ ﭑ بّ، بَرِ مَ عَ شْلِ ﭑ مَ وٌ شَ دَنشَنِيَ سْتْ يِ قٍ كُي. يَكْسِ، وٌن شَ سِفَ عَ يِرٍ.» 
نَ تّمُي تٌمَسِ، عَ نُ قَلَمَ نَشَن بّ «فُلِ»، عَ نَشَ عَ قَلَ عِسَ قْشِرَبِرّ بٌورٍيٍ بّ، «وٌن بِرِن شّي، وٌن نُن كَرَ مْشْ بِرِن شَ قَشَ!» 
عِسَ تٌ سٌ نَا، عَ نَشَ عَ لِ لَسَرُ قُرٍ بَرَ شِ نَانِ رَبَ فَبُرِ كُي. 
كِلٌ سَشَن حْندْن نَن نُ نَ بٍتَنِ نُن دَرِ سَلَمُ تَفِ. عٍ تٌ مَكْرّ، 
يُوِقِ فبٍفبٍ نُ بَرَ قَ مَرَتَ نُن مَرِيَمَ شْنيِ، عٍ مَاشّمّ حْنقٍ كُنقَ بَدٍ. 
مَرَتَ تٌ عِسَ قَقٍ مّ، عَ نَشَ سَ عَ رَلَن، كْنْ مَرِيَمَ تَن دْشْشِ نَشَ لُ بَنشِ. 
مَرَتَ نَشَ عَ قَلَ عِسَ بّ، «مَرِفِ، شَ عِ نُ نَ بٍ نُ، ﭑ مَاشّمّ مُ قَشَمَ نُ. 
كْنْ هَلِ يَكْسِ، ﭑ عَ كٌلٌن عَ عِ نَ قٍقٍ مَشْرِن عَلَ مَ، عَ عَ رَبَمَ نّ عِ بّ.» 
عِسَ نَشَ عَ قَلَ عَ بّ، «عِ شُنيَ كٍلِمَ نّ قَشّ مَ.» 
مَرَتَ نَشَ عَ يَابِ، «ﭑ عَ كٌلٌن تَن، عَ كٍلِمَ نّ قَشّ مَ دُنِحَ رَحْنيِ، قَشَمِشِيٍ كٍلِمَ تّمُي نَشّ.» 
عِسَ نَشَ عَ مَسٍن عَ بّ، «ﭑ تَن نَن نَ مَرَكٍلِ نُن كِسِ رَ. نَشَن نَ دَنشَنِيَ ﭑ مَ، عَ كِسِمَ نّ، هَلِ عَ قَشَ. 
نَشَن يٌ بَلٌشِ، عَ دَنشَنِيَشِ ﭑ مَ، نَ كَنيِ مُ لْيمَ عَبَدَن. عِ لَشِ نَ رَ؟» 
عَ نَشَ عَ يَابِ، «عِيٌ، مَرِفِ! ﭑ لَشِ عَ رَ عَ عِ تَن نَن نَ عَلَ شَ مِشِ سُفَندِشِ رَ، عَلَ شَ دِ، نَشَن لَن عَ شَ قَ دُنِحَ مَ.» 
مَرَتَ نَ قَلَ شَنبِ، عَ نَشَ سِفَ عَ شُنيَ مَرِيَمَ قْشْ رَ، عَ عَ قَلَ عَ بّ عٍ دٌرٌ مَ، «كَرَ مْشْ بَرَ قَ، عَ نَ عِ شِلِقٍ.» 
مَرِيَمَ تٌ عَ مّ، عَ نَشَ كٍلِ كٍرٍن نَ، عَ سِفَ عِسَ رَلَندٍ. 
نَ تّمُي، عِسَ مُ نُ سٌشِ تَا كُي. مَرَتَ عَ لِ دّننَشّ، عَ نُ نَ مّننِ نّ سِندٍن. 
يُوِقِ نَشٍيٍ قَشِ كُنقَ بَدٍ، نَشٍيٍ نُ نَ مَرِيَمَ قّ مَ بَنشِ كُي، عٍ تٌ عَ تٌ كٍلِ رَ مَقُرٍن نَ، عٍ نَشَ بِرَ عَ قْشْ رَ تَندٍ. عٍ حْشْ عَ مَ عَ عَ نَ سِفَقٍ فَبُرِ يِرٍ نّ، عَ شَ سَ وَ نَا. 
مَرِيَمَ تٌ عِسَ يِرٍ لِ، عَ قّقّ عَ تٌ، عَ نَشَ سُيِدِ عَ بّ، عَ عَ قَلَ، «مَرِفِ، شَ عِ نُ نَ بٍ نُ، ﭑ مَاشّمّ مُ قَشَمَ نُ!» 
عِسَ تٌ مَرِيَمَ تٌ، عَ نَ وَقٍ، يُوِقِ نَشٍيٍ نُ نَ عَ قْشْ رَ، نٍيٍ قَن وَقٍ، عَ نَشَ سُننُن، عَ بْحّ نَشَ رَحَاشُ عَ مَ. 
عَ نَشَ مَشْرِنيِ تِ، «وٌ عَ رَفَتَشِ مِندٍن؟» عٍ نَشَ عَ يَابِ، «مَرِفِ، قَ، مُشُ شَ نَ مَسٍن عِ بّ.» 
عِسَ نَشَ وَ. 
نَ كُي، يُوِقِيٍ نَشَ عَ قَلَ، «عَ مَتٌ، لَسَرُ نُ رَقَنشِ عَ مَ كِ نَشّ!» 
كْنْ ندٍيٍ عٍ يَ مَ، عٍ نَشَ عَ قَلَ، «ثٍ، يِ نَشَن دْنشُي يَ رَبْو، عَ مُ نُ نْمَ لَسَرُ رَتَنفَدٍ قَشّ مَ شّ؟» 
عِسَ بْحّ مَن نَشَ رَحَاشُ عَ مَ. عَ نَشَ سِفَ فَبُرِ يِرٍ. قْنمّ ندٍ نَن نُ عَ رَ، فّمّ بٍلٍبٍلٍ دْشْشِ نَ دّ رَ. 
عِسَ نَشَ عَ قَلَ، «وٌ فّمّ بَ نَا.» مَرَتَ، قَشَمِشِ مَافِنّ، عَ نَشَ عَ قَلَ، «مَرِفِ، عَ شَ مَرَفَتّ شِ نَانِ نَن تٌ! عَ عَ لِمَ عَ قُرٍ شِرِ بَرَ مِنِ يِ وَشَتِ مَ.» 
عِسَ نَشَ عَ قَلَ عَ بّ، «ﭑ مُ عَ قَلَ شّ عِ بّ، عَ شَ عِ دَنشَنِيَ، عِ عَلَ سّنبّ مَكَابَشِ تٌمَ نّ؟» 
نَ كُي، عٍ نَشَ فّمّ بَ قْنمّ فَبُرِ دّ مَ. عِسَ نَشَ عَ يَ رَتٍ كٌورٍ، عَ عَ قَلَ، «ﭑ بَبَ عَلَ، ﭑ بَرَ عِ تَنتُ عِ تٌ ﭑ شُي رَ مّشِ. 
ﭑ تَن حَن عَ كٌلٌن، عِ ﭑ شُي رَ مّمَ تّمُي بِرِن، كْنْ ﭑ نَ قَلَشِ حَمَ نَن مَ قٍ رَ نَشٍيٍ تِشِ بٍ، عٍ شَ لَ عَ رَ عَ عِ تَن نَن ﭑ شّيشِ.» 
عَ نَ قَلَ شَنبِ، عِسَ نَشَ عَ شُي عِتٍ سّنبّ رَ، عَ عَ قَلَ، «لَسَرُ، مِنِ!» 
عَ تَن قَشَمِشِ نَشَ مِنِ عَ سَنيِيٍ نُن عَ بّلّشّيٍ مَشِرِشِ كَسَنفٍ كُي، عَ يَتَفِ مَن مَكُنقُكُنقُشِ دُفِ فبّتّ قَن نَ. عِسَ نَشَ عَ قَلَ مِشِيٍ بّ، «وٌ كَسَنفٍ بَ عَ مَ، وٌ عَ مَقُلُن، عَ شَ نْ عَ حّرّدٍ.» 
يُوِقِ نَشٍيٍ نُ بَرَ قَ مَرِيَمَ يِرٍ، عٍ عِسَ شَ كَابَنَكٌ تٌ، عٍ فبٍفبٍ نَشَ دَنشَنِيَ عَ مَ. 
كْنْ ندٍيٍ نَشَ سَ دّنتّفّ سَ قَرِ سّنِيٍ بّ، عِسَ قٍ نَشَن نَبَشِ. 
نَ كُي، سّرّشّدُبّ كُنتِفِيٍ نُن قَرِ سّنِيٍ نَشَ يُوِقِيٍ شَ كِيتِسَ شُنفبٍيٍ مَلَن. عٍ نَشَ عَ قَلَ، «وٌن مُنسٍ رَبَمَ؟ يِ شّمّ نَ كَابَنَكٌ فبٍفبٍ نَن نَبَقٍ. 
شَ وٌن عَ لُ عَ يّتّ يِ، بِرِن دَنشَنِيَمَ نّ عَ مَ، رْ مَكَيٍ قَن قَمَ وٌن مَ هْرْ مْبَنشِ كَنَدٍ، عٍ وٌن سِ سْنتْ!» 
عٍ شَ سّرّشّدُبّ كُنتِفِ كَيَقَ، نَشَن نُ نَ عٍ شُنيِ رَ نَ وَشَتِ، عَ نَشَ عَ قَلَ عٍ بّ، «وٌ تَن مُ سٍسٍ كٌلٌن يِ قٍ كُي. 
كَ وٌ مُ عَ قَهَامُشِ عَ مِشِ كٍرٍن قَشَقٍ حَمَ بّ، نَ نَن قَن وٌ بّ، دِنّ وٌن سِ بِرِن شَ سْنتْ؟» 
كَيَقَ شَ نَ وْيّنيِ مُ قَتَن عَ تَن يّتّ شَ رَ. عَ تٌ نُ قِندِشِ نَ وَشَتِ سّرّشّدُبّ كُنتِفِيٍ شُنيِ رَ، عَلَ نَن نَ مَسٍنيِ قِ عَ مَ، عَ عِسَ نُ قَقٍ قَشَدٍ عِسِرَيِلَ حَمَ بّ. 
كْنْ نَ مَن مُ رَبَ عِسِرَيِلَكَيٍ فبَنسَن شَ بّ. عِسَ نُ قَقٍ قَشَدٍ نّ عَلَكٌ عَلَ شَ عَ شَ دِيٍ قَن مَلَن، نَشٍيٍ رَيٍنسٍنشِ يِرٍ بِرِن، عَ شَ عٍ بِرِن قِندِ حَمَ كٍرٍن نَ. 
نَ كُي، كَبِ نَ مَلَنيِ لْشْي، يُوِقِ كُنتِفِيٍ نَشَ نَتّ تٌنفٌ عِسَ قَشَقٍ رَ. 
نَ نَن عَ رَ عِسَ مُ نْ مِنِدٍ كّنّ مَ سْنْن. عَ تَن نُن عَ قْشِرَبِرّيٍ نَشَ كٍلِ نَا، عٍ سِفَ عٍقِرَ مِ تَا كُي فبٍنفبٍرٍنيِ قّ مَ. 
يُوِقِيٍ شَ سَيَمَلٍكّ دَنفِ سَلِ تٌ نُ بَرَ مَكْرّ، مِشِ فبٍفبٍ نَشَ كٍلِ دَاشَيٍ تٍقٍ رَ دَرِ سَلَمُ، عٍ شَ عٍ يّتّ رَ سّنِيّن بٍينُن سَلِ شَ عَ لِ. 
عٍ نُ نَ عِسَ قٍنقٍ. عٍ نَشَ عٍ بٌرٍ مَشْرِن هْرْ مْبَنشِ تّتّ كُي، «وٌ شَ مَحْشُنيِ مَ، عِسَ قَمَ سَلِدٍ، كَ عَ مُ قَمَ؟» 
سّرّشّدُبّ كُنتِفِيٍ نُن قَرِ سّنِيٍ نُ بَرَ يَامَرِ قِ، عَ مِشِ يٌ نَشَن نَ عِسَ تٌ، نَ كَنيِ شَ عَ قَلَ عٍ بّ عَلَكٌ عٍ شَ عَ سُشُ.