تَرُشُي.
8.
نَ لْشْي، حَشَنكَتّ شُنفبٍ نَشَ دَرِ سَلَمُ دَنشَنِيَتْي حَمَ سُشُ. عٍ بِرِن نَشَ يٍنسٍن سَمَرِ نُن يُدَيَ بْشِ مَ قٌ شّيرَيٍ، نٍيٍ نَن فبَنسَن لُ نَا. 
شّمّ تِنشِنشِيٍ نَشَ عٍتِيّن نَفَتَ. عٍ نَشَ وَ عَ شَ قَشّ مَ. 
كْنْ سْلُ تَن نَشَ دَنشَنِيَتْي حَمَ تْورْ. عَ نُ سٌمَ بَنشِيٍ كُي، عَ نُ دَنشَنِيَتْي شّمّيٍ نُن فِنّيٍ رَ مِنِ، عَ نُ قَ عٍ سَ فٍيلِ. 
دَنشَنِيَتْي تٌ يٍنسٍن يّ، عٍ نَشَ شِبَارُ قَنيِ كَوَندِ تِ يِرٍ بِرِن. 
قِلِثُ تٌ فٌرٌ سَمَرِ تَا ندٍ كُي، عَ نَشَ عَلَ شَ مِشِ سُفَندِشِ شَ قٍ مَسٍن نَاكَيٍ بّ. 
حَمَ تٌ قِلِثُ شَ كَابَنَكٌييٍ تٌ، عٍ نَشَ عٍ تُلِ مَتِ عَ رَ عَ قَنيِ رَ. 
حِننّيٍ نَشَ فبِلٍن قُرٍ مَيٍ قْشْ رَ، عٍ نُ قَ فبٍلٍفبٍلٍ. مَبّنيِ نُن نَمَتّ وُيَشِ نَشَ يَلَن. 
نَاكَيٍ نَشَ سّيوَ عَ قَنيِ رَ. 
شّمّ ندٍ نُ نَ نَ تَا كُي نَشَن شِلِ سِمْن. عَ نُ دُورٍيَ رَبَمَ نَشَن سَمَرِكَيٍ بِرِن نَكَابَمَ، عَ نُ قَ عَ يّتّ عِفبٌ. 
عٍ بِرِن، دِ مّدِيٍ نُن قٌرِيٍ، عَ شُي رَ مّشِ عَ قَنيِ رَ. عٍ نُ عَ قَلَ، «يِ شّمّ عَلَ سّنبّ نَ عَ رَ، وٌن نَشَن شِلِ قَلَمَ سّنبّ شُنفبٍ.» 
عٍ نُ بَرَ بِرَ عَ قْشْ رَ كَبِ عَ شْننَكُيٍ بَرِ مَ عَ نُ عٍ رَكَابَمَ عَ شَ دُورٍيَ رَ. 
كْنْ عٍ تٌ لَ قِلِثُ رَ، نَشَن عَلَ شَ مَنفّيَ نِينِ نُن عِسَ عَلَ شَ مِشِ سُفَندِشِ شَ شِبَارُ قَنيِ كَوَندِ رَبَمَ، شّمّيٍ نُن فِنّيٍ نَشَ عٍ شُنشَ يٍ شْورَ. 
سِمْن يَتِ نَشَ دَنشَنِيَ، عَ قَن نَشَ عَ شُنشَ يٍ شْورَ. عَ نَشَ بِرَ قِلِثُ قْشْ رَ. عَ نَشَ كَابَ عَ شَ تْنشُمَيٍ نُن كَابَنَكٌ شُنفبٍيٍ مَ. 
شّيرَيٍ، نَشٍيٍ نُ نَ دَرِ سَلَمُ، عٍ تٌ عَ مّ سَمَرِكَيٍ بَرَ تِن عَلَ شَ مَسٍنيِ رَ، عٍ نَشَ ثِيّرِ نُن يَيَ شّي نَا. 
عٍ تٌ سٌ نَا، عٍ نَشَ عَلَ مَشَندِ عَلَكٌ سَمَرِكَيٍ شَ عَلَ شَشِلِ سّنِيّنشِ سْتْ، 
بَرِ مَ عَلَ شَشِلِ سّنِيّنشِ مُ نُ فٌرٌشِ مِشِ يٌ مَ عٍ يَ مَ سِندٍن. عٍ نُ شُنشَشِ يٍ نَن فبَنسَن شْورَ عِسَ شِلِ شَ قٍ رَ. 
عَوَ، ثِيّرِ نُن يَيَ نَشَ عٍ بّلّشّ سَ عٍ مَ، عٍ نَشَ عَلَ شَشِلِ سّنِيّنشِ سْتْ. 
سِمْن تٌ عَ تٌ عَلَ شَشِلِ سّنِيّنشِ نُ سْتْمَ شّيرَيٍ بّلّشّيٍ نَن سَابُي رَ، عَ نَشَ كْبِرِ مَسٍن عٍ بّ، عَ قَ عَ قَلَ، 
«وٌ يِ سّنبّ قِ ﭑ قَن مَ، عَلَكٌ ﭑ نَ ﭑ بّلّشّيٍ سَ نَشَن مَ، عَ شَ عَلَ شَشِلِ سّنِيّنشِ سْتْ.» 
ثِيّرِ نَشَ عَ يَابِ، «عِ تَن نُن عِ شَ كْبِرِ شُن شَ رَكَنَ، بَرِ مَ عِ عَ مَحْشُنشِ نّ عَلَ شَ كِ سْتْمَ كْبِرِ نَن نَ. 
عِ فبٍ يٌ مُ نَ يِ قٍ يَ مَ، بَرِ مَ عِ سٌندٌنيِ مُ قِيشّشِ عَلَ بّ. 
فبِلٍن يِ قٍ حَاشِ قْشْ رَ. عِ مَن شَ مَرِفِ مَشَندِ عَلَكٌ عَ شَ دِحّ عِ مَ عِ شَ يِ مَحْشُنيِ شَ قٍ رَ، شَ عَ سَ تِنمَ. 
ﭑ عَ تٌشِ نّ يِ كِ، عِ نَ قٍ حَاشِ فبٍفبٍ كُي. عِ بَرَ قِندِ سٍنتَنّ شَ كٌنيِ رَ.» 
سِمْن نَشَ عَ يَابِ، «وٌ يّتّ شَ مَرِفِ مَشَندِ ﭑ بّ عَلَكٌ وٌ قٍ نَشٍيٍ بِرِن قَلَشِ عَ نَشَ ﭑ لِ.» 
عٍ تٌ فّ سٍيدٍحْشْيَ بَدٍ مَرِفِ شَ مَسٍنيِ رَ، ثِيّرِ نُن يَيَ نَشَ فبِلٍن دَرِ سَلَمُ. كِرَ قَن نَ، عٍ نَشَ شِبَارُ قَنيِ كَوَندِ تِ سَمَرِ تَا وُيَشِ كُي. 
مَرِفِ شَ مَلٍكّ نَشَ عَ قَلَ قِلِثُ بّ، «كٍلِ، سِفَ يِرٍقَنيِ بِرِ رَ، فبٍنفبٍرٍن كِرَ شْن، نَشَن فٌرٌ مَ فَسَ، كٍلِقٍ دَرِ سَلَمُ.» 
عَ نَشَ كٍلِ، عَ نَشَ عٍتِيٌثِكَ ندٍ لِ كِرَ رَ. شّمّ نَن نُ عَ رَ نَشَن مُ نُ نْمَ فِنّ قٍ رَبَدٍ. عَ قِندِشِ كَندَ سِ، عٍتِيٌثِ مَنفّ فِنّ شُنمَتِ نَن نَ. عَ تَن نَن نُ عَ شَ نَاقُلِ بِرِن كَنتَمَ. عَ نُ قَشِ سَلِدٍ نّ دَرِ سَلَمُ. 
عَ نَ فبِلٍنقٍ عَ شْنيِ، عَ دْشْشِ عَ شَ مَحّرّ سٍ كُي، عَ نَ عَننَبِ عٍسَيِ شَ كِتَابُي شَرَنقٍ. 
عَلَ شَشِلِ سّنِيّنشِ نَشَ عَ مَسٍن قِلِثُ بّ، «سِفَ، عِ عِ مَكْرّ نَ مَحّرّ سٍ رَ.» 
قِلِثُ نَشَ سِفَ عَ فِ رَ. عَ نَشَ عٍتِيٌثِكَ شُي مّ، عَ نُ عَننَبِ عٍسَيِ شَ كِتَابُي شَرَنقٍ. عَ نَشَ عَ مَشْرِن، «عِ نَشَن شَرَنقٍ يِ كِ، عِ عَ قَهَامُشِ؟» 
عَ نَشَ عَ يَابِ، «ﭑ نْمَ نَ رَ دِ، شَ مِشِ يٌ مُ نَ نَشَن عَ تَفِ رَبَمَ ﭑ بّ؟» عَ نَشَ عَ قَلَ قِلِثُ بّ عَ شَ دْشْ عَ سّيتِ مَ. 
عَ نُ نَ يِ سّبّلِ نَن شَرَنقٍ كِتَابُي كُي؛ «عٍ عَ شَنِنشِ تّمُي نَشّ عَ شَ قَشَ عَ نَشَ لُ عَلْ يّشّي نَشَن شَنِنمَ قَشَدٍ. عَ مُ عَ شُي يٌ رَ مِنِ، عَلْ يّشّي نَشَن تِمَ عَ شَبٍ مَشَبَمَ يَ رَ. 
عَ شَ مَرَيَافِ كُي، عٍ نَشَ عَ مَكِيتِ سّرِيّ شَنبِ. ندٍ نْمَ عَ شَ تَرُشُي قَلَدٍ؟ عَ شَ سِمَيَ بَرَ حْن بْشِ قَرِ.» 
نَ عٍتِيٌثِكَ نَشَ عَ قَلَ قِلِثُ بّ، «يَندِ، عَ مَسٍن ﭑ بّ، عَننَبِ عٍسَيِ ندٍ شَ قٍ قَلَمَ يِ كِ؟ عَ يّتّ بَ، كَ مِشِ فبّتّ؟» 
عَوَ، قِلِثُ نَشَ عَ قْلْ نَ سّبّلِ مَ، عَ نَشَ عَ كَوَندِ عِسَ شَ شِبَارُ قَنيِ رَ. 
عٍ نَ سِفَقٍ كِرَ شْن، عٍ نَشَ يٍ لِ. نَ عٍتِيٌثِكَ نَشَ عَ قَلَ قِلِثُ بّ، «يٍ نَن يَ. نَنسٍ عَ نِيَمَ ﭑ مُ شُنشَمَ يٍ شْورَ؟» 
قِلِثُ نَشَ عَ يَابِ، «شَ عِ دَنشَنِيَ عِ بْحّ بِرِن نَ، عِ نْمَ نَ رَ.» نَ عٍتِيٌثِكَ نَشَ عَ يَابِ، «ﭑ لَشِ عَ رَ، عَلَ شَ دِ نَن لَنشِ عِسَ مَ.» 
عَ نَشَ مَحّرّ سٍ رَتِ، عٍ قِرِن بِرِن نَشَ فٌرٌ يٍ مَ. قِلِثُ نَشَ نَ عٍتِيٌثِكَ شُنشَ يٍ شْورَ. 
عٍ تٌ تٍ يٍ شْورَ، مَرِفِ شَشِلِ نَشَ قِلِثُ تٌنفٌ، عَ عَ شَنِن. نَ عٍتِيٌثِكَ مُ قَ عَ تٌ سْنْن. عَ نَشَ سِفَ سّيوّ كُي. 
قِلِثُ نَشَ مِنِ عَسٌتُ تَا كُي. عَ مَن نَشَ سِفَ سٍسَرٍ. عَ نَشَ شِبَارُ قَنيِ كَوَندِ تِ تَا بِرِن كُي عَ نُ دَنفِمَ دّننَشّ.