تَرُشُي.
15.
مِشِ ندٍيٍ نَشٍيٍ كٍلِ يُدَيَ، عٍ نَشَ عَ قَلَ عِسَ قْشِرَبِرّيٍ بّ، «شَ وٌ مُ وٌ سُننَ عَننَبِ مُنسَ شَ نَامُنيِ كِ مَ، وٌ مُ نْمَ كِسِدٍ.» 
ثْلُ نُن بَرَنَبَسِ نَشَ وْيّنيِ شْرْشْي قَلَ عٍ بّ. عٍ نَشَ نَتّ تٌنفٌ ثْلُ نُن بَرَنَبَسِ نُن مِشِ ندٍيٍ شَ تٍ دَرِ سَلَمُ شّيرَيٍ نُن كُنتِفِيٍ مَشْرِندٍ يِ قٍ مَ. 
دَنشَنِيَتْي حَمَ نَشَ عٍ شّي. عٍ دَنفِشِ قٍنِسِيَ نُن سَمَرِ رَ تّمُي نَشّ، عٍ نَشَ عَ مَسٍن مّننِكَيٍ بّ، مِشِ نَشٍيٍ كٍلِشِ سِ فبّتّيٍ مَ، نٍيٍ دَنشَنِيَشِ كِ نَشّ. يِ مَسٍنيِ نَشَ عِسَ قْشِرَبِرّيٍ رَحّلّشِن. 
عٍ تٌ سٌ دَرِ سَلَمُ، دَنشَنِيَتْي حَمَ نُن شّيرَيٍ، نُن كُنتِفِيٍ نَشَ عٍ رَ سّنّ. عَلَ نَشَن بِرِن نَبَ عٍ سَابُي رَ، عٍ نَشَ نَ يَبَ عٍ بّ. 
عَوَ، قَرِ سّنِ ندٍ نَشٍيٍ نُ بَرَ دَنشَنِيَ، عٍ نَشَ كٍلِ، عٍ نُ قَ عَ قَلَ، عَ لَنمَ نّ سِ فبّتّ مِشِيٍ شَ سُننَ، عٍ شَ بِرَ عَننَبِ مُنسَ شَ سّرِيّ قْشْ رَ. 
شّيرَيٍ نُن كُنتِفِيٍ نَشَ عٍ مَلَن عٍ شَ نَ قٍ مَتٌ. 
عٍ تٌ نَ قٍ عِسْنشْ سْنشْ، ثِيّرِ نَشَ كٍلِ، عَ عَ قَلَ عٍ بّ، «ﭑ نفَشَكٍرٍنيِيٍ، وٌ عَ كٌلٌن كَقِ تّمُي شْنكُيٍ عَلَ بَرَ ﭑ سُفَندِ وٌ تَفِ، عَلَكٌ سِ فبّتّ مِشِيٍ شَ شِبَارُ قَنيِ مّ ﭑ دّ رَ، عٍ شَ دَنشَنِيَ. 
عَوَ، عَلَ نَشَن مِشِ سٌندٌنيِ كٌلٌن، نَ بَرَ سٍيدٍيَ رَبَ عٍ بّ، عَ عَ شَشِلِ سّنِيّنشِ قِ عٍ مَ عَلْ وٌن تَن. 
عَ مُ مِشِ يٌ رَقِسَ عَ بٌورٍ بّ عٍ تَن نُن وٌن تَن تَفِ، بَرِ مَ عَ بَرَ عٍ سٌندٌنيِ رَ سّنِيّن دَنشَنِيَ رَ. 
يَكْسِ، مُنقٍ رَ وٌ عَلَ مَتٌمَ؟ وٌ نَ كٌتٍ دْشْقٍ عِسَ قْشِرَبِرّيٍ شُن، وٌن بٍنبَيٍ نُن وٌن تَن مُ نَشَن نْمَ. 
وٌ شَ عَ كٌلٌن عَ وٌن نَكِسِشِ مَرِفِ عِسَ شَ هِننّ نَن نَ عَلْ عٍ تَن قَن.» 
حَمَ بِرِن نَشَ دُندُ، عٍ نَشَ عٍ تُلِ مَتِ ثْلُ نُن بَرَنَبَسِ رَ. ثْلُ نُن بَرَنَبَسِ نَشَ عَ تَفِ رَبَ بٌورٍيٍ بّ عَلَ كَابَنَكٌي نُن تْنشُمَيٍ نَشٍيٍ بِرِن نَبَ عٍ سَابُي رَ سِ فبّتّيٍ تَفِ. 
عٍ تٌ فّ وْيّندٍ، يَكِ نَشَ وْيّنيِ تٌنفٌ، عَ نَشّ، 
«ﭑ نفَشَكٍرٍنيِيٍ، وٌ وٌ تُلِ مَتِ ﭑ نَ. سِمْن بَرَ عَ يَبَ عَلَ مِشِيٍ سُفَندِ مَ كِ نَشّ سِيٍ يَ مَ، عَ شِلِ سَمَ نَشٍيٍ شُن مَ. 
نَمِحْنمّيٍ بِرِن شَ مَسٍنيِ لَنشِ نَ نَن مَ. عَ سّبّشِ، 
‹نَ شَنبِ ﭑ قَمَ نّ دَوُدَ شَ بَنشِ بِرَشِ رَكٍلِدٍ. ﭑ نَ يِرٍ كَنَشِيٍ رَقَلَمَ نّ، ﭑ نَ رَكٍلِمَ نّ، 
عَلَكٌ مِشِ نَشٍيٍ لُشِ عٍ شَ نْ مَرِفِ قٍندٍ، سِ فبّتّ نَشٍيٍ بِرِن قِندِ مَ ﭑ فبٍ رَ. 
مَرِفِ شَ مَسٍنيِ نَن نَ كِ، نَشَن يِ قٍ كٌلٌن كَبِ عَ قْلّ، نَشَن يِ قٍ بِرِن نَفِرِ مَ.›» 
«نَ نَ عَ رَ، عَ مُ لَنمَ عَ شَ قِندِ قٍ شْرْشْي رَ سِ فبّتّيٍ بّ نَشٍيٍ وَ مَ بِرَقٍ عَلَ قْشْ رَ. 
كْنْ وٌن شَ بَتَاشّ سّبّ عٍ مَ، عٍ نَشَ سٍيٍ دٌن نَشٍيٍ بَشِ سّرّشّ رَ كُيٍيٍ بّ. عٍ مَن شَ بَ يّنّ مَ، عَ نُن عٍ نَشَ سُبٍ يُقَشِ دٌن، عٍ مَن نَشَ وُلِ مِن. 
بَرِ مَ كَبِ وٌن بٍنبَيٍ شَ وَشَتِ، مِشِيٍ نَ تَا بِرِن كُي، نَشٍيٍ عَننَبِ مُنسَ شَ سّرِيّ شَرَنمَ سَلِدٍيٍ كُي مَلَبُ لْشْي.» 
عَوَ، شّيرَيٍ نُن كُنتِفِيٍ نُن دَنشَنِيَتْي حَمَ بِرِن نَشَ لَن عَ مَ عٍ شَ مِشِ ندٍيٍ شّي عَنتِيْكِ، نَشٍيٍ ثْلُ نُن بَرَنَبَسِ مَتِمَ. عٍ نَشَ يُدَ سِ نَشَن شِلِ بَرَ سَبَ، نُن سِلَسِ سُفَندِ، شّمّ بِنيٍيٍ نفَشَكٍرٍنيِيٍ يَ مَ. 
عٍ نَشَ بَتَاشّ كٍرٍن سٌ عٍ يِ رَ نَشَن سّبّشِ، «شّيرَيٍ نُن كُنتِفِيٍ، نَشٍيٍ لَنشِ وٌ نفَشَكٍرٍنيِيٍ مَ، كَتَرَبِ وٌن نفَشَكٍرٍنيِيٍ مَ سِ فبّتّيٍ يَ مَ، نَشٍيٍ نَ عَنتِيْكِ، سِرِيَ، نُن سِلِسِ، مُشُ بَرَ وٌ شّيبُ. 
مُشُ بَرَ عَ مّ عَ مِشِ ندٍيٍ نَشٍيٍ كٍلِشِ مُشُ يَ مَ، مُشُ مُ حُنفُي سَشِ نَشٍيٍ مَ، عَ نٍيٍ بَرَ وٌ رَكْنتْقِلِ عٍ شَ وْيّنيِ رَ. عٍ بَرَ وٌ بْحّ عِقُ.» 
«نَ نَ عَ رَ، مُشُ بَرَ لَن عَ مَ مُشُ شَ شّيرَيٍ شّي وٌ مَ، سَ ثْلُ نُن بَرَنَبَسِ قَرِ، مُشُ شَنُنتٍنيِيٍ، 
نَشٍيٍ بَرَ مّي عٍ نِي رَ وٌن مَرِفِ عِسَ شَ قٍ رَ، عَلَ شَ مِشِ سُفَندِشِ. 
مُشُ بَرَ يُدَ سِ نُن سِلَسِ قَن شّي، نَشٍيٍ يِ قٍيٍ تَفِ رَبَمَ وٌ بّ. 
عَلَ شَشِلِ سّنِيّنشِ نُن مُشُ تَن بَرَ لَن عَ مَ مُشُ نَشَ كٌتٍ فبّتّ دْشْ وٌ شُن قٌ نَشَن دَشَ. 
عَ تَن نَن يِ كِ؛ وٌ نَشَ سُبٍ دٌن نَشَن بَشِ سّرّشّ رَ كُيٍيٍ بّ، نُن سُبٍ يُقَشِيٍ، وٌ نَشَ وُلِ قَن مِن. وٌ مَن نَشَ يّنّ قَن نَبَ. وٌ لَن وٌ شَ فبِلٍن يِ قٍ بِرِن قْشْ رَ. وٌ سَلَمُ.» 
عَوَ، عٍ تٌ بَرَ عٍ حُنفُ حَمَ مَ، عٍ نَشَ سِفَ عَنتِيْكِ، عٍ نَشَ سَ بَتَاشّ سٌ دَنشَنِيَتْي حَمَ يِ رَ. 
نفَشَكٍرٍنيِيٍ تٌ عَ شَرَن، عٍ نَشَ حّلّشِن، عٍ نَشَ لِمَنِيَ. 
يُدَ سِ نُن سِلَسِ، نَشٍيٍ يَتِ نُ قِندِشِ نَمِحْنمّيٍ رَ، عٍ نَشَ عٍ كَوَندِ، عٍ نُ عٍ رَلِمَنِيَ وْيّن وُيَشِ رَ. 
وَشَتِ ندٍ تٌ دَنفِ، عٍ نفَشَكٍرٍنيِيٍ نَشَ عٍ بّحِن بْحّسَ كُي فبِلٍنقٍ عٍ شّيمَيٍ مَ. 
كْنْ سِلَسِ تَن نَشَ لُ نَا. 
ثْلُ نُن بَرَنَبَسِ نَشَ لُ عَنتِيْكِ، عٍ نُن عٍ بٌورٍ وُيَشِ عٍ نُ قَ مِشِيٍ شَرَن، عٍ مَن نُ مَرِفِ شَ شِبَارُ قَنيِ كَوَندِ تِ. 
لْشْي ندٍيٍ تٌ دَنفِ، ثْلُ نَشَ عَ قَلَ بَرَنَبَسِ بّ، «وٌن شَ فبِلٍن تَا بِرِن كُي وٌن مَرِفِ شَ مَسٍنيِ كَوَندِشِ دّننَشّ، وٌن شَ عَ مَتٌ وٌن نفَشَكٍرٍنيِيٍ دَنشَنِيَتْييٍ نَ كِ نَشّ نَا.» 
بَرَنَبَسِ نُ وَ مَ يَيَ قَن شَنِنقٍ، نَشَن شِلِ مَرَكِ. 
كْنْ ثْلُ نَشَ عَ قَلَ عَ مُ لَن عٍ شَ مِشِ شَنِن عٍ شُن مَ نَشَن كٍلِ عٍ شُن مَ ثَنقِلِيَ، عَ مُ تِن بِرَدٍ عٍ قْشْ رَ عٍ شَ وَلِ كُي. 
نَ لَنتَرٍيَ نَشَ شْرْشْ هَن عَ نَشَ قِندِ قَتَنيِ رَ. بَرَنَبَسِ نَشَ مَرَكِ تٌنفٌ، عٍ نَشَ بَكِ كُنكُي كُي سِفَقٍ رَ سِثِرِ سُرِ مَ. 
عٍ نفَشَكٍرٍنيِيٍ تٌ عٍ تَشُ مَرِفِ شَ هِننّ رَ، ثْلُ نَشَ سِلَسِ تٌنفٌ، عٍ نَشَ سِفَ 
سِرِيَ نُن سِلِسِ بْشِيٍ مَ، عٍ دَنشَنِيَتْي حَمَيٍ رَلِمَنِيَ.