تَرُشُي.
17.
ثْلُ نُن سِلَسِ تٌ دَنفِ عَنقِثٌلِ نُن عَثٌلٌنِيَ رَ، عٍ نَشَ سٌ تّسَلٌنِكِ تَا كُي، يُوِقِيٍ شَ سَلِدٍ ندٍ نُ نَ دّننَشّ. 
ثْلُ نَشَ سٌ نَا عَلْ عَ دَرِشِ نَشَن نَ. مَلَبُ لْشْي شِ سَشَن بُن مَ، عٍ نُن ثْلُ نَشَ كِتَابُي شَ قٍ قَلَ. 
عَ نُ عَ تَفِ رَبَ عٍ بّ عَ عَ لَنمَ عَلَ شَ مِشِ سُفَندِشِ شَ تْورْ كِ نَشّ، عَ مَن شَ كٍلِ قَشّ مَ. عَ نَشَ عَ قَلَ، «عِسَ، ﭑ نَشَن مَ قٍ قَلَقٍ وٌ بّ يِ كِ، عَ تَن نَن عَلَ شَ مِشِ سُفَندِشِ رَ.» 
ندٍيٍ نَشَ لَ عَ رَ عٍ يَ مَ. عٍ نَشَ بِرَ ثْلُ نُن سِلَسِ قْشْ رَ. فِرّكِكَ فبٍفبٍ قَن نَشٍيٍ نُ فَاشُشِ عَلَ يَ رَ، نٍيٍ قَن نَشَ لَ عَ رَ، عٍ نُن فِنّ هَفِفّ فبٍفبٍ. 
كْنْ يُوِقِ تْونّشِ ندٍيٍ نَشَ مِشِ حَاشِ ندٍيٍ تٌنفٌ عٍ شَ حَمَ يَ عِسٌ تَا كُي. عٍ نَشَ سِفَ يَسٌن شْنيِ ثْلُ نُن سِلَسِ قٍندٍ عَلَكٌ عٍ شَ عٍ شَنِن كِيتِسَيٍ شْن مَ. 
عٍ تٌ مُ عٍ تٌ، عٍ نَشَ يَسٌن نُن عَ نفَشَكٍرٍنيِيٍ ندٍيٍ مَبّندُن نَ تَا كِيتِسَيٍ يِرٍ. عٍ نُ سْنشْي رَتٍ، عٍ نَشّ، «يِ مِشِيٍ نَشٍيٍ دُنِحَ عِقُمَ، عٍ بَرَ قَ بٍ قَن. يَسٌن بَرَ عٍ يِفِيَ. 
عٍ بِرِن رْ مَكَ مَنفّ شَ وْيّنيِ نَن فبٍسٍن بَمَ، عٍ مَن عَ قَلَمَ عَ مَنفّ فبّتّ ندٍ نَ نَشَن شِلِ عِسَ.» 
عٍ نَشَ حَمَ نُن كِيتِسَيٍ بْحّ رَتٍ نَ وْيّنيِيٍ رَ. 
بٍينُن عٍ شَ يَسٌن نُن عَ بٌورٍيٍ بّحِن، قٌ عٍ تٌ كْبِرِ بَ. 
نَ كْي رَ، عٍ نفَشَكٍرٍنيِيٍ نَشَ ثْلُ نُن سِلَسِ رَ سِفَ بٍيرٍ تَا. عٍ تٌ سٌ نَا، عٍ نَشَ سٌ يُوِقِيٍ شَ سَلِدٍ كُي. 
نَ يُوِقِيٍ شَشِلِ نُ مَتِنسٍ دَنفِ تّسَلٌنِكِكَيٍ رَ. عٍ حَن فبَتَ نّ نَ مَسٍنيِ كٌلٌندٍ، عٍ مَن كِتَابُي كُي مَتٌ لْشْ يٌ لْشْ عَلَكٌ عٍ شَ عَ كٌلٌن عٍ نَشَن قَلَمَ عٍ بّ شَ نْندِ يَتِ نَن عَ رَ. 
يُوِقِ وُيَشِ نَشَ دَنشَنِيَ عٍ يَ مَ، نُن فِرّكِكَ فِنّ فٌرٌبٌنّ وُيَشِ، نُن شّمّ وُيَشِ. 
كْنْ يُوِقِيٍ تّسَلٌنِكِكَيٍ تٌ عَ كٌلٌن عَ ثْلُ نَ عَلَ شَ وْيّنيِ كَوَندِقٍ بٍيرٍ تَا قَن، عٍ نَشَ قَ نَا، عٍ قَ حَمَ يَ عِسٌ. 
عَوَ، دَنشَنِيَتْييٍ نَشَ ثْلُ تٌنفٌ كٍرٍن نَ، عٍ نَشَ سِفَ عَ رَ بَا قّ مَ، كْنْ سِلَسِ نُن تِمٌتٍ نَشَ لُ بٍيرٍ تَا. 
نَشٍيٍ ثْلُ مَتِ، عٍ نَشَ سِفَ عَ رَ هَن عَتّن. نَ شَنبِ عٍ نَشَ فبِلٍن عٍ حُنفُي رَ سِلَسِ نُن تِمٌتٍ شْن مَ، عٍ شَ ثْلُ لِ سِننَنيِ مَ عَتّن. 
ثْلُ نُ سِلَسِ نُن تِمٌتٍ مَمّقٍ عَتّن. عَ بْحّ نَشَ مَحَاشُ عَ رَ نَ تَا شَ كُيٍيٍ شَ قٍ رَ. 
نَ كُي، عَ نَشَ دّ مَسَرَ عٍ نُن يُوِقِيٍ رَ، عَ نُن مِشِيٍ نَشٍيٍ فَاشُشِ عَلَ يَ رَ سَلِدٍ كُي. عَ مَن نَشَ وْيّن مِشِيٍ رَ عَ نَرَلَنمَ نَشٍيٍ رَ مَلَن يِرٍ تَا كُي لْشْ يٌ لْشْ. 
عٍثِكُرِ نُن سِتٌيِسِ كَرَ مْشْيٍ نَشَ سٌ وْيّنقٍ ثْلُ رَ، عٍ نُ عَ قَلَ، «يِ وْيّنلَ مُنسٍ قَلَقٍ؟» ندٍيٍ تٌ ثْلُ شُي مّ عَ عِسَ شَ شِبَارُ مَسٍنمَ، عَ مَن نُ قَ مَرَكٍلِ قٍيٍ قَلَقٍ، عٍ نَشّ، «عَ لُشِ نّ عَلْ عَ عَلَ فبّتّيٍ نَن مَ قٍيٍ قَلَمَ.» 
عَوَ، عٍ نَشَ عَ تٌنفٌ، عٍ نَشَ سِفَ عَ رَ عَرٍيٌثَفٌ مَلَن يِرٍ، عٍ نَشَ عَ مَشْرِن، «يِ لْننِ نّينّ عِ نَشَن مَسٍنمَ، مُشُ نْمَ عَ كٌلٌندٍ دِ؟ 
بَرِ مَ مُشُ قٍ نّينّ نَن مّقٍ يِ كِ، مُشُ وَ مَ نَ قَسَرِ نَن كٌلٌنقٍ.» 
عَتّنكَيٍ نُن شْحّيٍ نَشٍيٍ سَبَتِشِ عَتّن، عٍ نُ دَرِشِ عٍ تُلِ مَتِقٍ رَ وْيّن نّينّ رَ نَشٍيٍ مَسٍنمَ. 
ثْلُ نَشَ تِ عَرٍيٌثَفٌ تَفِ، عَ نَشَ عَ قَلَ، «عَتّنكَيٍ، ﭑ بَرَ عَ تٌ دِينّلَيٍ يَتِ يَتِ نَن وٌ رَ. 
ﭑ بَرَ سٍيٍ تٌ وٌ نَشٍيٍ بَتُمَ. ﭑ مَن بَرَ سّرّشّبَدٍ ندٍ تٌ، عَ سّبّشِ نَشَن مَ، ‹عَلَ نَشَن مُ كٌلٌنشِ!› وٌ نَشَن بَتُمَ، عَ قَ لُ وٌ مُ عَ كٌلٌن، ﭑ نَ نَن مَ قٍ مَسٍنقٍ وٌ بّ. 
عَلَ نَشَن دُنِحَ دَاشِ، عَ نُن سٍ نَشَن بِرِن نَ عَ كُي، عَ تَن نَشَن كٌورٍ نُن بْشِ مَرِفِ رَ، عَ مُ سَبَتِشِ بَنشِ كُي مِشِ بّلّشّ نَشَن نَقَلَشِ. 
عَ هَيِ مُ نَ سٍيٍ مَ عَدَ مَ نَشَن شَنِنمَ عَ شْن مَ. عَ تَن نَن بَلٌي نُن حّنفِ نُن سٍ بِرِن قِمَ مِشِ مَ. 
عَ تَن نَن عَ نِيَ مِشِ بِرِن شَ مِنِ بٍنبَ كٍرٍن قَتٍ. عَ نَشَ عٍ رَ سَبَتِ بْشِ بِرِن مَ. عَ مَن نَشَ عٍ شَ وَشَتِ نُن عٍ لُدٍ نَانِنيِيٍ سَ، 
عَلَكٌ عٍ شَ عَلَ قٍن، عٍ شَ كَتَ عَ كٌلٌندٍ، هَلِ عَ تٌ مُ مَكُيَ وٌن نَ. 
وٌ شَ لْننِلَيٍ يَتِ قَن بَرَ عَ قَلَ، ‹وٌن بَلٌشِ عَ تَن نّ، وٌن قٍ بِرِن نَبَمَ عَ تَن نَن سَابُي رَ، نُن وٌن مِنِشِ عَ تَن نّ. عَ بْنسْي نَن وٌن نَ.› 
عَوَ شَ وٌن كٍلِشِ عَ بْنسْي نّ، عَ مُ لَنمَ وٌن شَ عَ مَحْشُن عَ عَلَ مَنِيَشِ شّيمَ، فبٍتِ، شَ نَ مُ فّمّ نَن نَ، مِشِ بّلّشّ نَشَن سٌلِشِ عٍ شَشِلِ رَ. 
عَلَ مُ نُ نَ قٍ كٌلٌنتَرٍيَ تّمُي مَتٌشِ، كْنْ يَكْسِ عَ بَرَ عَ قَلَ مِشِ بِرِن بّ، يِرٍ بِرِن، عٍ شَ تُوبِ، 
بَرِ مَ عَ بَرَ لْشْي كٍرٍن سُفَندِ، عَ قَمَ دُنِحَ مَكِيتِدٍ نَشَن مَ تِنشِنيِ رَ، مِشِ ندٍ سَابُي رَ عَ بَرَ عَ رَفِرِ نَشَن مَ. عَ بَرَ نَ كَنيِ مَتْنشُمَشِ رَكٍلِ قَشَمِشِيٍ يَ مَ.» 
عٍ تٌ يِ قٍ مّ، قَ عَ قَلَ مِشِ كٍلِمَ قَشّ مَ، ندٍيٍ نَشَ سٌ عَ مَيٍلٍقٍ. ندٍيٍ نَشَ عَ قَلَ، «مُشُ قَمَ مُشُ تُلِ مَتِدٍ عِ رَ لْشْي فبّتّ.» 
عَوَ، ثْلُ نَشَ مِنِ عٍ يَ مَ. 
ندٍيٍ نَشَ لُ عَ مَبِرِ رَ، عٍ نَشَ دَنشَنِيَ، عَلْ دٍنِسِيٌ، نَشَن نُ نَ عَرٍيٌثَفٌ مِشِيٍ يَ مَ، نُن فِنّ ندٍ نَشَن شِلِ دَ مَرِ سِ، عٍ نُن مِشِ فبّتّيٍ رَ.