رْ مَ.
12.
نَ كُي، ﭑ نفَشَكٍرٍنيِيٍ، عَلَ تٌ بَرَ هِننّ وٌ رَ، ﭑ بَرَ وٌ مَشَندِ وٌ شَ وٌ يّتّ بَ سّرّشّ رَ عَلَ بّ، سّرّشّ سّنِيّنشِ نَشَن بَمَ عَ حِحّ رَ، نَشَن نَقَنشِ عَلَ مَ. نَ نَن قِندِ مَ وٌ شَ بَتُي شْرِ رَ. 
وٌ نَشَ وٌ حّرّ يِ دُنِحَ مِشِيٍ حّرّ كِ مَ. وٌ شَ عَ لُ عَلَ شَ وٌ حّرّ كِ قٌرِ مَسَرَ، عَ بْحّ نّينّ نُن شَشِلِ نّينّ قِ وٌ مَ. نَ كُي، وٌ نْمَ نّ عَلَ وَشْنقٍ قَنيِ كٌلٌندٍ، نَشَن عَ كّنّنشِ، نَشَن كَمَلِشِ. 
عَلَ تٌ هِننّ ﭑ نَ، عَ ﭑ قِندِ عَ شَ شّيرَ رَ، ﭑ شَ وٌ رَ سِ؛ وٌ نَشَ وٌ يّتّ سَ يِرٍ، وٌ شَ قٍ مُ دّننَشَندٍ لِشِ. وٌ نَشَ وٌ يّتّ عِفبٌ، وٌ شَ وٌ يّتّ مَتٌ دَنشَنِيَ شَسَبِ نَن مَ، عَلَ بَرَ نَشَن قِ كَنكَن مَ. 
قَتٍ كٍرٍن نَن نَ كَنكَن بّ، كْنْ نَ قَتٍ سَلٌنسٍيٍ وُيَ. قَتٍ سَلٌنسٍ بِرِن نُن عَ فبٍ وَلِ. 
وٌن قَن نَ نَ كِ نّ. هَلِ وٌن تٌ وُيَشِ، وٌن بِرِن بَرَ قِندِ قَتٍ كٍرٍن نَ عَلَ شَ مِشِ سُفَندِشِ سَابُي رَ. وٌن لُشِ نّ عَلْ قَتٍ سَلٌنسٍيٍ نَشٍيٍ قَتُشِ عِسَ قَتٍ رَ وٌن مَن قَتُ وٌن بٌرٍ رَ، وٌن بِرِن قِندِ قَتٍ كٍرٍن نَ. 
عَلَ وٌن كِمَ كِيٍ رَ نَشٍيٍ دْشْ وُيَ. عَ نَ رَبَمَ عَ شَ هِننّ بّرّ نَن مَ عَ بَرَ نَشَن حَنِفٍ كَنكَن بّ. شَ عَ مِشِ ندٍ كِشِ عَ شَ نْ وْيّندٍ عَلَ شِلِ رَ، نَ كَنيِ شَ وْيّن عَلَ شِلِ رَ عَ شَ دَنشَنِيَ شَسَبِ مَ. 
شَ عَ ندٍ كِشِ مِشِ مَلِ وَلِ نَن نَ، نَ كَنيِ شَ مِشِيٍ مَلِ. شَ عَ ندٍ كِشِ مِشِ كَوَندِقٍ نَن نَ، نَ كَنيِ شَ كَوَندِ تِ. 
شَ عَ ندٍ كِشِ مِشِ رَلِمَنِيَقٍ نَن نَ، نَ كَنيِ شَ مِشِيٍ رَلِمَنِيَ. شَ عَ ندٍ قِندِ مِشِ رَ نَشَن كِ تِمَ، نَ كَنيِ شَ مِشِيٍ كِ عَ قَنيِ رَ. شَ عَ ندٍ قِندِ يَرٍرَتِ رَ، عَ كَنيِ شَ نَ رَبَ عَ كِ مَ. شَ عَ ندٍ قِندِ تْورْ مِشِيٍ مَلِمَ رَ، عَ كَنيِ شَ نَ رَبَ سّيوّ رَ. 
وٌ شَ مِشِيٍ شَنُ بْحّ قِيشّ رَ. وٌ شَ قٍ كٌبِ شْن، وٌ شَ قٍ قَنيِ سُشُ وٌ سّنبّ بِرِن نَ. 
وٌ شَ وٌ بٌرٍ شَنُ نفَشَكٍرٍنيَ شَنُنتٍيَ نَن نَ. وٌ شَ وٌ بٌرٍ بِنيَ دَنفِقٍ وٌ يّتّ رَ. 
وٌ تُن نَشَ رَشْنْ، وٌ شَ وٌ تُننَبّشِ. وٌ شَ وَكِلِ وٌ بْحّ بِرِن نَ. وٌ شَ وَلِ وٌ مَرِفِ بّ. 
وٌ شَ سّيوَ قٍ مَ وٌ شَشِلِ تِشِ نَشَن نَ. وٌ شَ دُلُشْتْ وٌ شَ تْورّ كُي. وٌ نَشَ تَفَن عَلَ مَشَندِدٍ. 
وٌ شَ سّنِيّنتْييٍ مَلِ عٍ شَ تْورّ كُي. وٌ شَ شْحّيٍ رَ سّنّ. 
وٌ شَ عَلَ مَشَندِ مِشِيٍ بّ نَشٍيٍ وٌ حَشَنكَتَمَ. وٌ شَ دُبَ عٍ بّ، وٌ نَشَ عٍ دَنكَ. 
وٌ شَ سّيوَ بٌورٍيٍ شَ سّيوّ، وٌ شَ سُننُن بٌورٍ شَ سُننُنيِ. 
وٌ شَ لَن وٌ بٌرٍ مَ. وٌ نَشَ وٌ يّتّ عِفبٌ، يّتّ مَفٌرٍ نَن شَ رَقَن وٌ مَ. وٌ نَشَ وٌ يّتّ مَحْشُن لْننِلَيٍ رَ. 
وٌ نَشَ قٍ كٌبِ حْشْ قٍ كٌبِ رَ. وٌ شَ كَتَ مِشِيٍ شَ وٌ كٌلٌن قٍ قَنيِ رَبَيٍ نَن نَ. 
وٌ شَ وٌ نْ قٍ بِرِن نَبَ عَلَكٌ لَنيِ شَ لُ وٌ نُن مِشِ بِرِن تَفِ. 
ﭑ شَنُنتٍنيِيٍ، وٌ نَشَ وٌ فبٍحْشْ وٌ يّتّ رَ، وٌ شَ نَ لُ عَلَ مَ، بَرِ مَ عَ سّبّشِ كِتَابُي كُي، «عَلَ نَشّ، ﭑ تَن نَن وٌ فبٍحْشْمَ، ﭑ تَن نَن قٍ كٌبِ رَفبِلٍنمَ عَ رَبَمَ مَ.» 
عَ مَن سّبّشِ، «شَ كَامّ نَ عِ يَشُي مَ، عِ شَ عَ كِ دٌنسٍ رَ. شَ يٍ شْلِ نَ عَ مَ، عِ شَ عَ كِ يٍ رَ. نَ كُي عَ لُشِ نّ عَلْ عِ نَ تّ وٌلٍيٍ عِبَفَنقٍ عَ شُنيِ مَ.» 
وٌ نَشَ تِن قٍ كٌبِ شَ نْ وٌ رَ، وٌ تَن نَن شَ قٍ كٌبِ نْ، قٍ قَنيِ رَبَ رَ.