كٌرِنتِ عِ.
14.
شَنُنتٍيَ شَ لُ وٌ بْحّ كُي. وٌ كَتَ وٌ شَ عَلَ شَ كِيٍ سْتْ عَ شَشِلِ سّنِيّنشِ سَابُي رَ. وْيّنقٍ عَلَ شِلِ رَ، وٌ شَ نَ نَن سِنفٍ قٍن. 
مِشِ نَشَن شُي فبّتّيٍ قَلَمَ، عَ مُ وْيّنقٍ عَدَ مَ شَ بّ، عَ وْيّنمَ عَلَ نَن بّ، بَرِ مَ عَدَ مَدِ مُ نَ شُي مْولِ مّمَ. نَ شُي نَشَن قِندِ مَ فُندٌ رَ، عَلَ شَشِلِ نَ نَن قَلَمَ. 
مِشِ نَشَن وْيّنمَ عَلَ شِلِ رَ، عَ تَن قٍ نَن قَلَمَ عَدَ مَدِيٍ بّ نَشَن نْمَ عٍ شَ دَنشَنِيَ رَ سَبَتِدٍ، عَ عٍ رَلِمَنِيَ، عَ سُننُنيِ بَ عٍ مَ. 
كْنْ مِشِ نَشَن وْيّنمَ شُي فبّتّيٍ رَ، عَ عَ يّتّ فبَنسَن نَن مَلِمَ. نَشَن وْيّنمَ عَلَ شِلِ رَ، عَ دَنشَنِيَتْي حَمَ نَن مَلِمَ. 
عَ شْلِ ﭑ مَ وٌ بِرِن شَ شُي فبّتّيٍ قَلَ، كْنْ ﭑ وَ مَ نَشَن شْن دَنفِقٍ نَ رَ، وٌ شَ نْ وْيّندٍ عَلَ شِلِ رَ. نَ نَن تِدٍ فبٌ دَنفِقٍ شُي فبّتّيٍ قَلَقٍ رَ، قٌ نَ شُي فبّتّيٍ شَ مَدَنفِ دَنشَنِيَتْي حَمَ بّ، عَلَكٌ عٍ شَ دَنشَنِيَ شَ سَبَتِ. 
يَكْسِ، ﭑ نفَشَكٍرٍنيِيٍ، شَ عَ سَ لِ ﭑ نَشَ قَ وٌ يِرٍ ﭑ شُي فبّتّيٍ قَلَقٍ رَ وٌ مُ نَشٍيٍ مّمَ، نَ وٌ مَلِمَ دِ؟ كْنْ شَ ﭑ قَ لَامَتُنيِ، كٌلٌنيِ، عَلَ شَ مَسٍنيِ، نُن شَرَنيِ مَسٍندٍ وٌ بّ، نَ نَن قِندِ مَ مُنَقَنيِ رَ وٌ بّ. 
هَلِ شُلٍ نُن كْرَ، سٍ نَشٍيٍ مُ حّنفِمَ، شَ عٍ سِفِ سَ شُي مُ قِيشّ، مِشِ مُ نْمَ عَ كٌلٌندٍ. 
شَ سَرَ شُي مُ قِيشّ، سْورِ فَلِ مُ نْمَ عَ كٌلٌندٍ فٍرٍ وَشَتِ بَرَ عَ لِ. 
وٌ تَن قَن، شَ وٌ شُي قَلَ مِشِيٍ مُ نَشَن كٌلٌن، عٍ قَ قَهَامُي سْتْمَ نَ مَ دِ؟ وٌ وْيّنمَ قُقَقُ. 
شُي وُيَشِ نَن نَ دُنِحَ، كْنْ عٍ بِرِن مَسٍنيِ ندٍ نَن تِمَ. 
شَ مِشِ وْيّن ﭑ بّ شُي ندٍ رَ ﭑ مُ نَشَن كٌلٌن، مُشُ بِرِن بَرَ قِندِ شْحّ رَ مُشُ بٌرٍ بّ. 
نَ كُي، وٌ تَن نَشٍيٍ وَ مَ عَلَ شَ وٌ كِ، وٌ شَ كَتَ عَ شَ وٌ كِ كِ رَ نَشَن دَنشَنِيَتْي حَمَ رَ سَبَتِمَ. 
نَشَن شُي فبّتّيٍ قَلَمَ، عَ شَ عَلَ مَشَندِ عَلَكٌ عَ مَن شَ قَتَ نَ شُي مَدَنفِدٍ عَ بٌورٍيٍ بّ. 
شَ ﭑ سَلِمَ شُي فبّتّيٍ رَ، ﭑ بْحّ سَلِمَ، كْنْ ﭑ سَلِمَ قَهَامُتَرٍحَ نَن كُي. 
عَ لَنمَ ﭑ شَ مُنسٍ رَبَ؟ عَ لَنمَ ﭑ شَ سَلِ ﭑ بْحّ رَ، ﭑ مَن شَ سَلِ قَهَامُي رَ. ﭑ شَ بّيتِ بَ ﭑ بْحّ رَ، ﭑ مَن شَ بّيتِ بَ قَهَامُي رَ. 
شَ نَ مُ عَ رَ، عِ نَ عَلَ تَنتُ عِ بْحّ رَ، مِشِ نَشَن دْشْشِ عِ سّيتِ مَ، عَ مُ نْمَ «عَمِنَ» رَتِندٍ، بَرِ مَ عَ مُ عِ شَ شُي قَهَامُمَ. 
عِ تَنتُي قَنيِ رَ سِفَمَ عَلَ نَن مَ، كْنْ بٌورٍ شَ دَنشَنِيَ مُ نْمَ سَبَتِدٍ نَ سَابُي رَ. 
ﭑ بَرَ عَلَ تَنتُ، بَرِ مَ ﭑ شُي فبّتّيٍ قَلَمَ دَنفِقٍ وٌ بِرِن نَ، 
كْنْ مِشِ وْيّن سُولِ نَشَن قَهَامُمَ، عٍ تِدٍ فبٌ شَرَنيِ كِ مَ دَنفِقٍ وْيّن وُلُ رَ، نَشٍيٍ قَلَشِ شُي فبّتّيٍ دَنشَنِيَتْي حَمَ مُ نَشٍيٍ كٌلٌن. 
ﭑ نفَشَكٍرٍنيِيٍ، وٌ نَشَ وَلِ عَلْ دِ مّدِيٍ، وٌ شَ وَلِ نّ عَلْ كُنتِفِيٍ. قٍ حَاشِ مَ، وٌ شَ لُ عَلْ دِيْرّ فبٍيلِ. كْنْ شَشِلِ مَ، وٌ شَ لُ عَلْ مِشِ مْشِ. 
عَ سّبّشِ كِتَابُي كُي، «مَرِفِ نَشَ عَ مَسٍن، ‹ﭑ قَمَ وْيّندٍ يِ حَمَ بّ شُي فبّتّ رَ نَشَن قَتَنشِ شْحّيٍ رَ، كْنْ هَلِ ﭑ وْيّن نَ كِ، عٍ مُ ﭑ شُي سُشُمَ.›» 
نَ نَن عَ تٌشِ، شُي فبّتّيٍ قَلَقٍ قِندِشِ تْنشُمَ رَ دَنشَنِيَتَرٍيٍ نَن بّ، دَنشَنِيَتْييٍ شَ مُ عَ رَ. كْنْ وْيّنقٍ عَلَ شِلِ رَ، نَ نَن قِندِشِ تْنشُمَ رَ دَنشَنِيَتْييٍ بّ، دَنشَنِيَتَرٍيٍ شَ مُ عَ رَ. 
شَ عَ سَ لِ دَنشَنِيَتْي حَمَ بِرِن نَ يِرٍ كٍرٍن شُي فبّتّيٍ قَلَقٍ رَ، دَنشَنِيَتَرٍ ندٍيٍ نَ سٌ، شَ نَ مُ عَ رَ مِشِ فبّتّ نَشٍيٍ وَ مَ وٌ شَ قٍ رَ مّقٍ، عٍ مُ عَ قَلَمَ شّ عَ وٌ بَرَ دَشُ؟ 
كْنْ شَ وٌ بِرِن نَ وْيّنقٍ عَلَ شِلِ رَ، دَنشَنِيَتَرٍ ندٍ نَ سٌ، شَ نَ مُ عَ رَ مِشِ فبّتّ نَشَن وَ مَ وٌ شَ قٍ رَ مّقٍ، عَ عَ يّتّ كٌلٌنمَ نّ يُنُبِتْي رَ، عَ وٌ شَ مَسٍنيِ كٌلٌن نْندِ رَ، 
عَ فُندٌ بِرِن مَكّنّن. نَ كُي، عَ عَ يّتّ عِفٌرٌ بْشِ، عَ عَلَ بَتُ، عَ عَ قَلَ، «عَلَ يَتِ نَ وٌ يَ مَ.» 
ﭑ نفَشَكٍرٍنيِيٍ، عَ لَنمَ وٌن شَ مُنسٍ رَبَ؟ وٌ نَ وٌ مَلَن، ندٍيٍ شَ بّيتِ بَ، ندٍيٍ شَ مِشِيٍ شَرَن، ندٍيٍ شَ لَامَتُنيِ مَسٍن، ندٍيٍ شَ وْيّن شُي فبّتّ رَ، ندٍيٍ شَ نَ شُي فبّتّ مَدَنفِ. نَ بِرِن شَ رَبَ عَلَكٌ دَنشَنِيَتْي حَمَ شَ سَبَتِ. 
شَ مِشِيٍ شُي فبّتّيٍ قَلَمَ، عٍ نَشَ دَنفِ مِشِ قِرِن نَ، شَ نَ مُ عَ رَ مِشِ سَشَن. كَنكَن شَ وْيّن عَ وْيّن تّمُي، كَنكَن شَ مِشِ سْتْ نَشَن نَ شُي مَدَنفِمَ بٌورٍيٍ بّ. 
شَ مِشِ مُ نَ نَشَن نَ شُي مَدَنفِمَ، نَ كَنيِ شَ عَ سَبَرِ مَلَنيِ كُي، عَ شَ وْيّنيِ شَ لُ عَ تَن نُن عَلَ فبَنسَن تَفِ. 
شَ مِشِيٍ وْيّنمَ عَلَ شِلِ رَ، عٍ قَن نَشَ دَنفِ مِشِ قِرِن نَ، شَ نَ مُ عَ رَ مِشِ سَشَن. بٌورٍيٍ شَ نَ مَسٍنيِيٍ مَتٌ عَ قَنيِ رَ. 
شَ عَلَ مَسٍنيِ قِ مِشِ ندٍ مَ عَ شِلِ رَ، بٌورٍ نَ وْيّنقٍ تّمُي نَشّ، نَشَن نَ وْيّنقٍ عَ لَنمَ عَ شَ دُندُ سِندٍن. 
كَنكَن نْمَ وْيّندٍ عَلَ شِلِ رَ عَ شَ وَشَتِ، عَلَكٌ بِرِن شَ شَرَنيِ نُن لِمَنِيَ سْتْ. 
نَمِحْنمّ تَن، عَ مَسٍنيِ تِمَ عَ حَنِفٍ نَن نَ. 
عَلَ مُ وَ مَ شُرُتَرٍحَ شْن، عَ وَ مَ نّ قٍ بِرِن شَ رَبَ عَ رَبَ كِ مَ بْحّسَ كُي. سّنِيّنتْي حَمَ بِرِن بَرَ لَن عَ مَ، 
عَ فِنّيٍ شَ عٍ سَبَرِ مَلَنيِيٍ كُي. عٍ مُ لَن عٍ شَ وْيّن، عٍ شَ لُ مَفٌرٍ كُي عَلْ عَلَ شَ سّرِيّ عَ مَسٍنشِ كِ نَشّ. 
شَ عٍ وَ مَ مَشْرِنيِ تِقٍ، عٍ شَ عٍ شَ مْرِ مَشْرِن بَنشِ، بَرِ مَ عَ مُ دَشَ فِنّ شَ وْيّن مَلَنيِ كُي. 
عَلَ شَ مَسٍنيِ قَتَنشِ وٌ تَن نَن نَ؟ عَ مَسٍنشِ وٌ تَن نَن فبَنسَن بّ؟ 
شَ مِشِ ندٍ عَ مَحْشُن عَ نَمِحْنمّ نَ عَ رَ، شَ مِشِ ندٍ عَ مَحْشُن عَ عَلَ بَرَ عَ كِ، عَ شَ ﭑ مَ سّبّلِ كٌلٌن مَرِفِ شَ يَامَرِ رَ. 
شَ عَ مُ نَ كٌلٌن نْندِ رَ، عَلَ قَن مُ نَ كَنيِ كٌلٌنمَ عَ شَ مِشِ رَ. 
نَ كُي، ﭑ نفَشَكٍرٍنيِيٍ، وْيّنقٍ عَلَ شِلِ رَ عَ شَ رَقَن وٌ مَ. وٌ نَشَ تْنيِ دْشْ شُي فبّتّيٍ قَلَقٍ رَ، 
كْنْ وٌ شَ نَ رَبَ عَ رَبَ كِ مَ سّرِيّ رَ.