عَلَ شَ مَسٍنيِ عَننَبِ ثْلُ نَشَن سّبّ قِلِثِ دَنشَنِيَتْي حَمَ مَ.
1.
ﭑ تَن ثْلُ نُن تِمٌتٍ، نَشٍيٍ قِندِشِ عَلَ شَ مِشِ سُفَندِشِ عِسَ شَ كٌنيِيٍ رَ، مُشُ بَرَ وٌ شّيبُ، عَلَ شَ مِشِ سُفَندِشِ شَ سّنِيّنتْي نَشٍيٍ نَ قِلِثِ، عَ نُن وٌ شَ يَرٍرَتِيٍ نُن وٌ مَلِمَيٍ. 
وٌن بَبَ عَلَ نُن عَ شَ مِشِ سُفَندِشِ مَرِفِ عِسَ شَ هِننّ نُن بْحّسَ قِ وٌ مَ. 
تّمُي بِرِن ﭑ نَ رَتُ وٌ مَ، ﭑ عَلَ تَنتُمَ نّ. 
ﭑ عَلَ مَشَندِ مَ وٌ بّ سّيوّ رَ تّمُي بِرِن، 
بَرِ مَ وٌ بَرَ ﭑ مَلِ عَلَ شَ مَسٍنيِ كَوَندِقٍ رَ كَبِ عَ قْلّ هَن يَكْسِ. 
ﭑ عَ كٌلٌن، عَلَ، نَشَن وَلِ قَنيِ قْلْشِ وٌ تَفِ، عَ قَمَ نّ عَ رَكَمَلِدٍ عَ شَ مِشِ سُفَندِشِ عِسَ قَ لْشْي. 
عَ لَن نّ يِ شَشِلِ شَ لُ ﭑ بّ بَرِ مَ وٌ رَقَن ﭑ مَ. شَ ﭑ نَ فٍيلِ كُي، شَ ﭑ نَ عَلَ شَ شِبَارُ قَنيِ شُنمَفٍرٍ سٌقٍ كَوَندِ رَ، عَلَ هِننّمَ نّ وٌن بِرِن نَ. 
عَلَ عَ كٌلٌن ﭑ وٌ شَنُشِ عَلْ عَ شَ مِشِ سُفَندِشِ عِسَ وٌ شَنُشِ كِ نَشّ. 
ﭑ عَلَ مَشَندِ مَ نّ وٌ بّ عَلَكٌ وٌ شَ شَنُنتٍيَ شُن شَ مَسَ قٍ كٌلٌنيِ نُن قَهَامُي تِلِنشِ رَ، 
عَلَكٌ وٌ شَ نْ عَ كٌلٌندٍ قٍ نَشَن تِدٍ فبٌ. نَ كُي، وٌ بْحّ شَ قِيشّ، مَرَكْرْ سِ يٌ نَشَ لُ وٌ مَ عَلَ شَ مِشِ سُفَندِشِ قَ لْشْي. 
نَ لْشْي عِسَ قَمَ نّ وٌ مَتِنشِندٍ عَلَكٌ عَلَ شَ مَتْشْ، عَ سّنبّ شَ كٌلٌن. 
ﭑ نفَشَكٍرٍنيِيٍ، وٌ شَ عَ كٌلٌن، تْورّ نَشَن ﭑ لِشِ، نَ بَرَ عِنيِلَ عِسَ مَسٍنيِ وَلِ رَ سْونّيَ، 
بَرِ مَ مَنفّ شَ سْورِيٍ نُن مِشِيٍ بِرِن بَرَ عَ كٌلٌن ﭑ نَ فٍيلِ كُي عَلَ شَ مِشِ سُفَندِشِ شَ قٍ نَن مَ. 
ﭑ نفَشَكٍرٍنيِيٍ بَرَ لِمَنِيَ مَرِفِ شَ قٍ مَ ﭑ مَ حَشَنكَتّ سَابُي رَ. يَكْسِ عٍ مُ فَاشُمَ قٍقٍ يَ رَ، عٍ عَلَ شَ مَسٍنيِ كَوَندِ مَ سّنبّ رَ. 
نْندِ نَن عَ رَ، ندٍيٍ نَ عَلَ شَ مِشِ سُفَندِشِ شَ قٍ كَوَندِقٍ مِلّ نُن تْونّ نَن مَ، كْنْ ندٍيٍ قَن نَ كَوَندِ تِقٍ بْحّ قَنيِ نَن نَ. 
نٍيٍ عَ رَبَقٍ شَنُنتٍيَ نَن نَ، بَرِ مَ عٍ عَ كٌلٌن عَ ﭑ قِندِشِ شِبَارُ قَنيِ شُنمَفٍرٍ سٌ نَن نَ. 
بٌورٍيٍ عَلَ شَ مِشِ سُفَندِشِ شَ قٍ كَوَندِ مَ عٍ شَ يّتّ عِفبٌحَ نَن نَ. عٍ بْحّ مُ قِيشّ. عٍ حْشْ عَ مَ عَ عٍ نْمَ ﭑ مَ فٍيلِ حَشَنكَتّ شُن مَسَدٍ عٍ شَ كَوَندِ رَ. 
قٍقٍ مُ عَ رَ. شَ عٍ بْحّ قِيشّ، شَ عٍ بْحّ مُ قِيشّ، عٍ نَ عَلَ شَ مِشِ سُفَندِشِ شَ قٍ مَسٍنقٍ. يِ قِندِ مَ سّيوّ نَن نَ ﭑ بّ تٌ نُن تِنَ، 
بَرِ مَ ﭑ عَ كٌلٌن قٍ نَشٍيٍ بَرَ ﭑ لِ، عٍ قِندِ مَ كِسِ نَن نَ ﭑ بّ وٌ شَ عَلَ مَشَندِ سَابُي رَ نُن عَ شَ مِشِ سُفَندِشِ عِسَ شَشِلِ شَ مَلِ سَابُي رَ. 
ﭑ عَ كٌلٌن ﭑ قٍ بِرِن نَبَمَ عَلَكٌ ﭑ نَشَ يَافِ قٍقٍ رَ. ﭑ شَ لِمَنِيَ يَكْسِ عَلْ تّمُي دَنفِشِ عَلَكٌ عَلَ شَ مِشِ سُفَندِشِ شَ مَتْشْي سْتْ ﭑ مَ سِمَيَ شَ نَ مُ ﭑ مَ قَشّ سَابُي رَ. 
ﭑ مَ دُنِحّءِفِرِ كُي، ﭑ بِرَ مَ نّ عَلَ شَ مِشِ سُفَندِشِ قْشْ رَ. ﭑ مَ قَشّ قِندِ مَ قٍ قَنيِ نَن نَ ﭑ بّ، 
كْنْ شَ ﭑ لُ دُنِحَ، ﭑ نْمَ نّ وَلِ فبٍفبٍ رَبَدٍ عَلَ بّ. عَوَ، ﭑ مُنسٍ رَبَمَ؟ ﭑ مُ عَ كٌلٌن. 
نَ قٍ نَ ﭑ بّندُنقٍ يِرٍ قِرِن. عَ شْلِ ﭑ مَ ﭑ شَ كٍلِ بٍ، ﭑ شَ سِفَ عَلَ شَ مِشِ سُفَندِشِ يِرٍ. نَ قَن دَنفِ قٍ بِرِن نَ. 
كْنْ عَ لَنمَ ﭑ شَ لُ دُنِحَ وٌ تَن مَ قٍ رَ. 
ﭑ بَرَ عَ كٌلٌن ﭑ لُمَ نّ وٌ يَ مَ عَلَكٌ وٌ شَ سِفَ يَرٍ، وٌ مَن شَ سّيوَ دَنشَنِيَ كُي. 
ﭑ نَ فبِلٍن وٌ يِرٍ، وٌ شَ مَتْشْي عَلَ شَ مِشِ سُفَندِشِ عِسَ بّ، نَ شُن قَمَ مَسَدٍ ﭑ مَ قٍ رَ. 
وٌ حّرّ كِ شَ لَن عَلَ شَ مِشِ سُفَندِشِ شَ شِبَارُ قَنيِ مَ تُن، عَلَكٌ شَ ﭑ نَ وٌ يَ مَ بَ، شَ ﭑ مُ نَ بَ، ﭑ نْمَ عَ كٌلٌندٍ شَشِلِ كٍرٍن نَن نَ وٌ بّ، وٌ بِرِن وَلِقٍ دَنشَنِيَ كٍرٍن نَن نَ، دَنشَنِيَ نَشَن قَتَنشِ عَلَ شَ شِبَارُ قَنيِ رَ. 
وٌ نَشَ فَاشُ وٌ فٍرٍقَيٍ يَ رَ. وٌ شَ لِمَنِيَ قِندِشِ تْنشُمَ نَن نَ عٍ بّ عٍ لْيقٍ رَ، وٌ قَن شَ عَ كٌلٌن وٌ كِسِمَ نّ. 
نَ كِسِ كٍلِشِ عَلَ نَن مَ، بَرِ مَ عَ بَرَ هِننّ وٌ رَ دْشْ قِرِن؛ وٌ دَنشَنِيَقٍ عَلَ شَ مِشِ سُفَندِشِ مَ، عَ نُن وٌ مَن تْورْقٍ عَ بّ، 
عَلْ وٌ ﭑ قَن تٌ تْورْ رَ كِ نَشّ. عَلْ وٌ مَن بَرَ عَ مّ كِ نَشّ، هَن يَ ﭑ نَ نَ تْورّ نَن كُي.