تِمٌتٍ عِِ.
2.
ﭑ مَ دِ، عِ شَ عِ سّنبّ سٌ عَلَ شَ مِشِ سُفَندِشِ عِسَ شَ هِننّ شَ قٍ رَ. 
عِ نَشَن مّشِ ﭑ نَ سٍيدٍ فبٍفبٍ يَ شْرِ، عِ شَ نَ مَسٍنيِ تَشُ عِ دُفُتّفّيٍ رَ، نَشٍيٍ قَن نْمَ مِشِ فبّتّيٍ رَشَرَندٍ نَ رَ. 
وٌن بِرِن شَ وَكِلِ تْورّ كُي، بَرِ مَ عَلَ شَ مِشِ سُفَندِشِ عِسَ شَ سْورِ قَنيِيٍ نَن وٌن نَ. 
سْورِ نَشَن نَ فٍرٍ كُي، عَ مُ بِرَ مَ دُنِحَ قٍ قْشْ رَ، عَ بِرَ مَ عَ شَ مَنفّ وَشْنقٍ نَن قْشْ رَ. 
مِشِ نَشَن سِفَشِ فِ فبَتَ رَبَدٍ، شَ عَ مُ عَ فِ عَ سّرِيّ كِ مَ، عَ مُ فٍينِمَ. 
مِشِ نَشَن شّ رَوَلِمَ، عَ تَن نَن لَنمَ عَ شَ بٌفِ سِنفٍيٍ سْتْ. 
عِ حْشْ سَ ﭑ مَ مَسٍنيِ بِرِن شْن مَ، مَرِفِ قَهَامُي قِمَ نّ عِ مَ نَ قٍيٍ مَ. 
عِ شَ رَتُ عَلَ شَ مِشِ سُفَندِشِ عِسَ مَ، نَشَن كٍلِشِ قَشّ مَ، نَشَن قَتَنشِ دَوُدَ بْنسْي رَ، عَلْ عِسَ شَ شِبَارُ قَنيِ عَ مَسٍنشِ كِ نَشّ، ﭑ نَشَن كَوَندِقٍ. 
نَ شِبَارُ قَنيِ نَن مَ قٍ عَ نِيَشِ، ﭑ نَ تْورْقٍ فٍيلِ كُي عَلْ قٍ كٌبِ رَبَمَ، كْنْ عَلَ شَ مَسٍنيِ تَن مُ بَلَنشِ. 
نَ نَن عَ رَ ﭑ تْورّ مْولِ بِرِن شَنِنمَ، عَلَكٌ مِشِ سُفَندِشِيٍ شَ كِسِ سْتْ عَلَ شَ مِشِ سُفَندِشِ عِسَ سَابُي رَ، عٍ لُ عَ شَ نْرّ كُي عَبَدَن. 
مَسٍنيِ هَفِفّ نَن يَ؛ شَ وٌن نُن عِسَ بَرَ قَشَ، وٌن نُن عِسَ مَن كٍلِمَ نّ قَشّ مَ. 
شَ وٌن تُننَبّشِ، وٌن لُمَ نّ عِسَ شَ مَنفّيَ كُي. شَ وٌن نَ عَ رَبٌلٌ، عَ قَن وٌن نَبٌلٌمَ نّ. 
شَ وٌن مُ لُ وٌن شُي شَنبِ رَ، عَ تَن لُمَ نّ عَ شُي شَنبِ رَ، بَرِ مَ عَ مُ نْمَ عَ يّتّ رَبٌلٌدٍ. 
عِ شَ مِشِ بِرِن نَتُ عَلَ يَ عِ، عَ عَ لَنمَ عٍ شَ فٍرٍ لُ نَ مَسٍنيِ ندٍيٍ شَ قٍ رَ. نَ وْيّنيِ مْولِ تِدٍ يٌ مُ نَ. عَ عَ رَ مّمَيٍ نَن شُن نَكَنَمَ تُن. 
عِ شَ عِ يّتّ مَسٍن عَلَ بّ، عَلْ مِشِ نَشَن وَلِ قْشِ مُ مَيَافِ، عَ قَتَ نْندِ مَسٍندٍ مِشِيٍ بّ عَ مَسٍن كِ مَ. 
وْيّن حَاشِ قُقَقُ لُ نَ، بَرِ مَ نَشٍيٍ نَ مْولِ قَلَمَ، عٍ شَ كَاقِرِحَ شُن نَن تُن مَسَمَ. 
عٍ شَ وْيّنيِ فبٌمَ نّ عَلْ قُرٍ حَاشِ، نَشَن مِشِ قَشَمَ. هُمٍنٍيٌ نُن قِلٍتٌ نَ نٍيٍ نَن يَ مَ. 
عٍ بَرَ مَكُيَ نْندِ رَ، عٍ قَ عَ قَلَ مِشِيٍ حَن بَرَ كٍلِ قَشّ مَ. عٍ بَرَ مِشِ ندٍيٍ شَ دَنشَنِيَ كَنَ نَ وْيّنيِ مْولِ رَ. 
كْنْ عَلَ شَ بَنشِ تِشِ يِ مَسٍنيِ نَن قَرِ؛ «عَلَ عَ كٌلٌن، مِشِ نَشَن قِندِشِ عَ فبٍ رَ.» عَ مَن عَ مَسٍنشِ؛ «عَدَ مَدِ نَشَن مَرِفِ شِلِ قَلَمَ، عَ شَ تِنشِنتَرٍيَ رَبّحِن.» 
سٍ سَسٍ مْولِ فبٍفبٍ نَن نَ بَنشِ شُنفبٍ كُي. ندٍ قَن يَءِلَنشِ شّيمَ نَن نَ، شَ نَ مُ عَ رَ فبٍتِ. ندٍ يَءِلَنشِ وُرِ نَن نَ، شَ نَ مُ عَ رَ بّندّ. ندٍ بِنيّ وَلِ رَبَمَ، ندٍ قَن بِنيّتَرٍ وَلِ رَبَمَ. 
مِشِ نَشَن عَ يّتّ رَ سّنِيّنمَ، عَ لُمَ نّ عَلْ وَلِ بِنيّ رَبَمَ سٍ سَسٍ نَشَن كُي. عَ تٌ سّنِيّن، عَ مَرِفِ نْمَ عَ رَوَلِدٍ وَلِ قَنيِ بِرِن كُي. 
قٌنِكٍ وَشْنقٍ لُ نَ. وٌ نُن مِشِ نَشٍيٍ مَرِفِ شِلِمَ بْحّ سّنِيّنشِ رَ، وٌ شَ نُ تِنشِنيِ، دَنشَنِيَ، شَنُنتٍيَ، نُن بْحّسَ قٍن. 
وْيّنيِ تِدٍتَرٍ قُقَقُ لُ نَ، بَرِ مَ عِ عَ كٌلٌن نَ مْولِ قِندِ مَ فٍرٍ نَن نَ. 
عَ مُ لَنمَ مَرِفِ شَ وَلِكّ شَ سْنشْ. عَ لَنمَ عَ شَ قِندِ مِشِ دِحّشِ رَ نَشَن قَتَ مِشِ شَرَندٍ، عَ مَن وَكِلِ تْورّ رَ. 
عَ لَنمَ عَ شَ مَتَندِلَيٍ مَتِنشِن وْيّنيِ حْشُنمّ رَ، عَلَكٌ عَلَ شَ عَ نِيَ عٍ شَ تُوبِ، عٍ شَ نْندِ كٌلٌن، 
عٍ شَ شَشِلِ سْتْ، عٍ شَ عٍ بَ عِبُلِسَ شَ فَنتَنيِ رَ. عِبُلِسَ بَرَ عٍ سُشُ فَنتَنيِ رَ، عَلَكٌ عٍ شَ لُ عَ شَ يَامَرِ بُن مَ.