عٍبُرُ.
13.
وٌ شَ وٌ تُننَبّشِ وٌ بٌرٍ مَشَنُقٍ رَ نفَشَكٍرٍنيَ كُي. 
وٌ شَ شْحّ رَ سّنّ عَ قَنيِ رَ. مِشِ ندٍيٍ شْحّ يِفِيَمَ نّ، عَ قَ سَ لِ عٍ مُ عَ كٌلٌن شَ مَلٍكّ نَ عَ رَ. 
وٌ شَ رَتُ فٍيلِمَنِيٍ مَ نُن مِشِيٍ مَ نَشٍيٍ حَشَنكَتَشِ. وٌ شَ قٍ قَنيِ رَبَ عٍ بّ عَلْ وٌ بِرِن نَ قَتٍ بّندّ كٍرٍن نَن كُي. 
وٌ بِرِن شَ قُتِ بِنيَ. يّنّ نُن لَنفٌيحَ نَشَ لُ وٌ يَ مَ، بَرِ مَ عَلَ قَمَ نّ نَ سّنِيّنتَرٍحَ مَكِيتِدٍ. 
وٌ نَشَ عَ لُ كْبِرِ شَ قٍ مِلّ شَ وٌ رَحّرّ. نَشَن نَ وٌ يِ، وٌ شَ وٌ وَ سَ سٌ نّ. عَلَ يَتِ نَشَ عَ مَسٍن، «ﭑ مُ عِ رَبّحِنمَ، ﭑ مُ عِ رَبٌلٌمَ.» 
نَ نَن عَ تٌشِ وٌن نْمَ عَ قَلَدٍ لِمَنِيَ رَ، «ﭑ مَرِفِ ﭑ دّ مّنمَ، ﭑ مُ فَاشُمَ. عَدَ مَ تَن نْمَ مُنسٍ رَبَدٍ ﭑ نَ كْرّ؟» 
وٌ شَ رَتُ وٌ شَ يَرٍرَتِيٍ مَ، نَشٍيٍ بَرَ عَلَ شَ مَسٍنيِ مَسٍن وٌ بّ. وٌ شَ عٍ حّرّ كِ مَتٌ، عٍ شَ دَنشَنِيَ شَ قِندِ مِسَالِ رَ وٌ بّ. 
عَلَ شَ مِشِ سُفَندِشِ عِسَ مُ مَسَرَ مَ. عَ نُ نَ كِ نَشّ شٌرٌ، عَ مَن نَ نَ كِ نّ تٌ، عَ مَن لُمَ نَ كِ نّ عَبَدَن، نَ بِرِن كّحَ كٍرٍن. 
وٌ نَشَ بِرَ شَرَنيِ مْولِ فبّتّيٍ قْشْ رَ. وٌ بْحّ شَ سّنبّ سٌ عَلَ شَ هِننّ سَابُي رَ. يَامَرِيٍ، دٌنسٍ رَهَرَ مُشِيٍ شَ قٍ رَ، نٍيٍ مُ نْمَ وٌ مَلِدٍ. 
هْرْ مْلِنفِرَ وَلِكّيٍ مُ نْمَ سّرّشّ دٌندٍ نَشَن بَشِ وٌن تَن بّ. 
سّرّشّدُبّ كُنتِفِ شُرُ سٍ وُلِ بَمَ نّ سّرّشّ رَ هْرْ مْلِنفِرَ كُي يُنُبِيٍ شَ قٍ رَ، كْنْ نَ شُرُ سٍ قَتٍ تَن فَنمَ نّ تَا قَرِ مَ. 
نَ نَن عَ تٌشِ، عِسَ قَن تٌ وَ حَمَ رَ سّنِيّنقٍ عَ يّتّ وُلِ سَابُي رَ، عَ نَشَ حَشَنكَتَ تَا قَرِ مَ. 
وٌن قَن شَ بِرَ عَ قْشْ رَ نَ يَافِ كُي تَا قَرِ مَ، 
بَرِ مَ وٌن نَ تَا نَشَن كُي، عَ مُ بُمَ. وٌن تَا نَن قٍنقٍ نَشَن قَمَ قَدٍ. 
وٌن شَ تَنتُي قِ عَلَ مَ سّرّشّ رَ تّمُي بِرِن عِسَ سَابُي رَ. نَ سّرّشّ قِندِ مَ وٌن مَ مَسٍنيِ نَن نَ نَشَن عَ شِلِ مَتْشْمَ. 
وٌ مَن نَشَ نّيمُ قٍ قَنيِيٍ رَبَدٍ مِشِيٍ بّ. وٌ شَ وٌ بٌورٍيٍ كِ، بَرِ مَ نَ قٍ مْولِيٍ قِندِ مَ سّرّشّيٍ نَن نَ نَشٍيٍ رَقَنشِ عَلَ مَ. 
وٌ شَ وٌ شَ يَرٍرَتِيٍ شُي رَتِنمّ، وٌ شَ عٍ شَ يَامَرِيٍ سُشُ، بَرِ مَ عٍ نَ مّينِقٍ وٌ مَ، عَلَكٌ وٌ نَشَ فبِلٍن عَلَ قْشْ رَ، شَ نَ مُ عَ رَ نَ دّنتّفّ سَ قَمَ نّ عٍ تْورْدٍ. وٌ شَ قٍ بِرِن نَبَ عَلَكٌ عٍ شَ نْ نَ دّنتّفّ سَدٍ سّيوّ كُي بْحّ مَوَ شَنبِ، بَرِ مَ نَ نَن قِندِ مَ وٌ شَ مُنَقَنيِ رَ. 
وٌ شَ عَلَ مَشَندِ مُشُ بّ، بَرِ مَ مُشُ عَ كٌلٌن مُشُ شَشِلِ قِيشّ، مُشُ وَ مَ حّرّقٍ قٍ قَنيِ مْولِ بِرِن نَن كُي. 
وٌ مَن شَ عَلَ مَشَندِ مُشُ بّ، عَلَكٌ ﭑ شَ نْ فبِلٍندٍ وٌ يِرٍ مَقُرٍن مَقُرٍن. 
عَلَ نَشَن بْحّسَ قِمَ مِشِ مَ، عَلَ نَشَن وٌن مَرِفِ عِسَ رَكٍلِ قَشّ مَ، عِسَ نَشَن مّينِمَ عَ شَ مِشِيٍ مَ عَ شَ سَاتّ وُلِ سَابُي رَ، سَاتّ نَشَن مُ كَنَمَ عَبَدَن، 
عَلَ شَ قّيرّ بِرِن قِ وٌ مَ عَلَكٌ وٌ شَ نْ عَ سَفٌ رَبَدٍ. عَلَ شَ قٍ لُ وٌن بْحّ مَ نَشَن نَقَن عَ مَ عَ شَ مِشِ سُفَندِشِ عِسَ سَابُي رَ. مَتْشْي نَ عَ بّ عَبَدَن. عَمِنَ. 
ﭑ نفَشَكٍرٍنيِيٍ، وٌ شَ وٌ هَاكّ تٌ ﭑ بّ يِ مَسٍنيِ شَ قٍ رَ، بَرِ مَ ﭑ مُ وْيّنيِ شْنكُيَشِ عَ فبٍ رَ. 
وٌ شَ عَ كٌلٌن وٌن نفَشَكٍرٍنيِ تِمٌتٍ بَرَ عَ يّتّ سْتْ. شَ عَ مُ بُ قَدٍ، مُشُ بِرِن قَمَ نّ وٌ يِرٍ. 
وٌ شَ وٌ شَ يَرٍرَتِيٍ نُن سّنِيّنتْي بِرِن شّيبُ مُشُ بّ. عِتَلِكَيٍ نَشٍيٍ نَ بٍ، عٍ قَن بَرَ وٌ شّيبُ. 
عَلَ شَ هِننّ وٌ بِرِن نَ.