1 La꞉ numa꞉la꞉, Kelisote keha pihigalo a tutupima꞉ a꞉midiya꞉ ale ebeno tutu emede ipuwalo hibinomolo kemedenama꞉, ba꞉bema꞉ wadiyala la꞉ ba꞉be tutu emede ipuwalo kodakodalo ba la꞉mota꞉hana eta lumagino huiyaha꞉ temeteme oko komoeno gubi ipuwamo gala akanogomala꞉.

2 Naeno tabo hidamo nulia꞉la꞉. Na Polote ba꞉moe komo la꞉ Yuha꞉pi dubu bikiyalamemata, la꞉ eta lumagino kuba ukui komamo papamila꞉hate Yunapino tama itamida kukala la꞉eno apa꞉mo da꞉lawema, ba꞉be komodo la꞉le la꞉eno ukui ba꞉ma ka꞉na kohawakalimima꞉nemata, Kelisote la꞉ mabuma꞉ dododiya꞉ la꞉ ba꞉be komo gigilepalama꞉ ba midina gobogobamo a꞉da꞉nama꞉ ewagelenamata. 3 Ba꞉bema꞉ nale la꞉ eta kapiya teta꞉mo gala na꞉kakiyahalamemata, la꞉ ipuwalo eta dubuti Yunapino tama itamida kukala da꞉lawemene, ba꞉ba tetene tupuimiti ebete komo Tutumu Taboeno hiliyonomo komamo na꞉papamiwatanakamene ebeno kuba huiyate ebetamo pekapoma꞉! 4 A꞉iye! La꞉ puya꞉te Godokono Tutumu Tabamo papamila꞉ha komodo ebeno tuputupupima꞉ eda꞉hama꞉ dewagelenama, la꞉ ha꞉kiya la꞉ Kelisogodone ya꞉lo iya꞉hilimata, iyo, la꞉ ba꞉ Godokono malemalelo dito ikaa꞉me komone ohobila꞉huimata. 5 A hibima꞉ midipa꞉te huiyatiya uliholo na꞉latiminama꞉, Godote aeno hibima꞉ midi komodo oko ba owatina ebe ha꞉kiya ebeno Gobogoboeno heloamo a ebeno hibi tuputupupima꞉ komidima꞉ne. 6 Ba꞉bema꞉ hibila, a Ya꞉su Kelisoko ipuwalo ba emedena, ale Yunapino tama itamida kukala ya꞉lo da꞉lawiya꞉ma꞉ ebe ko komoha꞉, ba꞉gala ale laweha꞉pima꞉ deda꞉hanama꞉ ba꞉be komo atumu ko komoma꞉ keda꞉naha꞉. Numa꞉la꞉, kapiyanomo komote koma꞉ eda꞉na, ba꞉be komo ba꞉ aeno hibima꞉ midi komote aeno malemale hawakalimi komodo oko dowatina ba꞉be komola.

7 A꞉iye! La꞉ dopamo la꞉eno hibima꞉ midi gabodo helonomamo tolamimata, sikulu gugudino iya꞉da꞉mi hegelalo iba꞉te keba ka꞉na ka꞉pulila꞉hanaka ba꞉ba ka꞉na. Ba꞉bema꞉ la꞉eno nato ukamidadawama꞉ pote kedi? Iyo, la꞉le dopamo Godokono hibi komo ulihote ba꞉be komamo papamila꞉ha da꞉tupuimima, ba꞉be komo pokono ododi komodo kekelalamiti? 8 Numa꞉la꞉, Godoko la꞉eno nato ukamidadawaha꞉, ao, ebe ba꞉ dopamo la꞉ hibima꞉ midi komamo da꞉ka꞉lami ba꞉be dawala.

9 Ba꞉gala eta komo. Tawakaluba꞉te ba꞉ma ka꞉na ga꞉lana, “Palawa baa꞉ kokalimima꞉ kamenate huhuimino puhulu ilina nanekelenomo palawago da꞉kapiyuimimini, baa꞉te ha꞉kiya ba꞉bo kohuhuma꞉ne.” Ba꞉bema꞉ numa꞉la꞉, ba꞉ ba꞉ba ka꞉na la꞉eno kapiyuimi ipuwalo kuba ukui deha꞉potonomote ditana, ebe ha꞉kiya koma꞉ ba꞉bo keda꞉ma꞉ne. 10 Huiyatiya kalakala konomola, la꞉la, nala, a hiliyonomate Kodawa ipuwalo kapiyama꞉ ba eda꞉hana na ba꞉moe komo hibima꞉ na꞉midinamo, na ba꞉ma tetelo la꞉ gala da꞉kakiyalamema la꞉ ba꞉moe tabo komone a꞉kohobila꞉hamata. Ba꞉be mabuma꞉ pote ukui bilibili komo la꞉tamo ikalamema꞉ dewagelena, na ba꞉be lumagino komo iya꞉tawaha꞉, huiyatiya Godote ebeno komo ba iya꞉tawa kuba huiya ebetamo hibinomolo kikamema꞉ne!

11 Ba꞉bema꞉ naeno hibima꞉ midipi ekaka꞉la꞉, numa꞉la꞉. Nale Hido Tabo olamagi ipuwalo hibima꞉ midipi dubate Yunapino tama itamida kukala lawema꞉ ibi na꞉kiyalametale, Yunapi ipuwalo etate natamo temeteme ba꞉ka꞉-ikanamena꞉. Ba꞉ hibila, dopamo nale ba꞉be komo ko komonomoma꞉ goenakuimo, huiyatiya nale ba꞉ma tetelo Kelisote keha pihigalo da꞉hoiya꞉ ba꞉be komoeno ipuwa kapiya hawakalimi tabo bolamaginakomo, iyo, ba꞉moe ba꞉be mabuma꞉ komopa꞉te natamo maubahate koko temeteme dito ikanamenaka. 12 A꞉iye! Ibi ba꞉ puya꞉te tama itamida kukala lawe komoma꞉ la꞉tamo ukui bilibili komo dikalamena ba꞉bi dubula, ba꞉bema꞉ nale ibi mabuma꞉ naeno ubi ba꞉ma ka꞉na ihatenamo, wadiyala iba꞉te la꞉tamo eta komo ododihino huiyatiya ibi ha꞉kiya ibino tama kubanomamo ba iya꞉hili ibino gugudi ododili gabote na꞉wibadigamene!

13 Naeno hibima꞉ midipi ekaka꞉la꞉, hibila, Godote la꞉ ebeno tutu emede komamo a꞉ka꞉lamia꞉ta. Huiyatiya la꞉ hidamo, ebeno tutu emede komo ipuwalo ba emedena, ba꞉be komone la꞉le la꞉eno kateneno kuba ubi komamo papamila꞉halema꞉ modoboma꞉ akaga꞉lala꞉. Wadiyala la꞉ huiyatiya la꞉ ipuwalo etapa꞉te etapi malemalelo ba emalagidolena nowalubihuinakuya꞉la꞉, huiyaha꞉ okopa꞉te ibino namutuluba꞉tamo oko keba ka꞉na kowatihona ba꞉ba ka꞉na. 14 Ba꞉ hibila, Godokono Tutumu Tabo hiliyonomo ipuwalo kebe tutumuti konomoma꞉ deda꞉na, ba꞉moe tutumu ba꞉ “Ama꞉ ha꞉kiya ama꞉ demalagidolona, ba꞉ba ka꞉na ama꞉ tamelo demedena, wadiyala ama꞉le ba꞉be lumagi malemalelo nemalagidolona.” Iyo, pote ba꞉moe kapiya tutumamo hibinomolo da꞉papamiwatanako, ebete ba꞉be komodo Godokono komo hiliyonomo Tutumu Tabamo atumu a꞉kapapamiwatanako. 15 Huiyatiya gahagahate alaholoho tetelo keba ka꞉na kewagelenaka, ba꞉ba ka꞉na la꞉ ipuwalo etate eta kubahimima꞉ daliwatahuinakoma, la꞉ hidamo! Diyala, la꞉ hiliyonomate alaholoho ipuwalo da꞉ ha꞉lahoma!

16 Ba꞉bema꞉ nale la꞉ bikiyalamemata, Godokono Gobogoboeno heloamo ba wapata꞉lamena la꞉le la꞉eno kateneno kuba ubi komamo dito akapapamila꞉hala꞉, 17 mabu lumagino kateneno ubi komate Godokono Gobogoboeno ubi komo ba duhilamena, Godokono Gobogoboeno ubi komate ba꞉be lumagino kateneno ubi komo atumu na꞉kaduhilamena. Ba꞉ hibila, ba꞉bi komate kubanomamo alaholohona, ba꞉bema꞉ la꞉ hibima꞉ midipa꞉te Godokono Gobogobo ba kalakaluimina, la꞉le la꞉eno kateneno ubi komamo dito papamila꞉ha modoboha꞉. 18 Numa꞉la꞉, la꞉ Godokono Gobogoboeno heloamo ebeno ubi komamo da꞉papamila꞉halenakoma, ba꞉ba tetelo la꞉ tutupima꞉ ba eda꞉hana ebeno Tutumu Taboeno temeteme komoeno helo ipuwalo gala a꞉kemedehonamata.

19 Ba꞉ hibila, tawakalubi iya꞉tawahanomola kateneno ubi komone kebe komate kikulina. Ba꞉bi komokomo ba꞉ kamenakamena ba꞉gala bohelemele pilo komo, ba꞉gala tepo ipuwoeno kuba dalowa꞉ ukui hawakalilame komo, ba꞉gala bohelemela꞉tamo kateneno kuba ubi tabo ga꞉la komo, 20 ba꞉gala ida꞉da꞉lino gobogobo adikulame komo, ba꞉gala giwali ododili komo, ba꞉gala alaholoho komo, ba꞉gala olowabeletihui komo, ba꞉gala eta lumagino ilinama꞉ mauba komo, ba꞉gala tepo ipuwane koe uluhuku komo, ba꞉gala lumagiti ebe ha꞉kiya ebe kapiya emalagidolo komo, ba꞉gala tawakalubi hiya꞉hiya꞉ anagiya꞉midale komo, 21 ba꞉gala eta lumagino hido mahiloeno komoma꞉ maubaha komo, ba꞉gala gamoda niho komo, ba꞉gala hilopo poko ododili komo, iyo, ba꞉moi ba꞉ ba꞉bi hiya꞉hiya꞉ kuba komokomo hiliyonomola. Ba꞉ hibila, puya꞉te ibino kateneno kuba ubi komamo da꞉papamila꞉halena, iba꞉te ba꞉bi komo hiliyonomo ba꞉gala komo ba꞉bakobako kuba komo atumu a꞉kododilinaka. Ba꞉bema꞉ nale la꞉ dopamo keba ka꞉na ka꞉kiyahalamitima ba꞉ ba꞉ba ka꞉na gala na꞉kakiyahalamemata, la꞉ hidamo! Puya꞉te ba꞉makomako kuba komo dododilinaka, iba꞉te Godokono Ko Gawadubu haboeno hidohido dogodogo komo hibinomolo a꞉kuwata꞉mena꞉.

22 Huiyatiya lumagino emede ipuwalo Godokono Gobogoboeno gaote duluhukuna, ba꞉be gaote golanomoma꞉ ba eda꞉na ebe ipuwalo hidohido komate ba꞉pola꞉namena꞉. Ba꞉bi komokomo ba꞉ komopi malemalelo emalagidole komo, tepo ipuwoeno kalakala komo, hete komo, temeteme ipuwalo kodakodalo la꞉mota꞉hana komo, awaepa꞉tamo malemale hawakalimi komo, komopi dito owalubili komo, hibidawama꞉ eda꞉ komo, 23 lumagi ebe ha꞉kiya ebe hopamo ihate komo, ba꞉gala kateneno ubi komamo papamiwataha꞉ komo. Ba꞉ hibila, puya꞉te ba꞉makomako komo dododilinaka, ibi kuba ododilipima꞉ ka꞉lamima꞉ eta tutumu tabote ba꞉moe hopo konomolo kitanaha꞉. 24 Iyo, numa꞉la꞉, puya꞉te ibino kateneno helohelonomo kuba ubi komo danakapulami, ba꞉ba꞉te ba꞉ Ya꞉su Kelisokono hibi tawakalubima꞉ eda꞉hana.

25 Ba꞉bema꞉ wadiyala ale Godokono Gobogoboeno ubi komokomo hiliyonomamo ba꞉papamila꞉halenakoma꞉, mabu ebete ebeno hibi ka꞉ka꞉ atamo ya꞉lo ikaa꞉miya꞉. 26 Ba꞉be mabuma꞉ a ha꞉kiya a awagaminoe modoboha꞉, iyo, ale menemene komo komopa꞉tamo dito a꞉kikalama꞉ma꞉, ba꞉gala ale komopino ilinama꞉ iba꞉tamo a꞉kamaubahala꞉ma꞉.