1-2 Edue cuana, quema puji micuana

Cristo sa ai cuana jepuiti buetsua taji epuani yanana chidi cuana pu cua nime, aimue micuaneda Diusu sa ai cuana tsuhu eshanapaeninia mahue putsu. Micuana sa ai tsada cuana bahui micuaneda yainia. Aimue micuaneda bahue eni mahue Diusu sa ai cuana su, micuaneda Espíritu Santo neje aimue epuniuneti mahue putsu. 3 Envidia neje micuaneda cama edusutiani. Micuaneda jasajasajati bahue ebia su, micuaneda cama yacuicuinatiani putsu. Diusu shanapaji mahue cuana nime micuaneda cama edusutiani. 4 Piada piada micuaneda, “Ecuanaju Pablo tije aji cuana”, epuani. Pia cuana micuaneda, “Ecuanaju Apolos tije aji cuana”, epuani. Daja sajasajajiji Diusu shanapaji mahue cuana jadusuti bahue. Beju micuaneda tuna nime daja edusutiani.

5 ¿Aidhe ni da Pablo? ¿Aidhe ni da Apolos? Beju etseju da Cristo sa emebajaji detse bahui. Diusu ja tiatana mudu bahui etseju yainia. Etseju jepuiti micuaneda Echua Puji Jesucristo peje su jei puana. 6 Yama Diusu sa mimi banana micuana sa muesumu su. Apolos ja biad'uichatana. Beju Diusu ja mu mesa mimi muruametana micuana sa muesumu su. 7 Beju ebanaji, ebiad'uichaji detse mu aimue ai cuatajuse mahue. Diusu bahui da aida eni, emuruametani putsu. 8 Ebanaji, ebiad'uichaji detse da tupupai Diusu butse su. Pamapa Diusu mebajaji cuana Diusu ja echuje etiata, cuaja mebajatana huecuana batame. 9 Etseju da Apolos neje Diusu sa mudu puji detse bahui. Micuaneda da Diusu sa banabana jude nime.

10 Micuaneda da ete emuduinia Diusu ja yatani nime. Ema da ete mudupiruji nime. Equene yama eti jude basetana. Da bia su pia ete muduji cuana ja ete emudutani. Beju saida pamudumuduta huecuana yama eti jude basetana bia su. 11 Jesucristo bahui Diusu sa ete eti jude. Tu bia su ecuanaju Diusu sa ete mudupiruana. Aimue pia eti jude yani mahue ecuaneda bia su emudu puji. 12 Beju yani piapiati Cristo sa mudu puji cuana. Ahua quebata cuana ja Diusu saida emebajata su, tuna sa Diusu sa puji ai mudu saida ajiji cuana da chujeji, oro, plata, joya cuana nime Diusu ja ebata. Quebata cuana ja mu Diusu saida emebajata mahue su, tuna sa ai mudu ajiji cuana da aqui, nutsa, eina cuana nime Diusu ja ebata. 13 Beju Cristo cuati utsu neje epueicha su, pamapa ecuana sa ai ajiji cuana edhareta. Pamapa ai saida ajiji cuana, oro, plata, joya nime, cuati utsu je jaitiana putsu, ebia su saida eputayu. Pamapa ai saida mahue ajiji cuana mu cuati utsu su beju etiupetayu. Diusu ja pamapa ecuana sa jamebajati cuana ebapeta saida ahua saida mahue, tu epueicha su. 14-15 Ahua quebata edue ja Jesucristo saida emebajata su, Diusu ja tueda saida echuje etiatayu, mesa Diusu sa puji ai jamebajati chujeji cuana da oro, plata, joya cuana nime Diusu ja ebata putsu. Ahua quebata edue ja Jesucristo saida emebajata mahue su, aimue Diusu ja tueda echuje etiata mahue, mesa ai jamebajati saida mahue cuana da aqui, nutsa, eina cuana nime Diusu ja ebata putsu. Tueda saida mahue jamebajati cuana cuati utsu su etiupetayu. Beju mesa mudu saida mahue epu biame, tueda edue da d'eji su epu.

16 ¿Bue mahue jia maida micuaneda quitaita Diusu sa ani jude ete epuani? ¿Bue mahue jia maida Espíritu Santo da micuana sa equita dume su yani? 17 Ahua quebata ja tueda Diusu sa ani jude ete emadhatiata su, Diusu ja tueda di emadhatiaenita, tueda Diusu sa ani jude ete da iyuda putsu. Bahue mepuque micuaneda quitaita da Diusu sa ani jude ete cuana.

18 Be mebaseatiji micuana mehua. Quebata ja ye mundo sa ai cuana jepuiti bahue eni ebatiani su, ebia su saida pasetata tueda bahue eni ai cuana. Diusu sa bahue eni ai cuana bahui pashanapata. 19 Ye mundo sa bahue eni ai cuana da mue ai puji saida Diusu ja ebatani. Beju uja derejiji yani Diusu sa quirica su: “Diusu ja deja cuana ebaseametani tuna sa bahue eni ai cuana quitaita jepuiti.” 20 Neicha hue uja epuani: “Diusu bahue deja bahue eni cuana sa piba cuana da mue ai puji saida.” 21 Da su be tije aja meaji ye mundo sa bahue eni deja cuana, Diusu ja micuana pamapa mesa ai piba cuana shanapametana putsu. Pamapa ai cuana da micuaneseda. 22 Pablo, Apolos, Pedro cuana beju micuana Diusu ja tiatana. Ye mundo di micuana tiatana. Pamapa jiahue quita ejaitianani ai cuana beju micuana tiatana. Pamapa epu ai cuana di micuana tiatana. 23 Beju micuaneda da Cristo sa puji cuana. Cristo da Tata Diusu sa puji.