Hivuruqinaahuani qara vara kyora.
1.
Haaru Kotiva tiri haivaqahua Hivuru nraakye qora qua timwa nyinrenro mwiva vaisi mponramwu poropetive tuhua ekyaa mpo qua mpo qua timwa nyuvata mwihua mwi quara qovarama kyeqata tiri haivaqahua timwa nyiqi vi varurave. Mpo enta Kotiva ruvaatakyaa poropeti vaisi mpo timwa mwinro mpo enta nraahumwa mpo qarama kyero poropeti mpo timwa mwinro mwitaamaqi vivihura. 
Kotiva mwitaa timwa nyiqiro viro mwaa entara ekyaara enta vahiraqaa mwiva nai mwaaqu titaiharo mwia mwaaquvanto mwia qua qovarama kyaihata tire riaunanra. Kotiva nai mwaaqu nronraqama kyovaro mwia mwaaquvanto mwatavata nyaamwuvata utu tora. Kotiva ekyaa inraikya mwia nai mwaaqu kyaama taiva nraahuma vahiro. 
Kotira peqa okyaravanto nai mwia mwaaquqivata ntuvaahe varirama. Mwia mwaaqu okyaravantovata, mwia qora okyaravantovata, kuaa okyara nraahuma vahiro. Mwia mwaaquvanto timwa tai quaraqaatairo ekyaa nyaamwunivata, mwatanivata, vahi inraikyava qati nraahu vahiqiro vi varira. Mwaa entara mwia mwaaquvanto nraakye qora uaqia hi kyaiqara utua quara nruka nyatero uro nyaamwuni Kotira kepukyavanto vahinani mwia kyauqu kyaatutani mwatakyaa viro variro. 
Kotiva mwianra ni maaquve tirara tiro, mwia mwaaquvanto ekyaa nyaamwunyaahuavata nraatara kyero nritarero variharo mwia nrutuvantovata mwihua nyutu nraatara kyero nritarero virinima vahiro. 
Kotiva nai mwaaqu mwianra nraahu tiqaro, E ni maaquvanto variaro. E ni maaquvanto variarana nte mate i nronraqama kyauqo. Kotiva hia nyaamwunyaahuara mwi quara tiraitiro, nai mwaaquara mwi quara turave. Kotiva qaiqaa nai mwaaquara tiqaro, Nte mwia qova variariro mwiva ni maaquvanto variarive, turave. Mwitaa tiqaro Kotiva hia nyaamwunyaahuara mwi quara tiraitiro, nai mwaaquara nraahu mwi quara turave. 
Kotiva nai nraaqiara tauraanaanra mwata mwaini titarera hiro tiqaro, Ekyaa nyaamwunyaahua mwia nrutu nraahu tuaaheraqi quate, turave. 
Kotiva nyaamwunyaahua okyarara mwitaama tiro: Nte tuqata nyaamwunyaahua toqavanto tintema kyeta hianteqa nrohi variarave. Nte qua ti varuqata mwihua qia auruvanto itaintema kyeta ni kyaiqa vare variarave, turave. 
Nyaamwunyaahuara mwitaa timwa kyero Kotiva nai mwaaquara mwaa quara tiqaro, Kotio, e kepukyavanto varira ntaqikyiqi viqara ekyaa enta qati nraahu variqira vinanrave. E ntapihi kyera nraahu ntaqikyiqira vinanrave. 
Ntapihi kyera nrohina okyararama i mwutukyavanto vaiharo qora okyarara hia i mwutukya vahirave. E mwitaa hi variarana nte Kotiva iqaa ntaqikyi varuva i hena vaisi qaqira mwini kyena, i nraahu vita kye vate i mwutukyaqitai kyuqe hi varirara variante tina, nte i nronraqama kyaurave, tura. 
Kotiva mwitaa timwa kyero qaiqaa nraahu nai mwaaquara tiqaro, Nronrao, e haaru toharera mwaa mwatara utu tonanrave. E ena kyauquqotaira nyaamwuvata utu tonanrave. 
Nyaamwuvantovata mwatavantovata hia ekyaa enta vahirara e nraahuma ekyaa enta variqira vinanrave. Tuavaaqavanto nrihiqama vintema kyero nyaamwuvantovata mwatavantovata nrihiqama quananrove. 
Tuavaaqa qaraakya utirera hiro haaruaara ntahuku kyero kyaintema kyera e nyaamwuvata mwatavata taiqa kyenanrave. Mwia taiqa virara e nraahu hia nyaapaiqama viraitira, ekyaa enta qati nraahu variqira vinanrave, turave. 
Kotiva hia nyaamwunyaahuara tiraitiro, nai mwaaquara nraahu mwaa quara tiqaro, E nritarera nina kyauqu kyaatutani variraqe nte i nramwutaahua ru taiqa kyaarira mwihuaqaa kyuqu ntamwa tera variante, turave. 
Nyaamwunyaahua mwihua okyara vahirero mwitaamama vahiro. Mwihua Kotira kyaiqa vaisivanto hia mwamwantavata vaihata mwanraqura nraahu vaihuama varita. Kotiva mwihua airi enta sitaihata uro Kotiva huvantu nyataani vaisihua kyaahaqa hi variara.