25
Isareri una variqa Baalira quahama amitora
1 Isareri vatanaaka Sitimi Uqitaini naavu maaqa kaqate vaumanta Moapi vatanaa nahenti Isareri vaiinti naaromanta vika hoqaramake Moapi nahenti hampata hampi qaramaqi ni vaura.
2 Vi nahentika Isareri vaiinti naaromanta vika Moapi nái una variqa ofaa quahama nimite vaunaini oru vaiha, una variqa unta nimito karara neha vika quahama nimite vaura.
3 Isareri mintimake Moapi hampata vohaaraqi vaiha Peora Aiqinaqaa una variqa Baalira quahama amite vauvaro vira kaara Nora Kotira arara ite vaura.
4 Noravano Kotiva Mosirara tiharo, Ne ekaa Isareri nenta qiata vaiinti ˻hampi kaiqa varaaka˼ ntita vare viri vaiinti nahenti nivuqaa arukaate. Ne mintima kaivaro kia qaiqaavata vaiinti nahentiara ti tirara itaarire, tiro.
5 Noravano minti tuvaro Mosiva Isareri nora vaiintiara mintima tiro: Ne vohaiqa vohaiqavano ekaa nenta ankuqihai Peora Aiqinaqaa Baalira quahama amiteka arukaate, tiro.
6 Minti tivakero Mosivavata vaiinti nahentivata Kotira seri naavu qentiana rate vaiha tavovaro Isareri vaiinti vovano Midianihainaa nahenti vo vita varero nai seri naavuqi oriqetora.
7 Vite oriqetovaro vaiinti vo Finiaasivavata vitanta tavora. Finiaasiva Eleasaara maaquvano vauvaro Eleasaava Kotira kaiqa vara amito vaiintira Eronira maaquvano vaura.
Ho Finiaasiva vitanta tavero, vaiinti nahenti mini kero vaaka oru nai vaantaara varero 8-9 vitanta avata varero seri naavuqi oriqetero vaantaara viraqohairo vitanta vaataqi aru tampama tovaro vaantaaravano vaiinti aru varero otu nahentivata aru ruqiakomanta vitanta qutu vura.
Finiaasiva mintiakero vitanta aru kovaro qora rovaravano airi vaiinti nahenti ari vauva taiqa vura. Vi rovarava aruqiro viharo Isareri 24,000 arukora.
10 Finiaasiva vitanta aru kovaro Noravano Kotiva Mosirara tiharo, 11 Finiaasiva tiriara noraiqaakero iriharoma, una variqa autu tuahereva ni Isareriqi qovarama vuantorave tiro vitanta aru kaivarora tiro, ti tirara itaiva humpama vimanta te kia qaiqaa ni vehi autu taiqa karerave. 12 Ho are Finiaasira mintima tiva amiane:
Te vira hampata maateraiqamake variaina uvara tiva taariraro vi uvava ekaa entama varianarove.
13 Viva tiriara noraiqaakero iriharo una variqa autu tuahereva niqi qovarama vuantorave tiro vitanta arukairave. Viva mintima keharo te Isareri qora uva nunka nimitaaina aarara ti Kotika autu timi tairara ti, vivavata, vira naintivaravata ti Kotika kaiqa ekaa entama vara timitaqi vivarave, tiro. Kotiva minti tura.
14 Isareri vaiintivano Midiani nahenti hampata vauvaro Finiaasiva aruko vaiintira autu Simirira. Simiriva Sarura maaquvano vauvaro Saruva qiata vaiinti Simionira vohaa ankuqiraava vaura.
15 Midiani vatanaa nahenti vira autu Kosibira. Vira qova Suriva Midiani anku vonavuqaa raqiki vauva vaura.
16 Noravano Kotiva Mosira tiva amiro tiharo, 17-18 Midiani vatanaaka Peora Aiqinaqaa vaiha ni navutaiqiha niara una uva tiara kaaravata, Kosibira kaaravata, ne oru Midiani hampata iqoka raqiha vika aru vehi autu taiqa kaate. Peora Aiqinaqaa una variqanavu quahama nimitaara kaara te Isareri qora rovaraqohai ntaihauna entara, Finiaasiva Midiani nora vaiinti raavura Kosibira aru kaivo, tura.