33
Isareri vo vata vo vataqi variqi vu nutura
1 Mosika Eronika Isipi ke Isareri ntita vare qumina aahara vataini katu vare aniha voqi voqi naavu maaqa kaqateha vaura.
2 Mintuvaro Noravano Kotiva tuvaro Mosiva Isareri naavu maaqa kaqate vaura, vira autu vohaiqa vohaiqa vukuqi qara ntuvatora. Vi vatukanavura autu maantimama vairo:
3-4 Haaru avuhainaa tora 15 entaqaa Isareri Isipiqihai katu vare Ramesesi mini ke anura. Noravano Kotiva Isareri vehakuma nimito entara vira qararaa Isipi vatanaaka nái qorainti vainti kara hunka qutu vuka qunte vaumanta Isareri kia Isipi naatu qetaraiti, vika nivuqaa qoqaa katu vare vi vaura. Noravano Kotiva mintiakero nai kempuka numiqeharo Isipi vika una variqa vara muntuviqama komanta 5 Isareri Ramesesi ke, vika katu vare Sukotini oru naavu maaqa kaqate vaura. (Katu Varora 12:37)
6 Qaiqaa vika Sukoti ke, katu vare aahara vata auvahini Etamini oru naavu maaqa kaqate vaura.
(Katu Varora 13:20)
7 Qaiqaa vika Etami ke, vihai anirante Pi-Hahiroti vataini kuari avu uruntonaini Baali-Sefoni vata vira tataaqa Mikadoli vatuka aumanto oru naavu maaqa kaqate vaura. (Katu Varora 14:2)
8 Qaiqaa vika Pi-Hahiroti ke, vihai Naare Namari taqa vare aahara vata Surini vura. Vika taaramo entara aahara vatavaura nuvaqi vi, Maraini oru naavu maaqa kaqate vaura. (Katu Varora 14:22; 15:22-23)
9 Qaiqaa vika Mara ke, katu vare oru Elimi vataini naavu maaqa kaqate vaura. Elimini ruvu namari 12navu vauvaro deti katari 70navuvata mini vaura. (Katu Varora 15:27) (Deti katari vaireva, vira mare vakaavara mare voqaara vaivaro deti tava vira kara naarama vairo.)
10 Qaiqaa vika Elimi ke, vihai Naare Namari vaunaini orunte naavu maaqa kaqate vaura.
11 Qaiqaa vika Naare Namari ke, aahara vata Sinive tunaini orunte naavu maaqa kaqate vaura. (Katu Varora 16:1)
12 Qaiqaa vika aahara vata Sini ke, vihai katu vare oru Dopikaini naavu maaqa kaqate vaura.
13 Qaiqaa vika Dopika ke, oru Alusini naavu maaqa kaqate vaura.
14 Qaiqaa vika Alusi ke, oru Repintimini naavu maaqa kaqate vaura. Mini namari nevavata kia vaura. (Katu Varora 17:1)
15 Qaiqaa vika Repintimi ke, aahara vata Sainaini naavu maaqa kaqate vaura. (Katu Varora 19:1-2)
16 Qaiqaa vika Sainai ke, oru Kibaroti-Hataavaini naavu maaqa kaqate vaura. (11:34)
17 Qaiqaa vika Kibaroti-Hataava ke, oru Haserotini naavu maaqa kaqate vaura. (11:35)
18 Qaiqaa vika Haseroti ke, oru Ritimaini naavu maaqa kaqate vaura.
19 Qaiqaa vika Ritima ke, oru Rimoni-Peresini naavu maaqa kaqate vaura.
20 Qaiqaa vika Rimoni-Peresi ke, orunte Lipinaini naavu maaqa kaqate vaura.
21 Qaiqaa vika Lipina ke, orunte Risaini naavu maaqa kaqate vaura.
22 Qaiqaa vika Risa ke, orunte Kehelataini naavu maaqa kaqate vaura.
23 Qaiqaa vika Kehelata ke, Seferi Aiqina auvoqi orunte naavu maaqa kaqate vaura.
24 Qaiqaa vika Seferi ke, Haradaini orunte naavu maaqa kaqate vaura.
25 Qaiqaa vika Harada ke, Makihelotini orunte naavu maaqa kaqate vaura.
26 Qaiqaa vika Makiheloti ke, Tahaatini orunte naavu maaqa kaqate vaura.
27 Qaiqaa vika Tahaati ke, Teraini orunte naavu maaqa kaqate vaura.
28 Qaiqaa vika Tera ke, Mitikaini orunte naavu maaqa kaqate vaura.
29 Qaiqaa vika Mitika ke, Hasamonaini orunte naavu maaqa kaqate vaura.
30 Qaiqaa vika Hasamonai ke, Moserotini orunte naavu maaqa kaqate vaura.
31 Qaiqaa vika Moseroti ke, Bene-Jakaanini orunte naavu maaqa kaqate vaura. (Lo 10:6)
32 Qaiqaa vika Bene-Jakaani ke, Horu-Hagitigatini orunte naavu maaqa kaqate vaura.
33 Qaiqaa vika Horu-Hagitigati ke, Jotabataini orunte naavu maaqa kaqate vaura.
34 Qaiqaa vika Jotabata ke, Abaronaini orunte naavu maaqa kaqate vaura.
35 Qaiqaa vika Abarona ke, Esioni-Gebeni orunte naavu maaqa kaqate vaura. (Lo 2:8)
36 Qaiqaa vika Esioni-Gebe ke, aahara vata Senini orunte Kadesini naavu maaqa kaqate vaura. (20:1)
37 Qaiqaa vika Kadesi ke, Horu Aiqinaqaa Idomu vata auvahini orunte naavu maaqa kaqate vaura. (20:23)
38-39 Vika Isipiqihai katu vare vuvaro 40 ihi aitarovaro 5 tora avuhainaa entaqaa Eroniva qutu vura. Kotiva tuntema kero, Eroniva Kotira kaiqa vara amite vauva oru Horu Aiqinaqaa qutu vura. Viva 123 ihi varakero qutu vura. (20:25-28)
40 Isareri vika mini vauvaro Araati avuhainaa vaiintivano Kenaani vata Nekevini vaiharo Isareri ani vau uvara irura. (21:1)
41 Isareri Horu Aiqina ke, Salmonaini orunte naavu maaqa kaqate vaura. (21:4)
42 Qaiqaa vika Salmona ke, Punonini orunte naavu maaqa kaqate vaura.
43 Qaiqaa vika Punoni ke, Obotini orunte naavu maaqa kaqate vaura. (21:10)
44 Qaiqaa vika Oboti ke, Moapi vata auvahivano vaunaini, Iye-Abarimini orunte naavu maaqa kaqate vaura. (21:11)
45 Qaiqaa vika Iye-Abarimi ke, Diboni-Gaatini orunte mini naavu maaqa kaqate vaura. (21:30)
46 Qaiqaa vika Diboni-Gaati ke, Alamonu-Dipalaataimini orunte naavu maaqa kaqate vaura.
47 Qaiqaa vika Alamonu-Dipalaataimini ke, Nebo Aiqina tataaqa Abarimi Aiqinaqaa orunte naavu maaqa kaqate vaura.
48 Qaiqaa vika Abarimi Aiqina ke, Moapi vataini vivi, Iotani Namari hini mantaraini uqita kanta naavu maaqa kaqate vaura. Vika uqita kanta vauvaro Ieriko vatukavano Iotani Namari hini mantara vuruni vaura. (22:1)
49 Vika Moapi uqitaini Iotani Namari tataaqa naavu maaqa kaqate vauvaro Beti-Jesimoti vatukavano hini mantaraini vauvaro Sitimi vatukavano hini mantaraini vaumanta Isareri vika avutana vaura. (25:1)
Noravano Kotiva vata raire okarara tura
50-51 Vika mini vauvaro hini mantara vuruni Ieriko vauvaro vi entara Noravano Kotiva Mosiva Isareri tiva nimiarire tiro, maa uvara Mosira tiva amiro tiharo: Ne Iotani Namari taqavare Kenaani vataini orunte, 52 ho vi vataraqaa varia vaiinti nahentika ekaama aru ntata kaimanta vuate. Vika una variqa maraqura aini oriqohaive ori tanaraqohaive aututaara vara rukavu raakavuma taiqake, vika una variqanavu quahama nimite varia vatukanavuravata qoraiqama kaate.
53 Vi vatava ne i vatava variarire ti, te vira ni nimuro. Ne vi vatara oru vare mini variate. 54 Ne satu arukeha vi vatara raira keha, ekaa vo anku vo anku nimiate. Airi varia ankuka nora vata rairake nimi, kia airi varia ankuka inaara vata nimiate.
55 Ne kia vi vataraqaa varia vaiinti nahentika ekaa aru ntata karaiti, hini kiaka qaqi kaivera, vika auqu vai haikava ni avuqivata vaataqivata ranteqe vaintemake, qaiqaa qaiqaavata ni qoraiqama nimitevarave. 56 Ne kia vika ekaa aru ntata kaivera, te vika qoraiqama nimitarera iritaainara, vira nintama qoraiqama nimitararave, tiro. ˻Noravano Kotiva minti tivakero Mosirara Isareri vi uvara tiva nimiane tura˼...