1 Noravano Kotiva Avuhainaava ekaa haikaqaa raqiki vaiva vairara ti, ne ekaa vo vatanaa vo vatanaaka aiqu kauqu ntiri ntiri iramanta variate.

Noravano Kotiva nai avuhainaa taintaqaa oquvi vaimanta nora enseli aroka vataaka vira hini hini variarave. Kairaro vatavano qaki qaki iarire.

2 Noravano Kotiva kempukavano Saionini vaiharo viva uritarakero ekaa naato vatanaaka Avuhainaava vaivo.

3 Naantiara ekaa naato vatanaaka vira nora autuara iriha nái kauqu runkinkiri ivarave.

Noravano Kotiva vivaqaima takuqu kero vaivama vaivo.

4 Mpo Noravauvo, are Avuhainaava kempukavano variararo ai muntukavano avuqavu ni varia okararaqai vaivara, are vi okarara tinavu Isareri humiqaaramanta tenavu vira avataqi viha vaiinti nahentiqaa raqiki vaunarave.

5 Ho ne ekaa Nora Kotira autu tuahera keha vira aiqutaraini vaiha vira quahama amitaate.

Noravano Kotiva vivaqaima takuqukero vaivama vaivo.

6 Mosika Eronika Kotira kaiqa vara amitaa vaiintitanta variavaro Samuerivavata Kotira aare vai vaiintiva vaira.

Vinavuka Nora Kotira aaraavaro viva vinavuka uva iriharo nái tiva nimirave.

7 Viva uromuravano vaavi vairaqi vaiharo nai vaiinti nahenti tiva nimimanta vika viva tivatai uvara vo uva vo uva iriqi vuarave.

8 Mpo Noravauvo, are tinavu Variqavanoma variaro.

Are ai vaiinti nahenti ai aaraa uvara iri varianarave. Vika tavaavara are vika qora kaiqa varaa uvara nunka nimite variaravama variaro.

Are vika nái qora kaiqa kaara qoraiqama nimiteharavata, vika uva nunka nimite varianarave.

9 Virara virara iriha kaiqenavu Nora Kotira nora autu amiha, vira takuqina aiqinaraqaa vaiha vira quahama amitaare.

Noravano Kotiva vivaqaima takuqukero vaivama vaivo.