13
Opoia Mo Aulu Jea
1 Vara a er̃i reti na leo nona tamlohi tinatinapua, teni na leo nona angelo na tuka, pani vara mo sopo te opoia isaku, enau na lo vaore purongo sohena belo sei mo lo tangi teni mo lo kolekole roro purongo. 2 Vara a lavi na suiha mata retimangovi, ale a levosahi na hina luhu tari peresi na lelevosahi tari, ale vara noku rasua mo r̃ilangi vara a er̃i juhati te vutivuti, pani vara mo sopo te opoia isaku, enau hina purongo matea. 3 Vara a lo sile na noku hinau tari isana tinapua, teni vara a sile na epeku vara la sulimateia, pani vara i sopo te opoia isaku, enau na sopo r̃uhu hin te hinau.
Opoia
4 Opoia na maurir̃a mo sohen harihi:
Opoia enia r̃omperavu, ale enia r̃omr̃uhu.
Opoia mo sopo mereimerei,
teni mo sopo retihapahapa.
5 Opoia enia mo sopo vai na hina mahanuhanu na naho tamlohi.
Opoia enia mo sopo opoi na masalona purongo.
Opoia enia mo sopo lolokoru vila.
Opoia enia mo sopo evi na hehe nona tinapua isana.
6 Opoia enia mo sopo avulahi na posposi hehe,
pani mo avulahi na retivarar̃uhu.
7 Opoia enia mo tatamahu mata hina r̃ilangi tari.
Opoia enia mo lo kilau mata hina r̃uhu purongo.
Opoia enia r̃omr̃ilangi mata hina r̃uhu la pa mai.
Opoia enia turu r̃ilangi tarea.
8 Opoia, i pa sopo te isoisona hin te rani pani retimangovi la pa tihai, leo tinatinapua la pa isoiso, ale lelevosahi la pa tihai.
9 Matan enr̃a r̃a levosahi makomona purongo, ale r̃a lo retimangovi makomona purongo, 10 pani vara haratu sei mo sopo vejuveju hin te suiha hatea i pala, r̃a pa sopo mele opoi la hinau sei r̃a lo vejuveju hinira nake, matan la pa tihai.
11 Hin pongi atu na lo natirihi, na retireti sohena natirihi. Na lo r̃omr̃omi sohena natirihi, noku kilakilau mo sohena natirihi. Hin pongi atu na mai tamlohi, na tau nar̃ihi na posposi nona natuvarihi. 12 Matan nake nor̃a kilakilau mo pa lo vusovusoha, pani na pongi hitahu nor̃a kilakilau i pa mera i r̃uhu. Nake na lo levosahi na makomona purongo, pani hitahu a pa levosahi vevuhia tataholo sohena God mo pete levosahi vevuhiau moiso.
13 La hinau akerihi mo tolu natu, la pa lo toho jejeu:
rasua, r̃omtoho, peresi na opoia,
pani hinau aulu hinira, enia opoia.