1 Thessalonians
Tiroma Leta
Paul Mo Ulia Isana Mara
Thessalonica
Leta Nike
Paul mo tapulo na vao kalesia Thessalonica (2.13–14), ale mo sopo kilau matan te mania, pani mo lo hani na masumasuna (2.9). Tiroma, la kalesia atu la lo lotulotu vono (1.9), pani nake la turu r̃ilangi hin Moli, ale mata nora oloolo, Retir̃uhu mo vano r̃alihi hin jara atu (1.8).
Tamlohi hai atu, la turuleji hin Paul, ale mo rovo mo vano Athens, pani mo r̃ule Timothy mo vano vara i rohira Thessalonica (3.1–5). Timothy mara mo mele hilu, mo verea isan Paul mara la lo turu r̃ilangi ale vara la lo hahau na opoia (3.6–10).
Kalesia hai Thessalonica la sopo voko, la lo toho purongo matan la lo r̃omr̃omia vara i pa sopo tuai Moli i pa mele pala na varama (4.11–12). Hai la lo r̃omkaka matan te vonara la mate moiso pani Kr̃isto mo sopo lo pala, la pa mele turu teni mo vono? (4.13–15), Paul mo retinanauhira, mo verea mara la lo hahau usuri na masalon God tarea (5.1–11).
Mo r̃uhu vara tarea r̃a lo r̃omr̃omi na sava Paul mo verea akerihi:
‘Ha avulahi tarea, ha lo tatamahu mata usiusi tarea, ha vere meje mata hinau tari, matan harihi enia masalon God hin Kr̃isto Iesu matamim.’ (5.16–18)
Hin Leta Nike
1. Retioloolo (1.1–3)
2. Tovongi mata rasua nona Kalesia Thessalonica (1.4–3.13)
3. Mauri atu God mo avulahi hinia (4.1–12)
4. Vara Moli i mele pala (4.13–5.11)
5. Isoiso Retioloolo (5.12–28)
1
1 Enau Paul na uli leta nike isamim vao kalesia sei Thessalonica, na hijan God Tama peresi Moli Iesu Kr̃isto, Silas peresi Timothy la lo toho peresiau nike.
R̃omr̃uhu peresi na tamata i pa toho isamim.
Nora Rasua
2 Kama lo vere meje isan God tarea matamim mo isoiso na nomam usiusi, 3 kama lo vere kamim isan nor̃a God Tamar̃a, mata nomim voko sei ka lo vaira mata nomim rasua, ale mata nomim vavahinau sei ka lo vaira mata nomim opoia, peresi na nomim turu r̃ilangi tarea sei ka lo vaia matan ka lo r̃omtoho matan nor̃a Moli Iesu Kr̃isto.
4 La voraiku peresi na vevoraiku r̃uhur̃uhu, God mo opoi kamim, ale kama levosahia mo r̃uhu vara God mo vir̃oni kamim, 5 matan nomam Retir̃uhu mo mai isamim, mo sopo mai na retireti purongo, pani mo mai peresi na suiha matan Tanume Tapu mo tueni kamim matan vara ha pa levosahia i r̃uhu vara Retir̃uhu enia mo varar̃uhu. Kamim ka levosahia mo r̃uhu vara posimam hin rani atu kama lo toho isamim mo sohena sava matamim, 6 ale ka lo tovongi kamam peresi Moli matan kamim ka lavi na Retir̃uhu, hina purongo vara ka lavi na rongohaji sasati matana, pani ka avulahi na avulahi non Tanume Tapu, 7 matan ka mai sohena tovongi matea isana tamlohi rasua tari Macedonia peresi Achaia. 8 Mata reti non Moli sei mo lo malue isamim mo roroa Macedonia peresi Achaia, ale nomim rasua hin God mo roroa na jara tari, ale mo vaia kama sopo er̃i mele vere te hinau mata nomim rasua isara. 9 Matan enira hasera la lo mele verea vara ka lavi kamam na posposi r̃uhu sohena sava na nomam hahau. La verea sohena sava ka vahar̃i na tamasi, ale ka posi ka vano isan Moli matan vara ha volitusi isan God varar̃uhu sei mo lo mauri, 10 ale ka lo saovi matan Natuna sei i pa tai na tuka, God mo sauteterahia na mateia, Iesu, enia mo jurir̃a na talai lolokoru non God mata hehe sei mo lo mai.