Leta
Paul Mo Ulia Isana Mara
Philippi
Leta Nike
Paul mo uli leta nike na ima r̃ilangi (1.7) vara i vere meje isana kalesia Philippi mata nora otori peresi nora usiusi matana (1.5; 4.10–19). Mo lo kilau toho vara i pa materi matan vara i er̃i mele retivujavujangi na Retir̃uhu (3.17–19). Pani mo levosahia vara korong la pa vilimateia hin ima r̃ilangi atu (1.21; 2.17; 3.10).
Philippi mo lo toho auta Greece hin jara atu la tovia Macedonia. Paul mo tapulo na vao kalesia atu Philippi usuri na nona retivujavujangi ea (Acts 16). Ale mo retir̃oar̃oahaira vara la pa lavi na rani r̃ilangi sohen Paul mo lo lavia moiso. Pani mo verea isara mara vara i sohena, ler̃uhu non God i pa toho isara matana (1.28–30).
Paul mo verea isara mara la pa lo kilau matan la tamlohi atu la lo posi na vujangi tataholo non Kr̃isto (3.2–11). Paul mo avulahi tavera, hina purongo mo lo toho na ima r̃ilangi matan Kr̃isto. Paul mo verea mara la pa hahau jara matea (2.2; 4.2–3) ale vara la pa usuri na r̃omr̃omi non Kr̃isto Iesu sohen harihi:
‘R̃omimim i pa sohena r̃omin Kr̃isto Iesu,
hina purongo vara tiroma enia God tataholo,
enia mo sopo r̃omr̃omia vara i taurilati r̃omr̃omi atu vara enia God,
pani mo hasena taua sivo atano
mo mai sohena volitusi matea tataholo,
ale mo vora mo mai mo sohena tamlohi purongo,
ale mo hasena taua sivo atano,
ale mo oloolo mo kakau na nona mateia,
mateia atu enia mateia sasati
mata talai na talopeilopei matea.’ (2.6–8)
Hin Leta Nike
1. Retioloolo (1.1–11)
2. Maurin Paul (1.12–30)
3. Maurin Iesu (2.1–18)
4. Retisohai Hin Te Tapalan Paul (2.19–30)
5. God Mo Lavir̃a (3.1–4.9)
6. Paul Mo Vere Meje Isara (4.10–20)
7. Isoiso Reti (4.21–23)
1
1 Enau Paul peresi Timothy, kamam kama slev non Kr̃isto Iesu, kama uli leta nike isana tamlohi vir̃oni non God hin Kr̃isto Iesu la lo toho Philippi, peresi la haratu la lo tiroma na tamlohi peresi la haratu la lo deacon ea. 2 R̃omr̃uhu peresi na tamata non God Tamar̃a peresi Moli Iesu Kr̃isto i pa toho isamim.
Usiusi Non Paul
3 Vara na lo r̃omr̃omi kamim, tarea na lo vere meje isan God matamim. 4 Ale na rani na lo usiusi matamim sohena, na lo usiusi na noku r̃omavulahi, 5 matan kamim ka tapala na vavahinau mata Retir̃uhu, mo tapulo na tiroma rani mo tikeli nake, 6 Na levosahia mo r̃uhu vara haratu mo lo tapulo na vavahinau r̃uhu na maurimim, i pa lo vaia i tikeli rani atu Iesu i mele mai, ale i pa mai na isoisona.
7 Mo tataholo vara a r̃omr̃omia sohena matamim matan noku opoia matamim mo tavera jea, hina purongo vara na lo toho nike na ima r̃ilangi teni vara a lo matahi na Retir̃uhu sei ka lavia, teni vara a lo vujangia vara enia mo retivarar̃uhu, ale mata r̃omr̃uhu non God, enr̃a mo isoiso r̃a tapala matana. 8 God mo levosahia vara na lo opoi kamim, mo tataholo na opoia non Kr̃isto Iesu isamim. 9 ale harihi enia noku usiusi: vara nomim opoia i pa lo ulua i tavera tarea, na lo usiusi vara ha ulua na nomim levosahi r̃uhu tari peresi na rongovosahi na hinau mo varar̃uhu, 10 matan vara ha pa er̃i rongovosahi na sava natu, mo tataholo vara ha vaia, ale matan haratu, ha pa er̃i toho vokevoke i pa sopo tea i tuvai kamim i tikeli rani atu Kr̃isto i mele mai, 11 ale ha pa mar̃ivi na vua mata mauri tataholo sei mo tai isan Iesu Kr̃isto, i pa vai na tamlohi la tahe na hijana, ale la pa sile na hasohaso isan God.
Retivujavujangi Hin Kr̃isto
12 Ale la vorai peresi na vevorai, na opoia vara ha pa levosahia vara sava rani r̃ilangi mo mai isaku nike, mo mai matan vara tamlohi matuvana la er̃i rasu na Retir̃uhu. 13 Ale matan haratu, tamlohi vuro tari non Supen Rome sei la lo kilauau nike, peresi na tamlohi tari la levosahia vara enau na lo toho na ima r̃ilangi matan Kr̃isto. 14 Matan na lo toho na ima r̃ilangi nike, Moli mo vai na r̃omr̃omi nona vorai kalesia nike la r̃omr̃ilangi vara la pa vereuli na Reti non God la sopo matahu matana.
15 Varar̃uhu tamlohi hai la lo retivujavujangi hin Kr̃isto na nora mereimerei, na nora r̃omaulu, pani hai la lo vaia na posposi tataholo. 16 La haratu hitahu, la lo vaia na nora opoia matan la levosahia vara enau na lo toho na ima r̃ilangi matan na lo matahi na Retir̃uhu. 17 La haratu tiroma la lo retivujavujangi hin Kr̃isto na r̃omaulu, r̃omira la sopo tataholo, la lo r̃omtau vara la pa mele vai na noku rongohaji i mele tavera nike na ima r̃ilangi matana. 18 Pani mo sopo te hinau hinia. Hinau aulu hinia, enia vara tamlohi la retivujavujangi Kr̃isto, hina purongo vara la lo vaia na nora tapnetano teni la varar̃uhu. Matan haratu na avulahi, ale a pa lo avulahi, 19 matan na levosahia vara nomim usiusi peresi na tuetueni sei Tanumen Iesu Kr̃isto mo silea, sava mo masese isaku, isoisona God i pa juriau.
Paul Mo Mauri Matan Iesu
20 Na levosahia mo r̃uhu, ale na lo r̃omtoho vara a pa sopo vai te hinau vara i er̃i vaiau a mahanuhanu matana, pani na noku r̃omr̃ilangi nake sohena tarea, a pa lo sile na oloolo isan Kr̃isto na hinau tari na lo vaira, vara a mauri teni a mate. 21 Matan isaku, mauri enia matan Kr̃isto, ale mate, i pa mele r̃uhu. 22 Vara a lo mauri hin epe nike, enia masapa vara noku vavahinau r̃uhu la pa vuaha. Pani na sopo levosahia vara sahara mo mele r̃uhu, 23 r̃omiku mo opoira enira rua. Na opoia vara a malue a toho peresi Kr̃isto matan haratu mo r̃uhu jea, 24 pani i pa mele r̃uhu jea isamim vara a lo mauri.
25 Matan na levosahia mo r̃uhu vara a lo mauri, a er̃i tueni kamim mo isoiso, ale ha pa ulua na avulahi na nomim rasua, 26 matan vara ha pa hasohaso Kr̃isto Iesu mata mo tinar̃ihia vara a mele toho peresi kamim.
R̃a Pa Tamlohin Tuka
27 Hinau aulu enia harihi: vara ha hahau na malele mo tataholo na Retir̃uhu non Kr̃isto, matan vara a mai a hite kamim teni vara a rongo te sorasorahimim, a pa levosahia vara ka lo turu r̃ilangi jara matea sohena tamlohi matelete, mata matahi na sava Retir̃uhu mo vujangia, 28 ale ha sopo matahuni la haratu sei la nomim meresahi, matan nomim rasua enia i pa matamata mera matea isara mata vujangira vara maurira la pa sopo juri, pani kamim ha pa juri, harihi God i pa vaia. 29 Matan God mo taua vara ha pa sopo rasu Kr̃isto purongo, pani vara ha pa lavi na rani r̃ilangi matan Kr̃isto, 30 matan na levosahia vara ka lo lavi na rani r̃ilangi sohen ka hitea isaku hin rani atu na lo toho peresi kamim, ale nakerihi sohena na lo lavia na ima r̃ilangi.