1 Ika ya'rirã baaikaᵽi maekarakakuri mija ᵽõ'irã yeyarãñu. Torã eyatirã Tuᵽarã majaroᵽũñu o'oekarã ãñu uᵽakaja yibaarãñu. Mia je'e: “Ĩ'rĩkate ba'iaja baamaka ĩaekarã jaijeyobaabaraka ĩ'ᵽarã, maekarakamarã ‘Rita sime. I'suᵽakatakaoka kibaaraᵽe’, ãñurãte imajĩkareka, okajierika sime kika”, ãrĩwa'ri sabojayu. 2 Bikija ĩ'ᵽakuri mija ᵽõ'irã yituraᵽakareka, ba'iaja baairãte jia yokajããraᵽe “Ba'iaja nabaaika naja'atarũ”, ãrĩwa'ri. Mae mija ᵽõ'irã imabeririᵽotojo ᵽaᵽeraᵽi, “Ba'iaja mija baaika mija ja'atabe”, ñañu ba'iaja baarijayurãte. Aᵽerãᵽitiyika ba'iaja baabaraka nimamaka ñiaeyarãkareka, ba'iaja nabaaika waᵽa tĩmarĩji nare yibaarãñu. 3 “ ‘Rita Cristore õñuaᵽi mibojarijayu’, yija ãrĩwãrũokaro'si, kirika yijare mibeabe”, mija ãñua sime. I'suᵽaka simamaka, kirikaᵽi tĩmarĩji nare yibaamaka ĩawa'ri “Cristore jã'meika uᵽakaja kirikaᵽi jairijayuka Ᵽablote ime”, yireka mija ãrĩwãrũrãñu je'e. Okajãjimarĩa imabeyuka Cristo mijaka. Ba'iaja baairãte jiamarĩa jũaokaro'si kirika baabearimaji kime. 4 Muᵽaka ᵽo'iki imariᵽotojo, yaᵽua tetaekarã kire naᵽatakĩaeka simamaka, okajãjimarĩki uᵽaka Cristore reyaeka mija õñu. I'suᵽaka kire nabaako'omakaja, Tuᵽarãrikaᵽi ãrĩwa'ri õñia kime mae. Cristorirã imarĩ, kiuᵽakaja okajãjimarĩrã yija ime ᵽo'imajare yijare ĩamaka. I'suᵽaka simako'omakaja kirirã imarĩ, Tuᵽarãrikaᵽi ãrĩwa'ri kiyaᵽaika uᵽakaja yija baarijayu. I'suᵽaka imarã imarĩ, saᵽi ãrĩwa'ri mija ᵽõ'irã ba'iaja baairãte tĩmarĩji yija baarãñu, jia nayi'rirũ ãrĩwa'ri.

5-6 Mija ĩabe. Cristore mija yi'yua ᵽuᵽajoatirã “¿Yaje rita Jesucristore yi'yurã maime?”, mija ãrĩᵽuᵽajoabe. “¿Mija ᵽuᵽakareka Cristore ña'rĩjãikarã mija ima õrĩbeyurã mija bai je'e?” Toᵽi ᵽuri “Jesúre maᵽuᵽakarã ña'rĩjãiberikarã maime”, ãñurã ᵽuri kire yi'ribeyurã nime. I'suᵽaka simakoᵽeko'omakaja “ ‘Jia kire yi'yurã yija ime’, ãñurã mija ime”, mijareka ñarĩᵽuᵽajoayu. Suᵽa imarĩ mamarĩtaka kirika bojariroka mijare yija bojaraᵽaka ã'mitiritirã jia kire mija yi'raᵽaka simamaka, “Rita, Cristore nare õrĩrũjeikaᵽi Ᵽablorãkare yijare bojarijayu”, ãrĩwãrũirã mija ime. 7 Ba'iaja baabaraka mija ima yija ĩaeyarãkareka, Cristore yijare sajã'metika simamaka, jiamarĩa mijare yija jũarũjerãñu. I'suᵽaka mijare yija baarãkareka “Cristore nare jã'meikaᵽi i'suᵽaka Ᵽablorãkare mare baayu”, mija ãrĩwãrũrãñu. I'suᵽaka mijare baariyaᵽaberiwa'ri ba'ia mija baakoreka Tuᵽarãte mijaro'si yija jẽñeĩjirijayu. Suᵽa imarĩ Tuᵽarãte yaᵽaika uᵽakaja mija baarãkareka ᵽuri, ba'iaja mijare yija baabesarãñu. Suᵽa mijare yija baabeᵽakã'ã ĩatirã “Yaje rukuya Cristore jã'meikaᵽi tĩmarĩji yijare nabaatiyajĩñu”, yijareka mija ãrĩkoᵽejĩkaoka, marã imabeyua yijaro'si. I'suᵽaka simako'omakaja kiyaᵽaika uᵽaka oyiaja mija baaritakaja yija yaᵽayu. 8 Suᵽa imarĩ mija ᵽõ'irã yija eyarũki ruᵽu kiyaᵽaika uᵽakaja baatikarã mija imarãkareka ᵽuri kijã'meikaᵽi ba'iaja mijare yija jũarũjebesarãñu. Kiyaᵽaika uᵽakaja Cristore yijare jã'metikarã imarĩ, mijare jeyobaarimaja yija ime, ba'ia uᵽakaja mijare baabekaja. 9 Suᵽa imarĩ mija ᵽõ'irã eyatirã, jia Cristore yi'yurã mija ima ĩawãrũtirã okajãjiaᵽi mijare yijaibesarãñu. “Okajãjimarĩrã imarĩ, Cristorikaᵽi Ᵽablorãkare beabeyu”, yijareka mija ãrĩkoᵽejĩka, marã imabeyua yijaro'si. Jia mija yi'ᵽakã'ã ĩawa'riji, jia jĩjimaka imarũkirãja yija ime. Suᵽabatirã “Mire ã'mitiriᵽẽawa'ri miyaᵽaika uᵽaka oyiaja nabaarũ”, ãrĩwa'ri, Tuᵽarãte mijaro'si yija jẽñerijayu. 10 I'suᵽaka simamaka mija ᵽõ'irã eyatirã, okajãjiaᵽi mijare yijairiyaᵽabeyu. Suᵽa imarĩ ya'rirã baaika ruᵽu, ika ᵽaᵽera mijare yiᵽũatayu jiibaji Jesúre yi'ᵽaraka mija imaokaro'si. I'suᵽaka mijare baarimaji ñimaokaro'si Maiᵽamakite yijare jã'meka. Suᵽa imarĩ kire mija yi'yua bitatarikoᵽakaja jiibaji kire mija yi'ririjayaokaro'si mijare yija jeyobaarijayu.

11 Õ'õjĩrãja mijaro'si yo'oyu yijeyomarã. Jia mija imabe, Jesúre yaᵽaika uᵽaka oyiaja baabaraka. Ritaja ika ᵽaᵽeraᵽi mijare yibojaika jia ã'mitiriᵽẽabaraka mija imabe. Ĩ'rĩka uᵽakaja ᵽuᵽajoabaraka, oka imarijarirãkaoka jiaᵽi sajiebaraka mija imabe. I'suᵽaka mija baamaka, Tuᵽarã, mare wayuĩarimajire, mijaka imajiᵽarãñu. Suᵽabatirã jĩjimaka mare imarũjeiki kime. 12 Jesúre ã'mitiriᵽẽairã imarĩ, mija rẽrĩrijayu ᵽoto jia jĩjimakaᵽi jẽñebu'abaraka mija imarijaᵽe.

13 Õ'õkarã Jesúre ã'mitiriᵽẽairã, “Jia nimarũ”, ãrĩwa'ri oka mijaro'si naᵽũatayu. 14 “Jia nare mibaabe”, ãrĩwa'ri maiᵽamaki Jesucristore mijaro'si yijẽñeyu. “Suᵽabatirã Tuᵽarãte mijare wayuĩaika jia õñurã mija imaokaro'si, suᵽabatirãoka Esᵽíritu Santo jia mijaka imajiᵽarijayuka kimarũ”, ãrĩwa'ri ritaja mijaro'si yijẽñeĩjirijayu yijeyomarã.

I'tojĩrãja sime ruᵽu.