5
Kristen numi kafin diim kuguup mafak umi kubaganu kupka-sulup umi sang uta ko
(Jon 13:34-35, 15:11-17, 1 Kor 13:1-13, 1 Jon 2:7-11, 3:11-18,23)
1 Waantap ita utamipta e, aafen Yesus beyo God imi ulaa dula kamok kesa tinum kalaa agelip umdii, bilip iyo God imi man kale, waantap ita Aatum God imi aget uyo kobela umdii, beyo unang tinum God imi man kelin bilip imi aget uyo kobe no kelan-tema ko. 2 Kale kanube nuyo God imi aget uyo kobe-nulup God imi weng kwep daasa uyo waafulup umdii, bota kafalepmuta, nuyo utamupta e, aafen nuyo yak God imi man kebelin bilip imi aget uyo kobe-sulup kalaa agelan-temup ko. 3-4 Kale kanube God imi weng kwep daasa uyo waafulup umdii, bota kek kek iyo kafalepmuta, numi God imi aget kobe-sulup uyo kulbu kalaa agelan-temip kale, God imi man kebe-sulup nuyo Yesus imi ilak dolupta, imi om kun uyo numi diim abelu imkalata, nuta nuta ke kafin diim komi kuguup mafak uyo kubaganu kupkaa nuta nuta ke-nulupta, God imi weng kwep daasa uyo bong fagamin binim, abo dulu-sulup ko. 5 Kale waantap ita kafin diim komi kuguup mafak uyo kubaganu kupkaa ita ita kelan-temip a? Unang tinum bogo-nilip, “Aafen Yesus beyo God imi Man o,” agan-nuubip bilip ita kup ita ita ke-nilipta, kuguup mafak uyo kubaganu kupkalan-temip kuba.
God imi Yesus Krais imi sang unang tinum imi kafalemsa uta ko
(Jon 1:29-34, 5:32-37)
6 God imi Yesus Krais imi sang bogo-se uyo kulbu kale, Jon Baptis tebe Yesus ok sam ugobe-se uyo, ok bota tebe kafalebe-nulu e, “Keyo God imi Man o,” agelu be nala e, Yesus imi kaan-se ugol mungkup imi isak singkam daa-suu uyo kafalebe-nulu e, “Keyo God imi Man o,” age-suu no ko. Ok uta kup Yesus imi magam uyo kafalebesaalu kale ki, ok sino isak so alop uta Yesus imi magam uyo kafalebe-suu ko. Kale God imi Sinik iyo fen tuluun weng uyo baga-e-bom kafale-bom kemin tinum kale, yagal mungkup Yesus imi sang uyo tuluun baga-em-nuuba ko. 7-8 Kale Yesus imi ok sam ugo-se imi iibak tem sino imi kaan-nala isak singkam daa-suu umi iibak tem sino alop uyo kemanu tele utamupta e, Yesus iyo God imi Man kalaa agesup kale, God imi Sinik yagal mungkup numi bogobe-nala e, “Aafen o,” agan-be no kale, iibak tem asuno boyo maagup ko. 9 Kale nuyo tinum imi weng kupka-e-bilip uyo tinangkan-nuubup kuta minte, God imi weng bagan-nuuba bota uta uta ke tinum imi weng uyo kubaganebesu kale, God imi weng asuno ko bogo-se boyo ki imi Man Yesus imi magam sang uta bogo-se ko. 10 Tinum iyo maak God imi Man imi ilak dola umdii, beyo God imi weng uyo tinangku waafula iyo kulba kuta minte, tinum iyo God imi Man imi magam sang bogo-se uyo tele tinangkulin-tem kela umdii, bota kafalepmuta, utamupta e, tinum beyo bogo-nala, “God iyo bisop bagamin tinum o,” agan-be kalaa agan-nuubup ko. God iyo bogo-nala e, “Keyo nimi Man o,” agesa kuta minte, tinum beta bogo-nala e, “Yesus iyo God imi Man ba o,” agan-be kale, imi weng bomi magam uyo ki, “God iyo bisop bagamin tinum o,” agan-be ko. 11 God imi weng kam agesa umi weng miton uyo kulbu kale, God imi aget uyo ki, suun nin unang tinum kelin o age-nalata, imi Man daala tal at diim kaan-nalata, numi ilim uyo bolata, kota mitam imi suun nin unang tinum ke-sulup ko. 12 Kale waantap ita God imi Man iyo bilip imi diim igalak bala albip umdii, bilip iyo suun nin unang tinum kebip iyo kulbip e minte, waantap ita God imi Man iyo bilip imi diim igalak bala albaalip umdii, bilip iyo suun nin unang tinum iyo kulbaalip no ko.
Numi suun nin unang tinum ke-sulup umi sang uta ko
(Jon 3:14-17, 5:24-29,39-40, 6:47-58, 11:23-27, 17:2-3, Rom 6:22-23, 1 Kor 15:35-58)
13 God imi Man Yesus imi ilak dolin ibe. Niyo suuk kon koyo kanube dola kopmita, utamipta e, aafen nuyo suun nin unang tinum ke-sulup kalaa agelin o ageta dola kopmi ko. 14 Nuyo God imi diim iinup kota, utamupta e, God beyo tii kalaa agebup kale, nuyo imi, mufekmufek numan o agan-be uyo dagalup umdii, tinangku-nala e, yan kepman-tema kale, 15 nuyo tol kup utamupta e, God iyo intaben intaben sang dagalan-temup uyo suun kup tolong dugan-boma kalaa age utamsup kale, boyo mungkup utamupta e, God iyo, “Kobelan-temi o,” agesa kale, intaben intaben sang dagalan-temup uyo yan kebe kupka-e-bon-tema kalaa agelan-temup no ko.
16 Alugum kuguup mafak mafak boyo fengmin uyo kulbu kuta, fengmin umi windu alop uyo kulbu kale, God iyo maak umi sang uta kup bogo-nala, “Atin boyo fengmin mafak kale, tinum iyo dok ita kanuma umdii, beyo maagalo kelan-tema o,” age-nala e minte, maak bomi sang uta kam agelin-tem ke no kesa ko. Kale nuyo utamupta, nugum imi kuguup fenga-be boyo God imi bogo-nala, “Atin mafak o,” agesaala uyo kulbu kalaa agelup umdii, nuyo God imi olabelupta, God iyo ulaa du dong dogobelata, mitam waalan-nalata, suun nin tinum kelan-tema ko. Kale minte fengmin atin mafak uta kulbu no kale, kanube tinum iyo maak kanupmin kuguup koyo fengama umdii, beyo suun nin tinum kelan-temaala kale, bemi sinik uyo win binim ke maagalo kelan-tema kale, kanupmin fengmin boyo numi beten ke-emin bomi sang uyo baganbaali ko. 17 Alugum kuguup tambal binim boyo fengmin uyo kulbu kuta minte, fengmin maak umi sang uyo God iyo bogo-nala, “Tinum tebe kanupmin bo fengama umdii, beyo maagalo kelan-tema o,” age titil weng uyo bogosaala binim ko.
18 Nuyo utamsup kale, tinum iyo maak mitam God imi man kela uyo, fengmin kuguup uyo waafu-bon-temaala ko. Kale boyo ki God imi Man iyo tiin mo-bom-balata, tambaliim kup alba kale, Tinum Mafagim iyo dogobeta sagaal togobe dufak daa-nama binim ko.
19 Nuyo utamsup kale, nuyo God imi man kelup iyo nuyo igalak bom tiin moba kuta, Tinum Mafagim ita kafin diim tinum migik imi kamok ke-bom-nalata, biinga imdala unbip talbip ke-bomta, kuguup mafak kem-nuubip ko.
20 Nuyo utamsup kale, God imi Man iyo malaak tal-nalata, dong dogobe kafalebe bam daa imolata, kota utamupta e, aafen God be aafen kalaa age-nulupta, nuyo tuluun tinum God sino imi Man Yesus Krais so ulimal albup ko. Kale Yesus Krais yagal aafen God e minte numi suun nin unang tinum kemin umi magam iyo kulba no ko.
21 Nimi mulup tan ibe. Ibo men amem min mufekmufek bisop aman duga-emin boyo atin umik ugobe kupka-nilipta o ageta ko.