9
1 Aañ yaꞌ pɨx juugɨt pu chuꞌm tu jam uaꞌñdhaꞌ dhiꞌ nañ bhaan tu aꞌga na pim tu makiaꞌ gu tuumiñ nach baꞌp ja makiaꞌ gu jaiꞌch Xoiꞌkam jɨɨgiꞌñdham. Cham tuꞌm aaꞌ guꞌ nañ gɇꞌ muiꞌp tu jam uaꞌñiꞌñdhaꞌ gu puiꞌ jaꞌk, 2 ba xi jam maat iñ guꞌ na pim jir jix bhabhaiꞌkam. Jix bhaiꞌñ chaatɨt jañ ja aagiꞌñ guch Xoiꞌkam jɨɨgiꞌñdham guiꞌ nam Masedoonia oiꞌdhaꞌ na pim aapiꞌm Akaaya kam cham tuꞌ bhaan jax ji chɨꞌji tu makiaꞌ na paiꞌ dhuuk puꞌñi ba tum aagidhaꞌ, na pimɨt guꞌ maakɨꞌn cham jax ji chɨꞌɨɨk tu maa. Baꞌ na ñich puꞌñi ja tɨɨꞌn, muiꞌ mɨt jum guꞌnguxdhak tu maa jɨꞌk nam puiꞌ pup jum duuk. 3 Mɨjɨñ baꞌ xi jam joochxidhaꞌ dhiñ jaaduñ nañ ja aaꞌ, na baꞌ gɨt iam puiꞌ ji chu buusniaꞌ nañ jax ja tɨtda jaiꞌ kap guch Xoiꞌkam jɨɨgiꞌñdham na pim aapiꞌm bɨxchuꞌ kɨꞌn pɨx jir jix bhabhaiꞌkam. 4 Jir jix xiꞌɨraam guꞌ noꞌ mɨt jax dhuuk jɨꞌk maap jim daagɨk guch Xoiꞌkam jɨɨgiꞌñdham muñ baidhak nam jix maachik noꞌ moor puiꞌ nañ jax jam aaꞌ. Jaiñ noꞌ pim guꞌ cham puiꞌ ɨlhiiꞌñ na chich bhammɨ dɨr ji bubua, bhaiꞌ bach xiꞌɨrbo chich dho guꞌ jam bɨɨm. 5 Puꞌñi kaiꞌñkam jañ baꞌ bɨɨpɨꞌ muiꞌ ba ja jootos dhiñ jaaduñ nam baꞌ bhammɨ dɨr ɇɇji jaiꞌ jam palhbuidhaꞌ na pim jumpadaꞌ guiꞌ na pim jɨꞌk puiꞌ tu makiaꞌ ɨp gio na pimɨt jax tɨi maakɨꞌn. Dhiꞌm baꞌ bhaan bach jɨɨgiꞌñdhaꞌ gu jaiꞌch Xoiꞌkam jɨɨgiꞌñdham nar sɨlhkam puiꞌ nach jax kaiꞌch, na pim guꞌ joidham jix chu joiꞌmdat ba tu makiaꞌ cham daꞌdat.
Na ba ja aagiꞌñdhaꞌ gu Paablo na jaꞌxbuiꞌp tu oraaꞌ gu jaroiꞌ jɨꞌx na tɨ ɨxiaꞌ
6 Jup kaiꞌchdhaꞌ am gu jaꞌtkam na saak gu jaroiꞌ noꞌ gɇꞌ tɨ ɨs, gɇꞌp tu ordaꞌ, baꞌ gu jaroiꞌ na palhɨɨp tɨ ɨsdaꞌ, palhɨɨp tu ordaꞌ ɨp. 7 Baꞌ aapiꞌm puꞌñi na pim tu makiaꞌ gu tuumiñ, jaꞌkbuiꞌ pim tu makiaꞌ na pim jɨꞌk ɨlhiiꞌñ nar am na pim baꞌx bhaiꞌm taatɨt tu makiaꞌ, ni ku cham jaroiꞌ jam chiandaꞌ ɨp. Jix joiꞌgɨꞌndaꞌ guꞌ gu Dios gu jaroiꞌ nax bhaiꞌm taatɨt tu maakdaꞌ. 8 Gio guꞌ gu Dios pɨx bɨɨx tu jam maak tuꞌ nam aaꞌ, jaiꞌ pup xi jam bipioꞌ na pim baꞌ puꞌñi miꞌ dhɨr ja makiaꞌ gu jaiꞌ nam cham tuꞌ biaꞌ, piam gu tuꞌ na kɨꞌn jax jum duñiaꞌ na jax jix kɨɨꞌ kaꞌm nɨiꞌñ gu Dios. 9 Na guꞌ jaꞌpnim kaiꞌch maaꞌn kap nat paiꞌ tu uaꞌnak maadɨt gu bɨjɨk dɨr kam:
Xi ja makiaꞌ ap gu tuꞌ nap biaꞌ guiꞌ nam cham tuꞌ biaꞌ ni jɨꞌx,
gammɨjɨ baꞌx bhaiꞌ ba tum jimdaꞌ sia nar paiꞌ dhuuk kaꞌ gɨt noꞌ pich puiꞌ duu.
10 Baꞌ gu Dios pɨx bɨɨx aixim tuꞌm jam makiaꞌ gu kaichuk na pim baꞌ tɨ ɨsdat tu kuaꞌdaꞌ, jir guiꞌ gaꞌn guꞌ gu kaichuk dhiꞌ na bɨɨx aixim tuꞌm jix jaiꞌch. Gio gu Dios pɨx dɨɨlh jup tu duiñchuꞌndaꞌ nax kɨɨꞌ gɨgɨꞌrdat gɇꞌgɇr iibhaiꞌñchardaꞌ gu jam gaa, gam na pim gɇꞌ tu ordaꞌ. Dhiꞌ pɨx baꞌr jam maiꞌchɨk kaꞌ na pim ba tu makiaꞌ gu tuumiñ. 11 Gammɨjɨ bɨɨx aixim tu jam maakidhaꞌ gu Dios tuꞌ nam aaꞌndaꞌ, muiꞌ nammɨ ji chu jam kɨɨxdhidhaꞌ na pim baꞌ aapiꞌm miꞌ dhɨr jup ja maakdaꞌ guiꞌ nam puꞌñi cham tuꞌ biaꞌ. Gio guꞌ guiꞌ na pim xib jumpadai bhach joochxidhaꞌ, pu kaiꞌñkam ja makiaꞌ ich gu jaiꞌch Xoiꞌkam jɨɨgiꞌñdham nam baꞌ miꞌ dhɨr jam aꞌmkam taxchaabgidhaꞌ gu Dios na tu jam maak. 12 Nach guꞌ cham tuꞌ dai pu kaiꞌñkam pɨx ja maak gu tuumiñ guch Xoiꞌkam jɨɨgiꞌñdham nam baꞌ ba biaꞌkaꞌ nam kɨꞌn sabaꞌdaꞌ gu tuꞌ, guꞌ jaꞌpji dhiꞌ kɨꞌn jup jum guꞌnguxiꞌñ am nam jam aꞌmkam taxchaabgiꞌñ gu Dios. 13 Pu kaiꞌñkam jix bhaiꞌm ɨlhdhai taxchaabgidhaꞌm ɨp gu Dios, na pim miꞌ puiꞌ jiim na jax jum kaiꞌch gux bhaiꞌm kaiꞌchdham ñioꞌkiꞌñ guch Xoiꞌkam dhiꞌ na pim puiꞌ bhaan jup tu aꞌga ɨp aapiꞌm, dhiꞌ bhaan machiaꞌ am guꞌ na pim muiꞌ ba ja joochxidhaꞌ gu tuumiñ. Sia dhiꞌ bhaan taxchaabgidhaꞌm ɨp gu Dios noꞌ pimɨt muiꞌ maap jumpadak muiꞌ xi ja joochxi. 14 Gio guꞌ xi jam joiꞌmdat jam aꞌmkam tu daan am, nam guꞌx bhaiꞌm taat na pim jir jix bhabhaiꞌkam, nam guꞌx maat nat gu Dios pɨx dɨɨlh puiꞌ jaꞌk jam jurtuda na pim jix ja joiꞌmdat ja palhbuiꞌñdhaꞌ gu jaiꞌ. 15 Aach puiꞌx bhaiꞌch chaatɨt jup taxchaabgiꞌñ gu Dios nat pu chuꞌm kɨꞌn jich dharai nach tuꞌ bhaan ba tu juan xib, cham bhaaiꞌ nach jax pɨk jaꞌk xi taxchaabgiꞌñdhaꞌ gɨt.