1-2 Eni ga pjãy roy tjwe koshërwa woydë ameshko ga Timoteo ichororwa jek bomi ĩk, ga tjawara beno tjeng Atenas kjokyo tjoksa. Timoteo, e bi kjl̈ara, e parkë shäng Sbö kong, Cristo roy pjl̈ú l̈ë oba kong borwa tjok. Ichororwa jek bomi kjimtë, pjãy mär Jesús go jek këgong wl̈o, 3 l̇l̇ëbo tjwe kjang bomi kongshko ga pjãy wotjl̈ĩk Jesús rayë l̇l̇ëm wl̈o. Shji shdungoba song eni, e miydëmi l̈öng pjl̈úe. 4 Tjawa l̈öng bomi tjok obishko ga l̇l̇ëbo wen tjwe bi kong owa ara l̈ororwa bomi kong. Ga miydëmi ga shäryono eni. 5 E kjĩshko ga l̇l̇ëye koshoror ame, ga tja no ichono bomi ĩk, pjãy mär l̈öng Jesús gore ĩya wl̈o. Pjãy woyotjl̈ĩn ara, pjãy jyãpgwara Ärë ga pak shäryororwa l̈i beno tjwl̈õ ame, e bangkjrotë.

6 Gueniyo ga Timoteo tek shrono shäng iröng obishko ga pjãy roy söra pjl̈úe. Pjãy mär l̈öng Jesús go ĩyado l̈e. Pjãy ëng woydë ara kar kar l̈e. Tjawa woyotjl̈ĩmi, woydëmi l̈öng ĩyado l̈e. Tjawa ĩmi woydë ara, pjãy ĩnwa woydë sorë ga eni l̈e bakoe.

7 Pjeyoga, l̇l̇ëbo wen borwa kong owa ara. Gueniyo ga tjawa ber l̈öng wopjl̈ú, pjãy mär l̈öng Jesús go l̈i roy shrono borwa kong kjĩshko. 8 Pjãy mär l̈öng Tjl̈apga Jesús go jl̈õkoyo l̈i roy kurorwa. E kjĩshko ga tjawa beno l̈öng wopjl̈ú anmoyõ. 9 Tjawa wopjl̈ú Sbö tjok ara bomi kjĩshko. Tjawa syõshtë Sbö kong bomi kjĩshkoshko ga tjawa wopjl̈ú erä. 10 Shkë dba ga rokërwa ba kong ga tjawa kjimte äär bomi ĩk obi wl̈o, pjãy kjimtërwa mär Jesús go jek këgong wl̈o bakoe.

11-13 Woydërwa ga bi Data Sbö, bi Tjl̈apga Jesús, tjawa kjimte äär bomi ĩk wl̈o. Rokërwa Tjl̈apga kong ga pjãy kjimte ëng woydë ara kar kar jek këgong, pjãy kjimte obl̈ë woydë ara, pjãy woydërwa sorë ga eni, pjãy ie ber l̈öng wokjang jek këgong, pjãy jëk l̈öng pjl̈o bek wl̈o, Tjl̈apga Jesús tjwe iröng ba nopga iak beno tjeng dboy Sbö kong l̈i tjokshko ga pjãy pogo l̇l̇ëye dret bi Data Sbö bokso wl̈o. Rokërwa uunkong eni.