1 Tjl̈apga këkboga, e l̇l̇ëbo owa shäryono ga wl̈õy kjang l̇l̇ëm, poshdũs yõtso dey, bop data wl̈eni. Domerga l̈uyo bop dorko anmoyõra, pja opshäryë bop l̈ëmga tjok sorë ga pja opshäryos ba tjok eni bakoe. 2 Wal̈ëga këkbogara, pja opshäryë bop mekë tjok sorë ga pja opshäryos ba tjok eni bakoe. Wal̈ëga l̈uyo bop dorko anmoyõra, pja opshäryë bop dorga tjok sorë ga pja opshäryos ba tjok eni bakoe. Pja wotjl̈ĩk l̇l̇ëbo owa shäryë ba tjok sira l̇l̇ëme.

3 Syãpgara, kjimtaga ërë l̇l̇ëm wl̈eniyo ga kjimtozong. 4 Gueniyo ga wapga, tjërga tjok wl̈eni ga kjimtaga ber epgarë. Sbö bokso ga bek l̈i e. Epga, e kuna tek chilawa dwayo öötong këskëse. Era ba mekë, ba tjëtë beno syã l̈i, e kjimtaga ber epgarë shara. 5 Syã jl̈õkoyo, kjimtaga ërë l̇l̇ëm wl̈eniyo ga e mär ber Sbö go eröe. Ber shäng syõshtë ba kong shkë dba, kjimte wl̈o.

6 Gueniyo syã, e wotjl̈ĩk Sbö l̇l̇ëm, to shäng l̇l̇ëye wen ba pjl̈úshko l̈i shäryë wl̈eni ga e tjwl̈õ ame, no wol̈ono buk wl̈eni. Era kjimtako l̇l̇ëme.

7 Tjl̈õkwo ëre l̈os Jesús tjl̈õkwo kjragaga kong, l̇l̇ëbo shäryara l̈ok owa l̈ëba ga ä wl̈o. 8 Ëye ba pjeyoga l̈öng ba ushko l̈i kjimtë l̇l̇ëm ga tjl̈õkwo kjrara l̈i, e shärye shäng l̇l̇ëme. Sbö tjl̈õkwo kjragaga l̇l̇ëm l̈öng l̈i ëmdë ga ba pjeyoga, e kjimte.

9-10 Jesús tjl̈õkwo kjragaga kjimtëy wl̈o l̈i, e ko tëy kjibokwo go. Syãpga, e ko tëy kjibokwo e go wl̈o ga woyde ga l̈u pjl̈ogl̈o sak tjer (60) jem l̈ëkong eröe. Woyde ga öör sök ba l̈anma tjok pjl̈o beke. Woyde ga l̇l̇ëbo pjl̈ú shärye obl̈ë kong ara, ba wapga kuna pjl̈o bek, ëye tjwe ba shwoy ga wl̈okjre sök wopjl̈ú, Jesús tjl̈õkwo kjragaga äär ba ushko ga dregl̈o shkwe ber wopjl̈ú wl̈o, no song wl̈eniyo kjimte, parkë obl̈ë kong ara bakoe. Woyde ga miydëba e go. Syãpga eniyo ko toydë pjang kjibokwo l̈i go.

11-12 Gueniyo ga syãpga mite obira ko tako pjang kjibokwo l̈i go wl̈o l̇l̇ëme. Ko tëyshko ga tjl̈ẽ ga «Tja orkwosmok ame. Tja parkë ber shäng Cristo kong eröe» l̈e jl̈õkoyo. Gueniyo e irgo ga orkwosmok woydë obi. Eshko ga tjl̈õkwo l̈ara Cristo kong jl̈õkoyo l̈i, e shärye l̈ok ame. E shärye eni ga e l̇l̇ëbo owa shäryayde. 13 E shäryayde dö l̇l̇ëme. Opsguë l̈öng shmirkë ara, to l̈öng sjok sjok oba l̈öng sorë ĩk, oba l̈ãywe, tjl̈õkwo l̈ako l̇l̇ëm l̈i l̈e bakoe. 14 E kjĩshko ga woydër ga syãpga mite obi l̈i orkwosmok dey. Woydër ga wapga tjok, ga ber l̈öng ba ushko, ba wapga dë, l̈ãywe bi wl̈oyogarë l̇l̇ëm wl̈o. 15 Eerishko ga syãpga kjong kjong Jesús tjl̈õkwo rayono tjän, beno jëk l̈öng Ä tjok. Tjl̈õkwo ëre l̈ër bop kong e kjĩshko.

16 Eni ga wal̈ëga Jesús tjl̈õkwo kjraga, ba pjeyoga syãpga tjok wl̈eni ga woyde ga kjimte om go, pak l̈i ber Jesús tjl̈õkwo kjragaga obl̈ë l̈i kong l̇l̇ëm wl̈o, syãpga kjimtaga ërë l̇l̇ëm l̈öng l̈i kjimte l̈ok ga pjl̈ú wl̈o.

17-18 Sbö tjl̈õkwo tak pjang l̈i tjl̈ẽ ga «Sögl̈a parkokl̈o wl̈eniyo, e ichëy dwl̈a kjwokäkshko ga kjamo kjrochako l̇l̇ëm, dwl̈a l̈i ue ga pjl̈ú wl̈o.»* Deuteronomio 25.4. Tjl̈ẽ obi ga «Ëye parkë ga e potjwl̈ẽkko.»† Lucas 10.7. E kjĩshko ga tjl̈apgaga Jesús tjl̈õkwo kjraga kägäyo parkë pjl̈ú wl̈eni ga woyde ga bangkjrëba pjl̈ú, potjwl̈ẽkoba pjl̈ú bakoe. Oba pingga Sbö tjl̈õkwo go, oba poshdungga, e woyde ga bangkjrëba, potjwl̈ẽkoba pjl̈ú, obl̈ë obl̈ë l̈i kjinmo.

19 Jesús tjl̈õkwo kjraga kägäyoga l̈i rotëbashko ga rotaga no kjl̈araso dörë wl̈eni ga tjl̈õkwo kjrëp l̇l̇ëme. Woyde ga no söya ba rotaga l̈irë pjök mya ba tjok, «E ĩnorwa om go jl̈õkoyo» l̈e l̈ok wl̈o. Eni ga shdum ga pjl̈úe. 20 Eshko ga l̇l̇ëbo owa shäryono jl̈õkoyo wl̈eni ga woyde ga wl̈ongko oba bokso, bangkjrëba wl̈o, omshäryë l̈ok eni l̇l̇ëm wl̈o.

21 Ëye l̇l̇ëbo owa shäryono ga woydër ga l̇l̇gwes yõtso, beke. «Kjwe woydër ara kjĩshko ga shdun l̇l̇ëme» l̈ëy bi pjl̈úshko l̇l̇ëme. «Kjwe woydër l̇l̇ëm kjĩshko ga shdun ara» l̈ëy l̇l̇ëm bakoe. Sbö, Cristo Jesús, Sbö parkagaga kjok dogo so, e l̈öng bop ĩga.

22 Jesús tjl̈õkwo kjraga kägäyo kjrëpshko ga shäryëp mal̈ing l̇l̇ëme. Jëk shäng pjl̈o bekde ĩp yõtso guing. L̇l̇ëm ga shäng l̇l̇ëbo owa shäryë wl̈eni ga owa shärye shäng l̈i ber pjl̈ú bop kong l̈ëba eni. Ga pja om go l̈i l̇l̇ëbo owa shäryë l̇l̇ëme. 23 Gueniyo ga pja bögwo bang ara wop sit wop sit kjĩshko ga di iopdë dö l̇l̇ëm, kjil̇l̇gwo bo dyo dbo ara iopdë sira bakoe.

24 Kjone kjone l̇l̇ëbo owa shäryono l̈i miydëy jekdo. Gueniyo kjone kjone eni l̇l̇ëme. Miydëy l̇l̇ëm, jëk sorë ĩnoy yõtso guing. 25 L̇l̇ëbo pjl̈ú shäryëy l̈i, e eni bakoe. Ol̈ö ga ĩkoba wẽl̈ë jekdo. Ol̈ö ga ĩgaba l̇l̇ëm, gueniyo dbar tjwe kjwara ga miydëba eshko jã.