Evangelio según Mateo
Jesucristo roy pjl̈ú ëre, e jyã tara Mateorë
Kjibokwo ëre sorë
Domer shäng kjl̈ara ko Mateo. E kowëba Leví bakoe. E judío. Dënashko ga e dbur töngga Roma so kong. Pjl̈ara ga sök ba pak l̈ishko ga rokara Jesúsdë opping ba tjok. Kuya ga to jek ba tjok, beno shäng ba oppingga shara. E irgo ga öötong beno shäng ba oppinggaga dogl̈o sak kjwara kjingsho pjök (12) l̈i kjl̈arayo bakoe.
Eshko dbaryo ga judíoga l̈öng no pjl̈uyo iche l̈e Sbörë l̈i koshë, gueniyo e Jesús miydara ararë l̇l̇ëme. E kjĩshko ga Jesús wol̈ono, ga woshrara Sbörë iröng obi irgo ga kjibokwo ëre tara Mateorë. L̇l̇ëbo ĩna, kura om go l̈i jyã tara beno l̈ok kjibokwo ëre go, ber judíoga uunkong kong wl̈o. Woyde ga kjibokwo ëre go ga miyde l̈ok ga koshe l̈öng l̈i, e Jesús om go.
1
Jesucristo data, kjokë, tjl̈apgaga tek dënashko dwayo
1 Jesucristo, e David tjëyo, Abraham tjëyo bakoe. Ëre ba data, ba kjokë, ba tjl̈apgaga tek dënashko dwayo, e kjibokwoyo.
2 Abraham, e Isaac data.
Isaac, e Jacob data.
Jacob, e Judá data, ba shjiyga, ba l̈ëmga data bakoe.
3 Judá, e Fares data, Zera data bakoe. Epga mekë ko Tamar.
Fares, e Esrom data.
Esrom, e Aram data.
4 Aram, e Aminadab data.
Aminadab, e Naasón data.
Naasón, e Salmón data.
5 Salmón, e Booz data. Booz mekë ko Rajab.
Booz, e Obed data. Obed mekë ko Rut.
Obed, e Isaí data.
6 Isaí, e Pjl̈u David data.
David, e Salomón data. Salomón mekë, e dënashko ga Urías boy.
7 Salomón, e Roboán data.
Roboán, e Abías data.
Abías, e Asa data.
8 Asa, e Josafat data.
Josafat, e Joram data.
Joram, e Uzías data.
9 Uzías, e Jotam data.
Jotam, e Acaz data.
Acaz, e Ezequías data.
10 Ezequías, e Manasés data.
Manasés, e Amón data.
Amón, e Josías data.
11 Josías, e Jeconías data, ba shjiy, ba l̈ëmga data bakoe. E dbaryoshko ga Israel tjëyoga zanaba, söraba jek Babilonia kjokyo dbo go.
12 Eshko tek l̈ëkong ga wapga weno obi.
Jeconías, e Salatiel data.
Salatiel, e Zorobabel data.
13 Zorobabel, e Abiud data.
Abiud, e Eliaquim data.
Eliaquim, e Azor data.
14 Azor, e Sadoc data.
Sadoc, e Aquim data.
Aquim, e Eliud data.
15 Eliud, e Eleazar data.
Eleazar, e Matán data.
Matán, e Jacob data.
16 Jacob, e José data, María l̈anma. María, e Jesús mekë. Oba tjl̈ẽ ga no pjl̈uyo ichara Sbörë shrono shäng l̈i, e Jesús.
17 Abraham wapga, tjërga, tek l̈ëkong tjwe jong David go beno wapga öötong kop eni dogl̈o sak kjwara kjingsho pkëng (14). David wapga, tjërga, tek l̈ëkong tjwe jong Israel tjëyoga söraba jek Babilonia kjokyo dbo go dbaryoshko beno wapga öötong kop eni dogl̈o sak kjwara kjingsho pkëng (14). Eshko dwayo ba wapga, tjërga, tek l̈ëkong tjwe jong no pjl̈uyo iche l̈e Sbörë l̈i buk dbaryoshko beno wapga öötong kop eni dogl̈o sak kjwara kjingsho pkëng (14) bakoe.
Jesucristo bukshko dbaryo
18 Jesucristo, e bukshko ga eni. Kjogl̈o shäng kjl̈ara ko María. Domer shäng kjl̈ara ko José. Tjl̈õkwo twono ëng kong, orkwosmok wl̈o. Gueniyo orkwosmoydë l̈ok l̇l̇ëm obishko ga María beno shäng kjl̈araso l̇l̇ëm, Sbö Sëya ĩ. 19 José, e domer pjl̈o bek, ga María rote woydë ë kong l̇l̇ëme. E kjĩshko ga raye kjingtëng l̈ara. 20 Woyotjl̈ĩya shärye eni l̈eshko ga Tjl̈apga parkaga kjok dogo so weno shäng ba kong kjl̈ara yoshko, ga tjl̈ẽ ba kong ga «José, David tjëyo, pja orkwosmok María tjok ga bangkjrëp l̇l̇ëme. Shäng kjl̈araso l̇l̇ëm, Sbö Sëya ĩ. 21 L̇l̇ono ga María wa buk kjl̈ara domer. Eshko ga koiëp Jesús.* Grecia so tjl̈õkwo Jesús, e shji döya Tjl̈apgarë l̈okl̈o. Koiëp eni, ba tjëyoga döya l̇l̇ëbo owa shärye l̈öng l̈i dbo dorko dwayo kjĩshko» l̈e.
22 Shäryono eni, tjl̈õkwo l̈ara Tjl̈apgarë ba tjl̈õkwo l̈aga kong dënashko l̈i ber jl̈õkoyo wl̈o. Tjl̈ẽno beno eni:
23 «Kjogl̈o domer miydoydë l̇l̇ëm obi l̈i,
e ber shäng kjl̈araso l̇l̇ëme.
Wa buk kjl̈ara domer, ga koiëba Emanuel.»† Isaías 7.14.
(Emanuel, e «Sbö shäng bi tjok» l̈okl̈o.)
24-25 José wol̇l̇enoshko ga l̇l̇ëye l̈ara Tjl̈apga parkaga kjok dogo sorë l̈i shäryara eni, ga María wl̈okjrara. Gueniyo José pono ba tjok l̇l̇ëm, äär jong chida l̈i buk guing. Eni ga wa buk kjl̈ara domer, ga koiara Josérë Jesús. E irgo ga beno l̈öng pjöyĩkong.