1 Pjara, tjl̈õkwo bek l̈i l̈opdë oba kong eröe.

2 Domerga këkboga pimshko ga pja tjl̈ẽ ba kong ga «Pjãy l̇l̇ëbo shäryë ga woyotjl̈ĩzĩ yõtso guing. Pjãy jëk yõtso pjl̈o bek, pjãy bangkjrëba wl̈o. Tjl̈õkwo bek l̈i sözĩ jl̈õkoyo. Obl̈ë woydozĩ ara. L̇l̇ëbo wen tjwe bomi kongshko ga pjãy wosonkë l̇l̇ëme» l̈ëp ba kong eni.

3-5 Wal̈ëga këkboga pimshko ga pja tjl̈ẽ ba kong ga «Pjãy opshäryë wal̈ëga Sbö bangkjrë wl̈eniyo dik. Obl̈ë l̈ãywëy owa ë kong l̇l̇ëme. Shji wo pjang nel̈õtkë wl̈o l̇l̇ëm bakoe. Shäryëmi eni, l̇l̇ëbo pjl̈ú l̈i pimi obl̈ë kong wl̈o. Eni ga wal̈ëga mikboga l̈i pimi ba l̈anma, ba wapga woydë ara, l̇l̇ëbo shäryë ga woyotjl̈ĩya yõtso guing, l̇l̇ëbo pjl̈ú shäryë dö, ba u dë pjl̈ú, jëk l̈öng wopjl̈ú oba tjok, ba l̈anma kol̈ë pjl̈ú, Sbö tjl̈õkwo l̈ãywëba owa ba kjĩshko l̇l̇ëm wl̈o. Pimi eni» l̈ëp ba kong eni.

6 Domerga sbé obi pimshko ga pja tjl̈ẽ ba kong ga «Pjãy l̇l̇ëbo shäryë ga woyotjl̈ĩzĩ yõtso guing» l̈ëp ba kong eni bakoe.

7 Ga pja om gora, l̇l̇ë pogo shäryëpshko ga pja opshäryë pjl̈o bek ĩyado, ĩkoba wl̈o, opshäryë bopoya dik wl̈o. Oba pimshko ga tjl̈õkwo l̈ëp ba kong yõtso, beke. 8 Woyde ga pja tjl̈ẽ bëy, tjl̈õkwo l̈i owa l̈ëba ga ä wl̈o. Eni ga bop wl̈oyoga, l̇l̇ëye wl̈ẽya pja rote wl̈o ga ä, ga l̈ökkjrë eshko.

9-10 Parkagaga tjwl̈ẽk l̈öng pjir wl̈eniyo pimshko ga pja tjl̈ẽ ba kong ga «Bomi sogoga kol̈ozĩ ĩyado, ber l̈öng wopjl̈ú bomi tjok wl̈o. Epga dboryëy l̇l̇ëme. L̇l̇ëbo bi sogo ĩ l̈i l̈ũyotkëy l̇l̇ëm, l̇l̇ëbo pjl̈o bek l̈i shäryomirë dey, “Kjwe parkë pjl̈úe” l̈e bomi pjl̈uyorë wl̈o. Eni ga Sbö bi döga, e tjl̈õkwo bangkjrëba» l̈ëp ba kong eni.

11 Sbö wopjl̈ú l̈i kjĩshko ga l̇l̇ëbo shäryara shji nopga uunkong kong, shji döya wl̈o. 12 Ba wopjl̈ú l̈i kjĩshko ga shji oppino l̇l̇ëbo owa l̈i rayë, l̇l̇ëbo tjeng kjok ëre kjing go l̈i woydë l̇l̇ëm bakoe. Woyde ga shji l̈öng kjok ëre kjing go obishko ga shji jëk l̈öng pjl̈o bek Sbö bokso, ga l̇l̇ëbo shäryëy ga woyotjl̈ĩy yõtso guing. 13 E wopro ga Jesucristo, e wen tjwe iröng obi l̈i koshëy l̈öng wopjl̈úe. Eshko ga tjwe ba dbo ara l̈i kãl̈ã goshko. E bi döga, bi Sbö bakoe. 14 E shäng kjok ëre kjing go obishko ga optwono wol̈ono bi kjĩshko, shji döya l̇l̇ëbo owa shäryëy l̈öng l̈i dbo dorko dwayo wl̈o. Ga owa pjang bi go l̈i l̈öna beno dret, shji ber tjeng ba wl̈oshko wl̈o, shji ber nopga baĩya wl̈o, shji ber pjl̈o bek ba bokso wl̈o, shji l̇l̇ëbo pjl̈ú shäryë woydë ĩyado wl̈o bakoe.

15 Oba pĩs tjl̈õkwo l̈ër shäng bop kong ëre go. «Shäryozĩ eni» l̈os ba kong. Ëye omshäryë eni l̇l̇ëm ga poshdũzong. Pja tjl̈ẽs ba kong jl̈õkoyo, pja bangkjre l̈ok wl̈o. Pja tjwl̈õ l̇l̇ëme l̈e ëborë bop kong ga jl̈õ l̈ëp l̇l̇ëm.