1 ཡང་གཙོ་བོ་ཡ་ཝཱེས་ང་ལ་དོན་ཞིག་བསྟན་ཏེ། ངས་དབྱར་ཁའི་ཤིང་ཏོག་སླེ་པོ་གཅིག་མཐོང་ཞིང་། 2 ཁོང་གིས་ང་ལ་འདི་སྐད་དུ། ཀྱེ་ཨ་མོ་སི། ཁྱོད་ཀྱིས་ཅི་མཐོང་ངམ་གསུངས་པ་དང་། ངས་དབྱར་ཁའི་ཤིང་ཏོག་སླེ་པོ་གཅིག་མཐོང་ཞེས་ལན་ཞུས་པ་ལ། དཀོན་མཆོག་ཡ་ཝཱེས་ང་ལ་འདི་སྐད་དུ། ངའི་མི་སྡེ་ཡེས་ར་ཨེལ་གྱི་མཐའ་མའི་དུས་སུ་སླེབས་པས། ད་ཕྱིན་ཆད་ངས་དེ་དག་གུ་ཡངས་སུ་མི་གཏོང་ཞིང་། 3 ཉིན་དེར་ཕོ་བྲང་ནང་གི་གླུ་དབྱངས་རྣམས་ངུ་འབོད་དུ་འགྱུར་ཏེ། གནས་ཀུན་ཏུ་བམ་རོ་མང་པོ་འདོར་ཞིང་། སྐད་རྒྱག་མཁན་སུ་ཡང་མེད་དོ་ཞེས་གཙོ་བོ་ཡ་ཝཱེས་གསུངས་སོ། །

4 ཡང་ཁོང་གིས་འདི་སྐད་དུ། དབུལ་པོར་བརྙས་བཅོས་བྱེད་པ་དང་རྒྱལ་ཁམས་ནང་གི་དཀའ་སྡུག་ཅན་ཉམས་པར་འཇུག་པ་ཁྱོད་ཅག་གིས་བཀའ་འདི་ལ་ཉོན་དང་། 5 ཁྱོད་རྣམས་ན་རེ། ངེད་ཀྱིས་འབྲུ་རིགས་འཚོང་བའི་ཕྱིར་དུ་ཚེས་གཅིག་ནམ་ཞིག་འདའ་འོང་། ཚོང་རའི་སྒོ་ཕྱེས་ཏེ་ལོ་ཏོག་འཚོང་བའི་ཕྱིར་དུ་ངལ་གསོ་བའི་དུས་ནམ་ཞིག་རྫོགས་སམ། ངེད་ཅག་གིས་དངོས་པོ་འཚོང་དུས་ཨེ་ཕཱ་ཇེ་ཆུང་དུ་བཏང་སྟེ། དངུལ་སྡུད་དུས་རྒྱ་ཐུར་ཇེ་ལྗིད་དུ་བཏང་ནས་རྒྱ་སྲང་རྫུན་མས་མི་ལ་མགོ་སྐོར་བཏང་བ་དང་། 6 ངེད་ཅག་གིས་དངུལ་གྱིས་དབུལ་པོ་ཉོ་བ་དང་། བསིལ་ལྷམ་ཆ་གཅིག་གིས་དཀའ་སྡུག་ཅན་བརྗེ་ཞིང་། གྲོ་རུལ་བ་རྣམས་ཀྱང་མི་ལ་འཚོང་ཞེས་སྨྲས་སོ། ། 7 དཀོན་མཆོག་ཡ་ཝཱེས་ཡ་ཀོབ་ཀྱི་གཟི་བརྗིད་བསྟན་ཏེ་དབུ་མནའ་བཞེས་ཤིང་འདི་སྐད་དུ། དེ་དག་གི་བྱ་སྤྱོད་ཡོད་ཚད་ངས་ནམ་ཡང་བརྗེད་པར་མི་བྱའོ། ། 8 དེའི་རྐྱེན་གྱིས་ས་གཞི་འདར་བར་མི་འགྱུར་རམ། དེར་སྡོད་པའི་མི་རེ་རེས་མྱ་ངན་མི་བྱའམ། དེ་ནི་ནེ་ལོ་གཙང་པོ་བཞིན་དུ་རྒྱས་ཤིང་འཕྱུར་ལ། ཨེ་ཅིབ་གཙང་པོ་བཞིན་དུ་རྒྱས་ཤིང་འབབ་པར་འགྱུར་ཞེས་གསུངས་སོ། །

9 ཡང་གཙོ་བོ་ཡ་ཝཱེས་འདི་སྐད་དུ། ཉིན་མོ་དེར། ངས་ཉིན་གུང་གི་དུས་སུ་ཉི་མ་ནུབ་པར་འཇུག་ཅིང་། ཉི་མ་དཀར་པོ་ལ་ངས་ས་གཞི་མུན་ནག་ཏུ་བསྒྱུར་རོ། ། 10 ངས་ཁྱོད་ཀྱི་དུས་ཆེན་རྣམས་ཡིད་སྐྱོ་བའི་དུས་དང་། ཁྱོད་ཀྱི་གླུ་ཐམས་ཅད་སྐྱོ་གླུ་རུ་བསྒྱུར་ཞིང་། ངས་ཁྱོད་ཚོ་མི་རེ་རེའི་རྐེད་པར་སོ་ཐག་དཀྲི་བར་འགྱུར་ལ། སྐྲ་རྣམས་བཞར་ཏེ། བུ་གཅིག་པོ་ཤོར་བ་བཞིན་དུ་ངས་ཁྱོད་རྣམས་ཡིད་སྐྱོ་བར་བྱ་ཞིང་། ནམ་ཡིན་ཡང་སྡུག་བསྔལ་གྱི་ཉིན་མོ་ལྟ་བུར་འགྱུར་ཞེས་གསུངས་སོ། ། 11 ཡང་གཙོ་བོ་ཡ་ཝཱེས་འདི་སྐད་དུ། ལྟོས་ཤིག དུས་དེ་སླེབས་ལ་ཉེ་ཞིང་། ངས་ཡུལ་དུ་མུ་གེ་འབྱུང་བར་བྱ་སྟེ། མུ་གེ་འདི་ནི་བཟའ་ཆས་མེད་པ་མ་ཡིན་ལ། སྐོམ་པ་བསལ་བའི་ཆུ་མེད་པ་ཡང་མ་ཡིན་པར་དཀོན་མཆོག་ཡ་ཝཱེའི་བཀའ་མི་ཐོས་པ་ཡིན་ནོ། ། 12 དེ་ནས་དཀོན་མཆོག་ཡ་ཝཱེའི་བཀའ་འཚོལ་ཕྱིར་མི་རྣམས་ཡུལ་སོ་སོར་འཁྱམ་པར་འགྱུར་ཞིང་། རྒྱ་མཚོ་ནས་རྒྱ་མཚོ་དང་། བྱང་ཕྱོགས་ནས་ཤར་ཕྱོགས་བཅས་སུ་ཕར་རྒྱུག་ཚུར་རྒྱུག་བྱས་ཀྱང་རྙེད་པར་མི་འགྱུར་རོ། ། 13 དུས་དེར་བྱད་གཟུགས་མཛེས་པའི་ན་ཆུང་མ་དང་ན་གཞོན་རྣམས་ཁ་སྐོམ་པས་བརྒྱལ་བར་འགྱུར་ཞིང་། 14 སཱ་མར་ཡའི་ཨ་ཤི་མཱ་ལྷ་མོ་དཔང་དུ་བཙུགས་ཏེ་མནའ་སྐྱེལ་བ་དང་། དཱན་གྱི་ལྷ་རྣམས་དཔང་དུ་བཙུགས་ཏེ་མནའ་སྐྱེལ་བ། ཡང་ན་པེར་ཤ་བཱའི་ལྷ་རྣམས་དཔང་དུ་བཙུགས་ཏེ་མནའ་སྐྱེལ་བ་རྣམས་འགྱེལ་བར་འགྱུར་ཞིང་ནམ་ཡང་སླར་ལང་བར་མི་འགྱུར་རོ་ཞེས་གསུངས་སོ། །