1 དེ་ཡང་རང་རང་གི་ཁྱིམ་ཚང་དང་བཅས་ཡ་ཀོབ་དང་ལྷན་དུ་ཨེ་ཅིབ་ཡུལ་དུ་འོངས་པའི་ཡེས་ར་ཨེལ་གྱི་བུ་རྣམས་ཀྱི་མིང་ནི་གཤམ་དུ་བཀོད་པ་སྟེ། 2 རུ་བེན་དང་། སི་མུ་ཨོན། ལེ་ཝི། ཡ་ཧུ་དཱ། 3 ཡེས་སི་ཀཱར། ཟེ་བུ་ལུན། པེན་ཡཱ་མེན། 4 དཱན། ནཱབ་ཐ་ལི། གཱ་རྡུ། ཨ་ཤེར་བཅས་སོ། ། 5 ཡ་ཀོབ་ནས་བྱུང་བའི་མི་ཐམས་ཅད་ཀྱི་གྲངས་ཀ་ནི་བསྡོམས་པས་བདུན་ཅུ་ཡོད་ཅིང་། ཡོ་སེབ་སྔར་ནས་ཨེ་ཅིབ་ཡུལ་དུ་ཡོད་པ་ཡིན། 6 དེ་ནས་ཡོ་སེབ་དང་ཁོའི་སྤུན་ཐམས་ཅད་དང་མི་རབས་དེའི་མི་མཐའ་དག་ཤི་ཟིན་མོད། 7 འོན་ཀྱང་། ཡེས་ར་ཨེལ་གྱི་བུ་རྣམས་རྒྱུད་དང་ལྡན་པར་གྱུར་ནས་གྲངས་ཀ་ཤིན་ཏུ་མང་པོར་འཕེལ་ཏེ་སྟོབས་ཧ་ཅང་ཆེ་བར་གྱུར་ནས་ཡུལ་གྲུ་དེར་བཀང་ངོ་། །

8 དེ་ནས་ཡོ་སེབ་ལ་རྒྱུས་མི་མངའ་བའི་རྒྱལ་པོ་གསར་པ་ཞིག་བྱུང་ཞིང་། དེས་ཨེ་ཅིབ་ལ་དབང་བསྒྱུར་པ་དང་། 9 དེས་རང་གི་འབངས་མི་རྣམས་ལ། ལྟོས་དང་། ཡེས་ར་ཨེལ་པ་རྣམས་ཀྱི་མི་ཚོགས་རང་ཅག་ལས་མང་ཞིང་སྟོབས་ཀྱང་རྒྱས་པས། 10 ཤོག་དང་། རང་ཅག་གིས་དེ་རྣམས་ལ་གཡོ་སྦྱོར་སྤེལ་བར་བྱའོ། །དེ་ལྟར་མ་བྱས་ན། ཁོ་རྣམས་ད་དུང་འཕེལ་བར་འགྱུར་ཞིང་། ཕྱིས་སུ་དམག་འཁྲུག་འདྲ་བྱུང་ན་དེ་དག་གིས་དགྲ་བོར་གྲོགས་བགྱིས་ནས་རང་ཅག་ལ་རྒོལ་ཏེ་ཡུལ་འདི་དང་འབྲལ་སྲིད་ཅེས་སྨྲས་སོ། ། 11 དེའི་ཕྱིར། ཨེ་ཅིབ་པ་རྣམས་ཀྱིས་ཁོ་རྣམས་ལ་ཁྲེས་པོ་ལྕི་མོ་བཀལ་ནས་དྲག་གནོན་ཆེན་པོ་བྱ་ཆེད་ལས་རྒྱབ་པ་རྣམས་བསྐོས་ཤིང་། ཁོ་རྣམས་ཀྱིས་ཕཱར་ཨོལ་ལ་བང་མཛོད་གྲོང་ཁྱེར་ཕི་ཐོམ་དང་རཱ་ཨམ་སེའེ་གཉིས་བརྩིགས་སོ། ། 12 འོན་ཀྱང་དེ་རྣམས་ལ་ཇི་ལྟར་དྲག་གནོན་བྱས་ནའང་དེ་ལས་མང་པོར་འཕེལ་ཞིང་ཕྱོགས་ཀུན་ཏུ་ཁྱབ་པས། ཨེ་ཅིབ་པ་རྣམས་ཡེས་ར་ཨེལ་པའི་རྐྱེན་གྱིས་འཇིགས་པ་དང་། 13 ཡེས་ར་ཨེལ་པ་རྣམས་ལ་བཙན་བཀོལ་ནས་ལས་ཀ་བྱེད་དུ་བཅུག་སྟེ། 14 སོ་ཕག་དང་འཇིམ་པ་བཟོ་བའི་ལས་ཀ་ལྕི་མོ་དང་། ཞིང་ལས་སྣ་ཚོགས་བྱེད་དུ་བཅུག་ནས་ཁོ་རྣམས་ཀྱི་འཚོ་བ་སྡུག་ལ་སྦྱར་ཅིང་། ལས་ཀ་ཐམས་ཅད་ཀྱི་ཐད་ནས་ཁོ་རྣམས་ལ་གདུག་རྩུབ་སྤྱད་དོ། །

15 དེ་ནས་ཨེ་ཅིབ་ཀྱི་རྒྱལ་པོས་ཨིབ་རི་པའི་སྐྱེ་གཡོག་མ་ཤིབ་རཱ་དང་ཕུ་ཨ་བྱ་བ་གཉིས་ལ་འདི་ལྟར། 16 ཁྱོད་ཅག་གིས་ཨིབ་རི་པའི་བུད་མེད་རྣམས་ལ་སྐྱེ་གཡོག་བྱེད་པའི་སྐབས་སུ་ཁོ་མོ་ཚོས་བཙའ་ཁྲིའི་སྟེང་ཕྲུ་གུ་བཙའ་དུས་ལྟོས་དང་། བུ་ཡིན་ན་སོད་ཅིག བུ་མོ་ཡིན་ན་འཚོ་བས་ཆོག་ཅེས་བཀའ་བསྒོས། 17 འོན་ཀྱང་སྐྱེ་གཡོག་མ་རྣམས་དཀོན་མཆོག་ལ་གུས་ཤིང་འཇིགས་པས། ཨེ་ཅིབ་ཀྱི་རྒྱལ་པོས་གནང་བའི་བཀའ་བཞིན་དུ་མ་བྱས་པར་བུ་རྣམས་ཀྱི་སྲོག་བསྐྱབས་པ་དང་། 18 ཨེ་ཅིབ་ཀྱི་རྒྱལ་པོས་སྐྱེ་གཡོག་མ་རྣམས་བོས་ནས་འདི་ལྟར་དྲིས་པ་སྟེ། ཁྱོད་ཅག་གིས་བུ་རྣམས་ཀྱི་སྲོག་བསྐྱབས་པ་ཅི་ཡིན་ནམ་ཞེས་པ་ན། 19 སྐྱེ་གཡོག་མ་རྣམས་ཀྱིས་ཕཱར་ཨོལ་ལ། ཨིབ་རི་པའི་བུད་མེད་དང་ཨེ་ཅིབ་ཀྱི་བུད་མེད་རྣམས་མི་འདྲ་སྟེ། ཨིབ་རི་པའི་བུད་མེད་ཀྱི་ལུས་སྟོབས་ཆེ་བས་སྐྱེ་གཡོག་མ་ད་དུང་མ་སླེབས་གོང་དུ་བཙས་ཚར་ཞེས་ཞུས་སོ། ། 20 དེའི་ཕྱིར། དཀོན་མཆོག་གིས་སྐྱེ་གཡོག་མ་རྣམས་ལ་བཀའ་དྲིན་མཛད་པ་དང་། ཡེས་ར་ཨེལ་གྱི་མི་རྣམས་ཀྱང་འཕེལ་ཞིང་ཤིན་ཏུ་དར་བར་གྱུར། 21 སྐྱེ་གཡོག་མ་རྣམས་དཀོན་མཆོག་ལ་གུས་ཤིང་འཇིགས་པས་ཁོང་གིས་ཁོ་མོ་རྣམས་ལ་ཁྱིམ་གཞིས་མཛད་དོ། ། 22 དེ་ནས་ཕཱར་ཨོལ་གྱིས་རང་གི་འབངས་མི་རྣམས་ལ་འདི་ལྟར། ཨིབ་རི་པའི་བུ་གསར་སྐྱེས་རེ་རེ་ནཱ་ཡོལ་གཙང་པོར་གཡུགས་དང་། བུ་མོ་རྣམས་འཚོ་རུ་ཆུག་ཅེས་བཀའ་བབས་སོ། །