1 སཱམ་སོན་ནི་ཐིམ་ནཱ་རུ་ཕྱིན་པ་དང་དེ་རུ་བུ་མོ་ཞིག་མཐོང་ཞིང་། དེ་ནི་ཕེ་ལེ་ཤེད་པའི་བུ་མོ་ཞིག་ཡིན་ནོ། ། 2 ཁོ་ཡར་འོངས་ནས་རང་གི་ཕ་མ་གཉིས་ལ་ན་རེ། ངས་ཐིམ་ནཱ་རུ་ཕེ་ལེ་ཤེད་པའི་བུ་མོ་ཞིག་མཐོང་བྱུང་། ད་ལྟ་ཁྱེད་ཀྱིས་དེ་ངའི་ཆུང་མར་ལེན་རོགས་ཞེས་ཞུས་པ་ལ། 3 ཁོའི་ཕ་མས་འདི་ལྟར། ཁྱོད་ཀྱི་སྤུན་མཆེད་ཀྱི་བུ་མོ་རྣམས་དང་ཡང་ན་རང་རེའི་མི་ཀུན་གྱི་ཁྲོད་དུ་བུད་མེད་གཅིག་ཀྱང་མི་འདུག་གམ། ཁྱོད་སོང་སྟེ་མཚན་སྐྱི་མ་བཅད་པའི་ཕེ་ལེ་ཤེད་པ་རྣམས་ལས་ཆུང་མ་ལེན་དགོས་བྱུང་ངམ་ཞེས་སྨྲས་ཤིང་། སཱམ་སོན་གྱིས་རང་གི་ཕ་ལ། བུ་མོ་དེ་ངའི་བློར་བབ་བྱུང་བས་ཁྱེད་ཀྱིས་བུད་མེད་དེ་ང་ལ་ལེན་རོགས་ཞེས་ཞུས། 4 ཁོའི་ཕ་མས་དོན་དེ་ནི་དཀོན་མཆོག་ཡ་ཝཱེ་ནས་བྱུང་ཞིང་ཁོང་གིས་ཕེ་ལེ་ཤེད་པ་རྣམས་དང་འཐབ་འཛིང་བྱེད་པའི་གོ་སྐབས་འཚོལ་བའི་རྐྱེན་གྱིས་ཡིན་པ་མ་ཤེས་པ་རེད། དེའི་དུས་སུ་ཕེ་ལེ་ཤེད་པ་རྣམས་ཀྱིས་ཡེས་ར་ཨེལ་པ་ལ་དབང་བྱེད་པའོ། ། 5 སཱམ་སོན་རང་གི་ཕ་མ་དང་ལྷན་ཅིག་ཏུ་ཐིམ་ནཱ་རུ་ཕྱིན་ཅིང་། ཐིམ་ནཱའི་རྒུན་འབྲུམ་ར་བར་སླེབས་པ་ལ། སེང་གེ་དར་མ་ཞིག་གིས་ཁོ་ལ་ང་རོ་སྒྲོག་པ་མཐོང་། 6 དེ་ནས་དཀོན་མཆོག་ཡ་ཝཱེའི་ཐུགས་ཉིད་ཀྱིས་སཱམ་སོན་ལ་སྐུལ་སློང་ཆེན་པོ་མཛད་དེ། ཁོའི་ལག་ཏུ་མཚོན་ཆ་མེད་ནའང་སེང་གེ་དེ་ནི་ར་ཕྲུག་ཅིག་གཤགས་པ་ལྟར་དུམ་བུར་གཤགས་ཤིང་། ཁོས་དོན་གང་ཞིག་བྱས་པ་དེ་ཕ་མར་མ་བཤད་དོ། ། 7 སཱམ་སོན་མར་སོང་ནས་བུ་མོ་དེ་དང་གཏམ་ལབ་ཅིང་ཁོ་མོ་བློར་བབ་པ་རེད། 8 ཉིན་འགའི་རྗེས་སུ་ཡང་བུ་མོ་དེ་ལེན་དུ་མར་ཕྱིན་པ་དང་། ལམ་འགྲམ་དུ་འཁོར་ནས་སེང་གེ་ཤི་རོ་ལ་བལྟ་འདོད་པ་ན། ངོ་མཚར་བ་ཞིག་ལ། སེང་གེ་ཤི་རོ་དེའི་ནང་དུ་བུང་བའི་ཁྱུ་ཚོགས་དང་སྦྲང་རྩི་ཡོད་པ་མཐོང་སྟེ། 9 ཁོས་སྦྲང་རྩི་ལག་མཐིལ་དུ་བླངས་ནས་ཟ་ཞོར་ཕྱིན་པ་དང་། ཕ་མའི་རྩར་སླེབས་ནས་ཁོ་རྣམས་ལ་སྤྲད་པར་ཁོ་ཚོས་ཀྱང་ཟོས། ཡིན་ནའང་ཁོས་སྦྲང་རྩི་དེ་ནི་སེང་གེ་ཤི་རོ་ལས་བླངས་འོངས་པ་མ་བཤད་དོ། ། 10 ཁོའི་ཕ་ནི་བུ་མོ་དེར་བལྟ་རུ་མར་ཕྱིན་པ་དང་། སཱམ་སོན་གྱིས་དེར་སྟོན་མོ་བཤམས་པ་སྟེ། རྒྱུ་མཚན་དེ་ནི་སྐབས་དེའི་གཞོན་ནུ་རྣམས་ཀྱི་སྲོལ་ཡིན་ནོ། ། 11 མི་རྣམས་ཀྱིས་སཱམ་སོན་མཐོང་བ་དང་ཁོ་ལ་འདུག་གྲོགས་མི་སུམ་ཅུ་ཁྲིད་འོངས་པ་རེད། 12 སཱམ་སོན་གྱིས་དེ་དག་ལ་འདི་ལྟར་སྨྲས་པ་སྟེ། ངས་ཁྱོད་རྣམས་ལ་གབ་ཚིག་ཅིག་བཤད། ཁྱོད་རྣམས་ཀྱིས་སྟོན་མོའི་ཉིན་བདུན་གྱི་རིང་དེ་ཅི་ཡིན་པ་ཤེས་ན་བདག་ལ་ཤོད་ཅིག བདག་གིས་ཁྱོད་རྣམས་ལ་ནང་གོས་སུམ་ཅུ་དང་ཕྱི་གོས་ཁ་ཚང་སུམ་ཅུ་སྟེར་བར་བྱ། 13 གལ་ཏེ་ཁྱོད་རྣམས་ཀྱིས་དེའི་ལན་ང་ལ་བཤད་མ་ཐུབ་ན། ཁྱོད་ཅག་གིས་ང་ལ་ནང་གོས་སུམ་ཅུ་དང་ཕྱི་གོས་ཁ་ཚང་སུམ་ཅུ་སྟེར་དགོས་ཞེས་པ་ལ། དེ་དག་ན་རེ། གབ་ཚིག་ངེད་རྣམས་ལ་བཤད་རོགས་ཞེས་སྨྲས་སོ། ། 14 དེ་ནས་སཱམ་སོན་ན་རེ། ཟ་མཁན་ནས་ཟས་ཐོན། སྟོབས་ཅན་ནས་མངར་མོ་ཐོན་ཞེས་སྨྲས་ཤིང་། ཁོ་རྣམས་ཀྱིས་ཉིན་གསུམ་གྱི་རིང་ལ་གབ་ཚིག་གི་ལན་མ་ཤེས་པ་རེད། 15 དེ་ནས་ཉིན་བདུན་པར་ཁོ་རྣམས་ཀྱིས་སཱམ་སོན་གྱི་ཆུང་མར་འདི་ལྟར་སྨྲས་པ་སྟེ། ཁྱོད་ཀྱིས་རང་གི་སྐྱེས་པ་བསླུས་ནས་གབ་ཚིག་གི་ལན་ལ་རྩད་ཆོད་ཅིག དེ་མིན་ཚེ་ངེད་རྣམས་ཀྱིས་ཁྱོད་དང་ཁྱོད་ཀྱི་ཕ་གཞིས་མེར་བསྲེག་པར་བྱ། ཁྱོད་ཅག་གིས་ངེད་རྣམས་འདིར་བོས་འོངས་པ་ནི་ངེད་རྣམས་ཀྱི་ཡོད་ཚད་འཕྲོག་པའི་ཕྱིར་ཡིན་ནམ་ཞེས་པའོ། ། 16 དེ་ནས་སཱམ་སོན་གྱི་ཆུང་མ་སྐྱེས་པའི་མདུན་དུ་ངུས་ཤིང་ན་རེ། ཁྱོད་ནི་ང་ལ་སྡང་བ་ལས་དགའ་བ་མ་ཡིན་ཏེ། ཁྱོད་ཀྱིས་ངའི་མི་རྣམས་ལ་གབ་ཚིག་སྨྲས་ཀྱང་དེའི་ལན་བདག་ལ་མི་སྨྲའོ་ཞེས་སྨྲས་པ་ལ། སཱམ་སོན་གྱིས་དེའི་ལན་དུ། ལྟོས་དང་། དེ་ནི་ངས་ཐ་ན་རང་གི་ཕ་མ་ལའང་བཤད་མེད་པས་ཁྱོད་ལ་ཅི་ལྟར་སྨྲ་རུང་ངམ་ཞེས་སྨྲས། 17 སྟོན་མོའི་ཉིན་བདུན་པོར་ཁོ་མོ་སྐྱེས་པའི་མདུན་དུ་ངུས་ཤིང་། ཉིན་བདུན་པར་ཚ་འདྲི་བྱས་པས་ཁོས་ད་གཟོད་གབ་ཚིག་གི་ལན་རང་གི་ཆུང་མར་བཤད་པ་དང་། ཁོའི་ཆུང་མས་གབ་ཚིག་གི་ལན་རང་རིགས་ཀྱི་མི་རྣམས་ལ་བཤད་དོ། ། 18 དེ་ནས་ཉིན་བདུན་པར་ཉི་མ་ནུབ་པའི་སྔོན་དུ། གྲོང་ཁྱེར་དེའི་མི་རྣམས་ཀྱིས་སཱམ་སོན་ལ། སྦྲང་རྩི་ལས་ཀྱང་མངར་བ་ཅི་ཞིག་མཆིས། སེང་གེ་ལས་ཀྱང་སྟོབས་ཅན་གང་ཞིག་ཡོད་ཅེས་སྨྲས་པར། སཱམ་སོན་ན་རེ། གལ་ཏེ་ཁྱོད་ཅག་གིས་བདག་གི་བ་གཞོན་གྱིས་ཞིང་རྨོས་པ་མིན་ན་ངའི་གབ་ཚིག་གི་ནང་དོན་ཤེས་མི་སྲིད་ཅེས་སྨྲས། 19 དཀོན་མཆོག་ཡ་ཝཱེའི་ཐུགས་ཉིད་ཀྱིས་སཱམ་སོན་ལ་སྐུལ་སློང་ཆེན་པོ་མཛད་པས། ཁོ་རང་མར་ཨ་ཤཱ་ཀེ་ལོན་དུ་ཕྱིན་ནས་དེར་མི་སུམ་ཅུ་བསད་པ་དང་། དེ་དག་གི་གྱོན་གོས་ཕྲོགས་ཏེ་གབ་ཚིག་གི་ལན་ཤེས་པའི་མི་རྣམས་ལ་སྤྲད། ཡང་ཁོ་རང་ཁྲོས་ནས་ཕ་གཞིས་སུ་ཕྱིན་ཏོ། ། 20 སཱམ་སོན་གྱི་ཆུང་མ་ནི་ཁོའི་འདུག་གྲོགས་ཏེ་ཁོའི་མག་རོགས་བྱས་མྱོང་བ་དེར་དབང་བར་གྱུར་ཏོ། །