1 ཡང་བདག་གིས་གཅན་གཟན་ཞིག་རྒྱ་མཚོ་ལས་ཡར་འཐོན་པ་མཐོང་ཞིང་། དེ་ལ་རྭ་ཅོ་བཅུ་དང་མགོ་བོ་བདུན་ཡོད་ལ། རྭ་ཅོ་བཅུའི་སྟེང་དུ་ཅོད་པན་བཅུ་གྱོན་པ་དང་། མགོ་རེ་རེའི་སྟེང་དུ་སྐུར་འདེབས་ཀྱི་མིང་ཡོད་དོ།། 2 བདག་གིས་མཐོང་བའི་གཅན་གཟན་དེ་ནི་གཟིག་དང་མཚུངས་ཞིང་། རྐང་པ་ནི་དོམ་གྱི་རྐང་པ་དང་འདྲ། ཁ་ནི་སེང་གེའི་ཁ་དང་འདྲ། འབྲུག་དེས་རང་གི་ནུས་མཐུ་དང་། ཁྲི། དབང་ཐང་ཆེན་པོ་བཅས་དེ་ལ་སྤྲད་པ་ཡིན། 3 ཡང་བདག་གིས་གཅན་གཟན་དེའི་མགོ་བདུན་པོ་ལས་གཅིག་ལ་འཆི་བར་ཐུག་པའི་རྨས་སྐྱོན་བྱུང་བ་འདྲ་མཐོང་མོད། འོན་ཀྱང་རྨས་སྐྱོན་དེ་སོས་པ་ན། འཇིག་རྟེན་གྱི་མི་ཐམས་ཅད་ཧ་ལས་ཤིང་གཅན་གཟན་དེའི་རྗེས་སུ་འབྲངས་པ་དང་། 4 འབྲུག་གིས་རང་གི་དབང་ཐང་གཅན་གཟན་དེ་ལ་སྤྲད་པས། མི་དེ་རྣམས་ཀྱིས་འབྲུག་དེ་ལ་བསྟོད་བསྔགས་བརྗོད་ཅིང་། ཡང་གཅན་གཟན་དེ་ལའང་བསྟོད་བསྔགས་འདི་ལྟར་བརྗོད་པ་སྟེ། གཅན་གཟན་འདི་ལ་འགྲན་ཟླ་སུ་ཡོད་དམ།། གཅན་གཟན་འདི་ལ་འཐབ་ཡ་སུ་ཡང་མེད།། ཅེས་པའོ།།

5 ཡང་གཅན་གཟན་དེ་ལ་ཁ་ཕོ་དང་སྐུར་འདེབས་ཀྱི་སྨྲ་སྒོ་སྤྲད་ཅིང་། ཟླ་བ་བཞི་བཅུ་ཞེ་གཉིས་ཀྱི་རིང་ཁོ་ལ་སྲིད་བྱེད་པའི་དབང་སྤྲད་དོ།། 6 གཅན་གཟན་གྱིས་ཁ་གདངས་ནས་དཀོན་མཆོག་ལ་སྐུར་འདེབས་ཀྱི་ཚིག་སྨྲས་ཤིང་། དཀོན་མཆོག་གི་མཚན་དང་ཁོང་གི་གུར་མཆོག་སྟེ། ནམ་མཁའི་ཞིང་ཁམས་སུ་བཞུགས་མཁན་རྣམས་ལ་སྐུར་བ་བཏབ་བོ།། 7 ཡང་དེ་ལ་དད་ལྡན་དམ་པ་རྣམས་དང་འཐབ་ནས་རྒྱལ་ཁ་ལེན་པ་དང་། ཚོ་པ་སོ་སོ་དང་མི་སྡེ་སོ་སོ། སྐད་རིགས་སོ་སོ། མི་རིགས་སོ་སོ་བཅས་འདུལ་བའི་དབང་ཡང་སྤྲད། 8 འཇིག་རྟེན་བཀོད་པའི་ཚུན་ལ། བཀྲོངས་ཟིན་པའི་ལུ་གུའི་ཚེ་སྲོག་གི་གླེགས་བམ་ནང་དུ་མིང་ཐོ་བཀོད་མེད་པའི་མི་རྣམས་ཏེ། ས་སྟེང་དུ་སྡོད་པ་ཐམས་ཅད་ཀྱིས་གཅན་གཟན་དེ་ལ་ཕྱག་འཚལ་བར་འགྱུར་རོ།།

9 རྣ་བ་ཡོད་པ་ཐམས་ཅད་ཀྱིས་ཉོན་ཅིག 10 བཙོན་དུ་འཇུག་དགོས་པ་རྣམས་ནི་བཙོན་དུ་འཇུག་པར་འགྱུར་ལ། རལ་གྲིས་གསོད་དགོས་པ་རྣམས་ནི་རལ་གྲིའི་ཁ་ནས་གསོད་པར་འགྱུར་རོ།། འདི་ནི་དད་ལྡན་དམ་པ་རྣམས་ཀྱི་བཟོད་བསྲན་དང་དད་སེམས་ཡིན་ནོ།།

11 ཡང་བདག་གིས་གཅན་གཟན་གཞན་ཞིག་ས་གཞི་ནས་ཡར་འཐོན་པ་མཐོང་སྟེ། ལུ་གུ་དང་འདྲ་བར་རྭ་ཅོ་གཉིས་ཡོད་ཅིང་། འབྲུག་ལྟར་གཏམ་སྨྲས་སོ།། 12 དེ་ཡིས་གཅན་གཟན་སྔ་མའི་མདུན་ནས་དེའི་དབང་ཐམས་ཅད་སྤྱོད་པར་མ་ཟད། ས་གཞི་དང་ས་གཞིའི་སྟེང་དུ་སྡོད་པ་ཐམས་ཅད་ལ་འཆི་བར་ཐུག་པའི་རྨས་སྐྱོན་བྱུང་ཞིང་སོས་པར་གྱུར་པའི་གཅན་གཟན་སྔ་མ་དེར་ཕྱག་འཚལ་དུ་བཅུག་པ་དང་། 13 ཡང་གྲུབ་རྟགས་ཆེན་པོ་རྣམས་སྟོན་ཞིང་། ཐ་ན་མིའི་མདུན་དུ་ནམ་མཁའ་ནས་ས་གཞིར་མེ་འབབ་ཏུ་བཅུག་པའོ༎ 14 དེ་ལ་གཅན་གཟན་སྔ་མའི་མདུན་དུ་གྲུབ་རྟགས་རྣམས་སྟོན་པའི་དབང་སྤྲད་ཡོད་པས། ས་སྟེང་དུ་སྡོད་པ་རྣམས་ལ་འདི་ལྟར་སླུ་བྲིད་བྱས་པ་སྟེ། རལ་གྲིའི་རྨས་སྐྱོན་ཐེབས་ཀྱང་གསོན་པོར་གནས་པའི་གཅན་གཟན་དེ་ལ་གཟུགས་བརྙན་བཟོ་བར་བྱའོ་ཞེས་སྨྲས་ཤིང་། 15 གཅན་གཟན་སྔ་མའི་གཟུགས་བརྙན་ལ་སྲོག་དང་ལྡན་པར་བྱེད་པའི་དབང་ཡང་དེ་ལ་གནང་ངོ་༎ དེ་ནི་གཅན་གཟན་སྔ་མའི་གཟུགས་བརྙན་ལ་གཏམ་སྨྲ་རུ་འཇུག་པ་དང་། དེ་ལ་ཕྱག་མི་འཚལ་བ་ཐམས་ཅད་གསོད་པའི་ཕྱིར་རོ།། 16 ཡང་གཅན་གཟན་ཕྱི་མ་དེས་མི་ཆེ་ཆུང་དང་། དབུལ་ཕྱུག བདག་པོ། གཡོག་པོ་བཅས་གང་ཡིན་ཐམས་ཅད་ཀྱི་གཡས་ལག་གམ། ཡང་ན་དཔྲལ་བའི་སྟེང་དུ་རྟགས་རྒྱག་ཏུ་བཅུག་ནས། 17 དེ་ནི་རྟགས་ཐོབ་པ་སྟེ་གཅན་གཟན་གྱི་མིང་ཡོད་པའམ། ཡང་ན་གཅན་གཟན་གྱི་མིང་གྲངས་ཡོད་པ་ལས་གཞན་སུ་ཞིག་གིས་ཀྱང་ཉོ་འཚོང་བྱེད་མི་ནུས་པའི་ཕྱིར་རོ།།

18 འདི་རུ་ཤེས་རབ་ཡོད་དེ། བློ་གྲོས་ལྡན་པ་སུས་ཀྱང་གཅན་གཟན་གྱི་གྲངས་ཀ་བརྩི་རུང་། ཅིའི་ཕྱིར་ཞེ་ན། དེ་ནི་མིའི་གྲངས་ཀ་ཡིན་ཏེ། དེའི་གྲངས་ཀ་ནི་དྲུག་བརྒྱ་དྲུག་ཅུ་རེ་དྲུག་ཡིན་པའི་ཕྱིར་རོ།།