༄༅། །ལེ་ཝིའི་ཚུལ་ཁྲིམས་ཀྱི་མདོ།.
1.
དེ་ཡང་དཀོན་མཆོག་ཡ་ཝཱེས་མཇལ་འཕྲད་གུར་མཆོག་ནས་མོ་ཤེ་ཞལ་འབོད་གནང་སྟེ་འདི་སྐད་དུ། 
ཁྱོད་ཀྱིས་ཡེས་ར་ཨེལ་པ་རྣམས་ལ་འདི་ལྟར་སྒོས་ཤིག ཁྱོད་རྣམས་ལས་མི་སུ་ཞིག་གིས་དཀོན་མཆོག་ཡ་ཝཱེ་ལ་སྒོ་ཕྱུགས་ཀྱི་མཆོད་པ་འབུལ་བའི་ཚེ། ཁྱོད་ཀྱི་མཆོད་པ་དེ་བ་ཁྱུ་དང་ར་ལུག་གི་ཁྱུ་ནས་འབུལ་དགོས། 
གལ་སྲིད་ཁོས་སྦྱིན་སྲེག་ཏུ་འབུལ་བའི་མཆོད་པ་ནི་བ་གླང་ཡིན་ན། གླང་ཐུག་སྐྱོན་གྱིས་མ་གོས་པ་ཞིག་དཀོན་མཆོག་ཡ་ཝཱེའི་སྤྱན་སྔར་ཁོང་གི་ཐུགས་ལ་འབབ་ཕྱིར་མཇལ་འཕྲད་གུར་མཆོག་གི་སྒོ་ཁར་འཁྲིད་དགོས། 
རང་གི་སྡིག་པ་བཤག་པའི་ཕྱིར། ཁོས་སྦྱིན་སྲེག་ཏུ་འབུལ་བའི་ཕྱུགས་ཟོག་གི་མགོ་ལ་ལག་པ་འཇོག་དགོས། དེ་ལྟར་བྱས་ན་དཀོན་མཆོག་ཡ་ཝཱེའི་ཐུགས་དང་ལྡན་པར་འགྱུར་རོ། ། 
དེ་ནས་ཁོས་དཀོན་མཆོག་ཡ་ཝཱེའི་དྲུང་དུ་གླང་ཁ་ཆུང་དེ་བཤའ་དགོས་ཤིང་། ཨ་རོན་གྱི་བུ་མཆོད་དཔོན་ཡིན་པ་རྣམས་ཀྱིས་ཁྲག་ཁྱེར་འོངས་ཏེ། མཇལ་འཕྲད་གུར་མཆོག་གི་སྒོ་ཁར་ཡོད་པའི་མཆོད་ཁྲིའི་ཕྱོགས་བཞི་རུ་གཏོར་བ་དང་། 
ཁོས་སྦྱིན་སྲེག་ཏུ་འབུལ་བའི་ཕྱུགས་ཟོག་གི་པགས་པ་བཤུས་ནས་དེའི་ཤ་ལྷུ་ལྷུ་རུ་གཅོད་དགོས། 
དེ་ནས་མཆོད་དཔོན་ཨ་རོན་གྱི་བུ་རྣམས་ཀྱིས་མཆོད་ཁྲིའི་སྟེང་མེ་སྦར་བ་དང་། མེའི་སྟེང་དུ་བུད་ཤིང་བསྒྲིག་དགོས་སོ། ། 
ཨ་རོན་གྱི་བུ་མཆོད་དཔོན་ཡིན་པ་རྣམས་ཀྱིས། ལྷུ་རྣམས་མགོ་དང་ཚིལ་བཅས་མཆོད་ཁྲིའི་སྟེང་མེ་འབར་བའི་བུད་ཤིང་གི་ཐོག་ཏུ་འཇོག་དགོས། 
སྦྱིན་སྲེག་གི་ནང་ཁྲོལ་དང་རྐང་ལག་རྣམས་ཆུས་གཙང་མར་བཀྲུས་ནས། མཆོད་དཔོན་གྱིས་དེ་ཡོངས་སུ་མཆོད་ཁྲིའི་སྟེང་སྦྱིན་སྲེག་གཏོང་དགོས། དེ་ནི་སྦྱིན་སྲེག་དང་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། ། 
གལ་སྲིད་ཁོས་སྦྱིན་སྲེག་ཏུ་འབུལ་བའི་མཆོད་པ་ནི་ར་ལུག་གི་ཁྱུ་གང་ནས་ཡིན་ན། ཕོ་ཕྱུགས་སྐྱོན་གྱི་དྲི་མས་མ་གོས་པ་ཞིག་འབུལ་དགོས། 
ཁོས་མཆོད་ཁྲིའི་བྱང་ཕྱོགས་སུ་དཀོན་མཆོག་ཡ་ཝཱེའི་དྲུང་དུ་ཕྱུགས་དེ་བཤས་ནས། ཨ་རོན་གྱི་བུ་མཆོད་དཔོན་ཡིན་པ་རྣམས་ཀྱིས་དེའི་ཁྲག་མཆོད་ཁྲིའི་ཕྱོགས་བཞི་རུ་གཏོར་དགོས། 
ཁོས་སྦྱིན་སྲེག་དེའི་ཤ་ལྷུ་ལྷུ་རུ་བཅད་ནས། མཆོད་དཔོན་གྱིས་ལྷུ་རྣམས་མགོ་དང་ཚིལ་བཅས་མཆོད་ཁྲིའི་སྟེང་མེ་འབར་བའི་བུད་ཤིང་གི་ཐོག་ཏུ་འཇོག་དགོས། 
ནང་ཁྲོལ་དང་རྐང་ལག་རྣམས་ཆུས་གཙང་མར་བཀྲུས་ནས། མཆོད་དཔོན་གྱིས་དེ་ཡོངས་སུ་ཕུལ་ཏེ་མཆོད་ཁྲིའི་སྟེང་སྦྱིན་སྲེག་གཏོང་དགོས། དེ་ནི་སྦྱིན་སྲེག་དང་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། ། 
གལ་སྲིད་ཁོས་དཀོན་མཆོག་ཡ་ཝཱེ་ལ་འབུལ་བའི་སྦྱིན་སྲེག་གི་མཆོད་པ་ནི་འདབ་ཆགས་ཡིན་ན། བྱ་ཐི་བའམ་ཕུག་རོན་ཆུང་ངུ་མཆོད་པར་འབུལ་དགོས་པ་དང་། 
མཆོད་དཔོན་གྱིས་འདབ་ཆགས་མཆོད་ཁྲིའི་རྩར་ཁྱེར་འོངས་ནས་དེའི་སྐེ་གཅུ་བ་དང་མགོ་ཕྲལ་ཏེ་མཆོད་ཁྲིའི་སྟེང་སྦར་བ་དང་། ཁྲག་ནི་མཆོད་ཁྲིའི་ལོགས་སུ་བཞུར་དགོས། 
ཡང་ཕོ་བ་དང་བྱ་སྒྲོ་རྣམས་བཏོན་ཏེ། མཆོད་ཁྲིའི་ཤར་ཕྱོགས་སུ་ཐལ་བ་འཕོ་སར་གཡུག་དགོས། 
དེ་ནས་ཁོས་འདབ་ཆགས་ཀྱི་གཤོག་པ་གཉིས་ནས་བཟུང་སྟེ་རྒྱོང་བར་བྱེད་ཀྱང་དུམ་བུར་གཅོད་པར་མི་བྱ་སྟེ། མཆོད་དཔོན་གྱིས་མཆོད་ཁྲིའི་སྟེང་འབར་བའི་བུད་ཤིང་གི་ཐོག་ཏུ་སྦྱིན་སྲེག་གཏོང་དགོས་པ་དང་། དེ་ནི་སྦྱིན་སྲེག་དང་དཀོན་མཆོག་ཡ་ཝཱེ་ལ་ཕུལ་བའི་དྲི་ཞིམ་མེ་མཆོད་ཡིན་ནོ། །