༄༅། །རྒྱལ་པོ་སོ་ལོ་མོན་གྱི་སྙན་མགུར།.
1.
སོ་ལོ་མོན་གྱིས་མཛད་པའི་མགུར་མཆོག་ཏུ་གྱུར་པ། 
བརྩེ་སེམས་བདུད་རྩི་ལས་ཀྱང་མངར་བས་ན། ། ཁོང་གིས་ང་ལ་མཆུ་སྒྲོས་འོ་མཛད་ཤོག ། 
ཁྱེད་ཀྱི་སྤོས་ཀྱི་དྲི་བསུང་སྣ་ལ་ཞིམ། ། ཉིད་ཀྱི་མཚན་ནི་སྤོས་བཟང་བླུགས་འདྲ་ཡིན། ། དེའི་ཕྱིར་ལང་ཚོ་མ་རྣམས་ཁྱེད་ལ་དུངས། ། 
ཁྱེད་ཀྱིས་ངའི་སེམས་བཀུག་ནས་འགུག་གྱུར་ཅིག ། ངེད་གཉིས་ཁྱེད་ཀྱི་རྗེས་སུ་འབྲངས་ནས་རྒྱུག ། རྒྱལ་པོས་ང་རང་གཟིམས་ཁང་ནང་དུ་ཁྲིད། ། ༼ མཛའ་གྲོགས་རྣམས། ༽ ཁྱེད་ཕྱིར་ངེད་ཅག་དགའ་ཞིང་མགུ་བར་བྱ། ། དྲི་མཆོག་བདུད་རྩི་ལས་ཀྱང་ལྷག་པ་ཡི། ། ཁྱེད་ཀྱི་མཛའ་སེམས་ལ་ནི་བསྟོད་བསྔགས་བརྗོད། ། ༼ བག་མ། ༽ ཁོ་མོ་ཚོ་ནི་ཁྱེད་ལ་དགའ་འོས་སོ། ། 
ཀྱེ་ཀྱེ་ཡེ་རུ་སཱ་ལེམ་བུ་མོ་རྣམས། ། བདག་གི་ཤ་མདངས་ནག་ཀྱང་མཛེས་སྡུག་ལྡན། ། དེ་ནི་ཀེ༌དཱར་གྱི་ནི་གུར་དང་མཚུངས། ། སོ་ལོ་མོན་གྱི་ཡོལ་བ་ལྟར་དུ་ཡིན། ། 
ངའི་གདོང་ཉི་མས་ཚིག་ནས་ནག་པོར་གྱུར། ། མཐོང་ཆུང་མིག་གིས་ང་ལ་མ་བལྟ་རོགས། ། མ་གཅིག་སྤུན་རྣམས་བདག་ལ་རབ་ཏུ་ཁྲོས། ། རྒུན་ཚལ་བསྲུང་དུ་ང་རང་བསྐོས་པ་དང་། ། ང་ཡི་རྒུན་ཚལ་བསྐྱུར་ནས་བདག་མེད་ལུས། ། 
ཀྱེ་ཀྱེ་ང་ཡི་བྱམས་པ་ལགས། ། ཁྱེད་ཀྱིས་གང་དུ་ལུག་འཚོ་འམ། ། ཉིན་གུང་ལུག་ཁྱུ་གང་དུ་གསོ། ། ཐམས་ཅད་བདག་ལ་སྨྲ་བར་མཛོད། ། ཁྱེད་ཀྱི་གྲོགས་པོའི་ལུག་ཁྱུ་འགྲམ། ། གདོང་ཁེབས་ཅན་ལྟར་འགྱུར་དོན་ཅི། ། 
མཛེས་མའི་མཆོག་ཁྱེད་རྒྱུས་མེད་ན། ། ལུག་ཁྱུའི་རྐང་རྗེས་དེད་ནས་སོང་། ། རྫི་བོའི་གུར་གྱི་ཉེ་འཁོར་དུ། ། རང་གི་རེའུ་རྣམས་འཚོ་བར་མཛོད། ། 
ཀྱེ་ཀྱེ་ང་ཡི་སྙིང་སྡུག་ཁྱེད་རང་ནི། ། ཕཱར་ཨོལ་ཤིང་རྟའི་རྒོད་མ་བཞིན་དུ་མཛེས། ། 
ཁྱེད་ཀྱི་མཁུར་ཚོས་ལན་བུ་དག་གིས་མཛེས། ། ཁྱེད་ཀྱི་མགུལ་ནི་རིན་པོ་ཆེ་ཡིས་བརྒྱན། ། 
ང་ཚོས་དངུལ་གྱིས་བརྒྱན་པ་ཡི། ། གསེར་གྱི་རྣ་ལོང་ཁྱེད་ལ་བཟོ། ། 
རྒྱལ་པོ་ཁོང་ཉིད་འབོལ་ཁྲི་ལ་བཞུགས་དུས། ། ང་ཡི་ནཱར་དི་སྤོས་ཀྱི་དྲི་བསུང་འཐུལ། ། 
ང་ཡི་དགའ་གྲོགས་གུ་གུལ་ཐུམ་གཅིག་འདྲ། ། ཁོང་ནི་ནམ་རྒྱུན་ང་ཡི་བྲང་ཁར་ཡོད། ། 
ང་ཡི་དགའ་གྲོགས་ཨེན་གེ་དི་ཡུལ་གྱི། ། རྒུན་ཚལ་ནང་གི་མེ་ཏོག་གླང་སྣ་བཞིན། ། 
ཀྱེ་ཀྱེ་ང་ཡི་སྙིང་སྡུག་ལགས། ། ཁྱེད་ཀྱི་བྱད་གཟུགས་རབ་ཏུ་མཛེས། ། ཁྱེད་ཀྱི་བྱད་གཟུགས་རབ་ཏུ་མཛེས། ། ཕུག་རོན་སྤྱན་ཟུང་ཁྱེད་ལ་ལྡན། ། 
ཀྱེ་ཀྱེ་གཟིགས་དང་ང་ཡི་དགའ་གྲོགས་ལགས། ། ཁྱེད་ཀྱི་ཞལ་རས་མཚར་ཞིང་ཡིད་དུ་འོང་། ། མཛེས་སྡུག་སྤང་ལྗོངས་ང་ཚོའི་མལ་ཁྲི་ཡིན། ། 
ངེད་ཀྱི་ཁང་པའི་གདུང་མ་ཐང་ཤིང་དང་། ། ཁང་པའི་ལྕམ་གདུང་ལ་ནི་གསོམ་ཤིང་ཡོད། །