༄༅། །ལུང་སྟོན་པ་ཡོ་ནཱའི་མདོ།.
1.
དེ་ཡང་དཀོན་མཆོག་ཡ་ཝཱེའི་བཀའ་ནི་ཨ་མི་ཐཱ་ཨི་བྱ་བའི་བུ་ཡོ་ནཱ་ལ་བྱུང་སྟེ་འདི་སྐད་དུ། 
ཁྱོད་རང་ཡར་ལངས་ནས་གྲོང་ཁྱེར་ཆེན་པོ་ནིན་ཝེ་ལ་ཐ་ཚིག་བསྒྲག་པར་སོང་ཞིག ཅིའི་ཕྱིར་ཞེ་ན། ཁོ་ཚོའི་བྱ་བ་ངན་པ་ནི་ཡར་བདག་གི་མདུན་དུ་སླེབས་པས་སོ་ཞེས་གསུངས་སོ༎ 
འོན་ཀྱང་ཡོ་ནཱ་ནི་དཀོན་མཆོག་ཡ་ཝཱེའི་དྲུང་ནས་ཐཱར་ཞིས་གྲོང་ཁྱེར་ལ་འབྲོ་བའི་ཆེད་དུ། མར་ཡོ་ཕཱ་གྲོང་ཁྱེར་དུ་ཕྱིན་པ་དང་། ཐཱར་ཞིས་སུ་འགྲོ་བའི་གྲུ་གཟིངས་ཤིག་རྙེད་ནས་གླ་སྤྲད་ཅིང་། དེའི་ནང་མར་བསྡད་པ་དང་གྲུར་ཞུགས་པ་རྣམས་དང་ལྷན་དུ་དཀོན་མཆོག་ཡ་ཝཱེའི་དྲུང་ནས་ཐཱར་ཞིས་ལ་སོང་ངོ་།། 
ཡིན་ནའང་། དཀོན་མཆོག་ཡ་ཝཱེས་རྒྱ་མཚོ་ལ་དྲག་རླུང་ཆེན་པོ་ཞིག་གཡུགས་སུ་བཅུག་པ་དང་། མཚོ་སྟེང་དུ་ཆར་རླུང་དྲག་པོ་བྱུང་ཞིང་མཚོ་གྲུ་འཐོར་ལ་ཁད་བྱས། 
གྲུ་པ་རྣམས་ཤིན་ཏུ་འཇིགས་ཏེ་སྐད་ཆེན་པོ་བརྒྱབ་ནས་རང་རང་གི་ལྷ་ལ་འོ་དོད་བོས། ཁོ་ཚོས་གྲུ་ཇེ་ཡང་དུ་གཏོང་ཆེད་གྲུ་ནང་གི་ཚོང་རྫས་ཡོད་ཚད་མཚོའི་ནང་དུ་གཡུགས། འོན་ཀྱང་། དེ་སྔར་ཡོ་ནཱ་མར་གྲུའི་ཕུག་ཏུ་སོང་སྟེ་ཉལ་ནས་གཉིད་སྟུག་པོ་ཁུགས་པས། 
གྲུ་དཔོན་ཁོའི་གམ་དུ་སླེབས་ནས། ཁྱོད་རང་གཉིད་ནས་སྡོད་པ་ཅི་ཡིན་ནམ། ཡར་ལོངས་ལ་རང་གི་ལྷ་ལ་ཞུ་བ་ཕུལ་ཅིག ལྷ་དེས་འུ་ཅག་ཐུགས་སུ་དྲན་ན། རང་ཅག་འཆི་བར་མི་འགྱུར་རོ་ཞེས་སྨྲས་པ་དང་། 
གྲུ་པ་རེ་རེ་བཞིན་གཅིག་གིས་གཅིག་ལ་ཤོག་དང་། དོན་ངན་འདི་སུའི་རྐྱེན་གྱིས་བྱུང་བར་རྒྱན་འཕངས་ཏེ་བརྟག་པར་བྱ་ཟེར་ནས། དེ་ལྟར་བསྒྲུབས་པ་ན་ཡོ་ནཱ་ལ་བབས་པ་རེད། 
དེ་ནས་དེ་དག་གིས་ཡོ་ནཱ་ལ། དོན་ངན་འདི་རང་ཅག་ལ་བྱུང་བ་ནི་སུའི་རྐྱེན་ཡིན་པ་སྨྲ་བར་མཛོད། ཁྱོད་ཀྱི་བྱ་བ་ཅི་ཡིན། ས་ཆ་གང་ནས་ཡོང་། ཕ་ཡུལ་གང་གི་ཡིན། མི་རིགས་གང་ཡིན་ཞེས་དྲིས་པ་ན། 
ཁོས་དེ་དག་ལ། ང་རང་ཨིབ་རི་པ་ཡིན་ཏེ། རྒྱ་མཚོ་དང་སྐམ་ས་མཛད་མཁན་གྱི་ནམ་མཁའི་དཀོན་མཆོག་ཡ་ཝཱེ་ལ་ང་རང་གུས་ཤིང་འཇིགས་པ་ཡིན་ཞེས་སྨྲས་སོ།། 
དེ་ནས་གྲུ་པ་རྣམས་རབ་ཏུ་འཇིགས་ནས་ཡོ་ནཱ་ལ། ཁྱོད་ཀྱིས་བྱས་པའི་དོན་འདི་ཅི་ཞིག་ཡིན་ནམ་ཞེས་སྨྲས་སོ།། ཅིའི་ཕྱིར་ཞེ་ན། ཁོས་དེ་རྣམས་ལ་སྨྲས་པའི་རྐྱེན་གྱིས་དེ་དག་གིས་ཁོ་རང་དཀོན་མཆོག་ཡ་ཝཱེའི་དྲུང་ནས་བྲོས་ཡོང་བ་ཤེས་པས་སོ།། 
སྐབས་དེར་མཚོ་རླབས་ཆེ་རུ་འགྲོ་བཞིན་ཡོད་པ་དང་། དེ་རྣམས་ན་རེ། མཚོ་རླབས་ཞི་བའི་ཕྱིར་ཁྱོད་ལ་ཅི་ཞིག་བྱེད་དགོས་སམ་ཞེས་དྲིས་པ་ན། 
ཁོས་དེ་རྣམས་ལ། ཁྱོད་རྣམས་ཀྱིས་ང་རང་ཁྱེར་ནས་མཚོའི་ནང་དུ་གཡུགས་ཤིག་དང་། མཚོ་ཞི་བར་འགྱུར་ལ་བདག་གི་རྐྱེན་གྱིས་དྲག་རླུང་འདི་ཁྱོད་ཅག་ལ་བབས་པའང་ངས་ཤེས་སོ་ཞེས་སྨྲས་ནའང་། 
མདུན་ཕྱོགས་སུ་མཚོ་རླབས་ཤིན་ཏུ་དྲག་པོ་འཕྱུར་བཞིན་ཡོད་པས། ཁོ་རྣམས་ཀྱིས་གྲུ་སྐྱ་ཇི་ལྟར་དཀྲུགས་ཀྱང་སྐམ་སར་སླེབས་མ་ནུས། 
དེ་དག་གིས་དཀོན་མཆོག་ཡ་ཝཱེ་ལ་འདི་ལྟར་ཞུས་ཏེ། ཀྱེ་དཀོན་མཆོག་ཡ་ཝཱེ་ལགས། ངེད་ཅག་ནི་མི་འདིའི་སྲོག་གི་རྐྱེན་གྱིས་སྲོག་དང་འབྲལ་བར་མ་གྱུར་ཅིག ཉེས་མེད་ཀྱི་ཁྲག་བཞུར་བའི་སྡིག་པ་ངེད་ཅག་གི་མགོ་ལ་དབབ་ཏུ་མི་འཇུག་རོགས། དཀོན་མཆོག་ཡ་ཝཱེ་ལགས། ཁྱེད་ཉིད་ཇི་ལྟར་མཉེས་ན་དེ་ལྟར་མཛད་པ་ལགས་སོ་ཞེས་པའོ།། 
དེ་ནས་ཁོ་རྣམས་ཀྱིས་ཡོ་ནཱ་བཟུང་ནས་མཚོའི་ནང་དུ་འཕངས་པ་དང་། རྒྱ་མཚོའི་རྦ་རླབས་ཀྱང་འཕྱུར་མཚམས་བཞག་གོ། 
ཁོ་རྣམས་དཀོན་མཆོག་ཡ་ཝཱེ་ལ་ཤིན་ཏུ་འཇིགས་ནས། ཁོང་ལ་མཆོད་པ་ཕུལ་ཞིང་དམ་བཅས་སོ།། 
དེ་ནས་དཀོན་མཆོག་ཡ་ཝཱེས་ཉ་ཆེན་ཞིག་ལ་ཡོ་ནཱ་མིད་དུ་བཅུག་ཅིང་། ཡོ་ནཱ་ཉིན་ཞག་གསུམ་ལ་ཉ་ཆེན་གྱི་གྲོད་ཁོག་ནང་དུ་ལུས་སོ།།