༄༅། །ལུང་སྟོན་པ་མི་ཀཱའི་མདོ།.
1.
ཡ་ཧུ་དཱའི་རྒྱལ་པོ་ཡོ་ཐམ་དང་ཨ་ཧ་ཟཱ། ཧི་ཟི་ཀི་ཡཱ་བཅས་ཀྱི་དུས་སུ་དཀོན་མཆོག་ཡ་ཝཱེའི་བཀའ་ནི་མོ་རེ་ཤེད་པ་མི་ཀཱ་ལ་བྱུང་ནས། ཁོང་གིས་སཱ་མར་ཡ་གྲོང་ཁྱེར་དང་ཡེ་རུ་སཱ་ལེམ་གཉིས་ཀྱི་སྐོར་ལ་ཞལ་གཟིགས་མཐོང་བར་གྱུར། 
ཀྱེ་མི་སྡེ་ཐམས་ཅད། ཁྱོད་ཚོས་འདིར་ཉོན་དང་། ཀྱེ་ས་གཞི་དང་དེའི་སྟེང་དུ་གནས་པ་ཐམས་ཅད་ཀྱིས་རྣ་བ་གཏད་ནས་ཉོན་ཅིག གཙོ་བོ་ཡ་ཝཱེས་ཉིད་ཀྱི་མཆོད་ཁང་དམ་པ་ནས་ཁྱོད་ཅག་གི་ཉེས་སྐྱོན་ལ་བདེན་དཔང་མཛད་པར་འགྱུར། 
ལྟོས་ཤིག དཀོན་མཆོག་ཡ་ཝཱེ་ཁོང་གི་བཞུགས་གནས་ལས་ཕྱི་རུ་ཐོན་ནས་མར་ཕེབས་པ་དང་། ས་གཞིའི་མཐོ་ས་རྣམས་ལ་ཞབས་ཀྱིས་བཅག་པར་འགྱུར། 
རི་བོ་རྣམས་ཁོང་གི་འོག་ཏུ་བཞུ་ཞིང་། ལུང་པ་རྣམས་གས་པར་འགྱུར་ལ། དེ་ནི་པྲ་ཚིལ་མེའི་ནང་དུ་བཞུ་བ་དང་། རི་ལྡེབས་ནས་འབབ་པའི་ཆུ་དང་འདྲའོ། ། 
འདི་ཐམས་ཅད་ནི་ཡ་ཀོབ་ཀྱི་ཉེས་སྐྱོན་དང་། ཡེས་ར་ཨེལ་ཁྱིམ་རྒྱུད་ཀྱི་སྡིག་པའི་རྐྱེན་གྱིས་ཡིན་ཏེ། ཡ་ཀོབ་ཀྱི་ཉེས་སྐྱོན་ནི་ཅི་ཡིན་ནམ། དེ་ནི་སཱ་མར་ཡ་མ་ཡིན་ནམ། ཡ་ཧུ་དཱའི་མཐོ་གླིང་རྣམས་གང་དུ་ཡོད་དམ། དེ་རྣམས་ནི་ཡེ་རུ་སཱ་ལེམ་དུ་ཡོད་པ་མ་ཡིན་ནམ། 
དེ་བས་བདག་གིས་སཱ་མར་ཡ་ནི་རི་ཐང་གི་གྱང་རོ་ལྟ་བུ་དང་། རྒུན་འབྲུམ་འཛུགས་ས་ལྟ་བུར་བསྒྱུར་བར་བྱ། བདག་གིས་དེའི་རྡོ་རྣམས་ལུང་པར་བསྒྲིལ་ཞིང་། རྨང་གཞི་རྣམས་འདོན་པར་བྱ། 
གྲོང་ཁྱེར་ནང་གི་འདྲ་སྐུ་བརྐོས་མ་རྣམས་གཅོག་ཅིང་། ལོག་གཡེམ་བྱས་ནས་ཐོབ་པའི་དངུལ་ནི་མེས་བསྲེག་པ་དང་། བདག་གིས་དེའི་འདྲ་སྐུ་ཐམས་ཅད་མེད་པར་གཏོང་དགོས། ཅིའི་ཕྱིར་ཞེ་ན། སྨད་འཚོང་མ་ལ་ཐོབ་པའི་དངུལ་ལས་བསྡུས་པ་ནི་སླར་ཡང་སྨད་འཚོང་མའི་ཐོབ་དངུལ་དུ་འགྱུར། 
དེའི་ཕྱིར་བདག་གིས་འོ་དོད་འདོན་ཞིང་། གོས་མེད་གཅེར་བུར་རྐང་རྗེན་དུ་རྒྱུ་བར་བྱ། ཡང་ངས་ཁྱི་སྤྱང་ལྟར་སྨྲེ་སྔགས་བཏོན་ནས་རྔ་བྱ་བཞིན་དུ་འཁུན་སྒྲ་འབྱིན་ཏེ། 
ཅིའི་ཕྱིར་ཞེ་ན། སཱ་མར་ཡ་ཡི་རྨ་ཁ་ནི་གསོ་ཐབས་མེད་པར་ཡ་ཧུ་དཱ་རུ་སླེབས་ཤིང་། བདག་གི་མི་སྡེའི་མཁར་སྒོ་སྟེ་ཡེ་རུ་སཱ་ལེམ་དུ་སླེབས་སོ། ། 
གཱད་ཀྱི་ནང་དུ་འཕྲིན་དེ་མ་བསྒྲག་ཅིག ངུ་ཡང་མ་ངུ་ཞིག པེད་ལེ་ཨབ་རཱ་རུ་ས་རྡུལ་ནང་དུ་འགྲེ་ལོག་རྒྱག་དགོས། 
ཀྱེ་ཀྱེ་ཤཱ་ཕིར་གྱི་མི་རྣམས། ལུས་གཅེར་བུར་ངོ་ཚ་དང་བཅས་རྒྱུ་བར་གྱིས། ཟཱ་ནན་གྱི་མི་རྣམས་ཕྱི་རུ་འབུད་མ་སྤོབས་ཏེ། པེད་ཨེ་ཟེལ་ཡིད་སྐྱོ་ནས་ངུ་ཞིང་ཁྱོད་རྣམས་ལ་རྒྱབ་རོགས་བྱེད་མི་ནུས་སོ། ། 
དཀོན་མཆོག་ཡ་ཝཱེ་ནས་ཆག་སྒོ་བྱུང་ཞིང་ཡེ་རུ་སཱ་ལེམ་གྱི་མཁར་སྒོ་རུ་སླེབས་པས། མ་རོད་ཀྱི་མི་རྣམས་སེམས་འཚབ་སྟེ་བྱིན་རླབས་ལ་རེ་སྨོན་བྱེད་དོ། ། 
ཀྱེ་ཀྱེ་ལཱ་ཀི་སིའི་མི་རྣམས། རྟ་འགྲོས་མར་ཤིང་རྟ་སྦྱོར་ཅིག ཛ་ཡན་གྱི་སྡིག་པ་ཁྱོད་ལས་བྱུང་སྟེ། ཡེས་ར་ཨེལ་གྱི་སྡིག་པ་རྣམས་ཁྱོད་ལས་མངོན་པ་ཡིན། 
དེའི་ཕྱིར་ཁྱོད་ཀྱིས་མོ་རེ་ཤེད་གཱད་ལ་ལེགས་སྐྱེས་ཕུལ་ཏེ། ཨག་ཟིབ་ཀྱི་ཁྱིམ་རྒྱུད་རྣམས་ཀྱིས་ཡེས་ར་ཨེལ་གྱི་རྒྱལ་པོ་རྣམས་ལ་གཡོ་སྒྱུའི་སྦྱོར་བ་སྤེལ་བར་འགྱུར་རོ། ། 
ཀྱེ་མཱ་རེ་ཤ་ཡི་མི་རྣམས། བདག་གིས་འཕྲོག་བཅོམ་བྱེད་མཁན་རྣམས་ཁྱོད་ཀྱི་ཁྲོད་དུ་མངགས་པར་བྱེད་ཅིང་། ཡེས་ར་ཨེལ་གྱི་སྐུ་དྲག་རྣམས་ཨ་དུལ་ལཱམ་དུ་འོང་ངེས་ཡིན། 
ཀྱེ་ཡ་ཧུ་དཱ། རང་གི་གཅེས་པའི་བུ་ཕྲུག་རྣམས་ཀྱི་ཕྱིར་སྐྲ་བྲེགས་ནས་གཞར་དགོས་ལ། ཁྱོད་ཀྱི་མགོ་ནི་བྱ་རྒོད་ལྟར་སྤྱི་ཐེར་ཡིན་དགོས་ཏེ། དེ་དག་བཙན་ཁྲིད་བྱས་ཏེ་ཁྱོད་དང་རིང་དུ་འབྲལ་བའི་ཕྱིར་རོ། །