༄༅། །ལུང་སྟོན་པ་ནཱ་ཧུམ་གྱི་མདོ།.
1.
དེ་ཡང་ནིན་ཝེ་གྲོང་ཁྱེར་སྐོར་གྱི་བཀའ་ལུང་སྟེ། ཨེལ་ཀོ་སི་པ་ནཱ་ཧུམ་ལ་ཐོབ་པའི་ཞལ་གཟིགས་ཀྱི་མདོ་ནི་འདི་ལྟ་སྟེ། 
དཀོན་མཆོག་ཡ་ཝཱེ་ནི་ཕྲག་དོག་ཅན་དང་ལན་འཇལ་བའི་དཀོན་མཆོག་ཡིན་ལ། དཀོན་མཆོག་ཡ་ཝཱེས་ལན་འཇལ་བར་མ་ཟད་ད་དུང་ཐུགས་ཁྲོ་མེ་ལྟར་འབར་ཞིང་། ཁོང་གིས་ཉིད་ཀྱི་དགྲ་ལ་ལན་འཇལ་བ་དང་། ཁོང་ནི་དགྲ་ལ་ཐུགས་རབ་ཏུ་ཁྲོ་བ་ཡིན། 
དཀོན་མཆོག་ཡ་ཝཱེ་རང་དགར་ཐུགས་མི་ཁྲོ་ལ། ཁོང་ནི་མཐུ་བོ་ཆེ་ཡིན་ཞིང་། ཁོང་གིས་རྩ་བ་ནས་ཉེས་ཅན་རྣམས་ཉེས་མེད་དུ་མི་བརྩི་སྟེ། དཀོན་མཆོག་ཡ་ཝཱེ་ནི་རླུང་འཚུབ་དང་དྲག་ཆར་ཁྲོད་ནས་ཕེབས་འོང་ལ། སྤྲིན་ཕུང་རྣམས་ཁོང་གི་ཞབས་འོག་གི་ས་རྡུལ་ཡིན་ནོ། ། 
ཁོང་གིས་རྒྱ་མཚོར་བཀའ་བཀྱོན་གནང་བ་ཙམ་གྱིས་རྒྱ་མཚོ་སྐམ་ཞིང་། ཁོང་གིས་གཙང་པོ་ཐམས་ཅད་སྐམ་པར་མཛད་དེ། པཱ་ཤན་དང་ཀར་མེལ་གྱི་རྩྭ་ཐང་སྐམ་པ་དང་། ལེ་པཱ་ནོན་གྱི་མེ་ཏོག་ཡང་རྙིད་ནས་ལྷུང་བའོ། ། 
ཁོང་གི་སྤྱན་སྔར་རི་བོ་རྣམས་འདར་ཞིང་། རི་ཕྲན་རྣམས་ཞུ་བར་འགྱུར་ལ། ས་གཞི་ཁོང་གི་དྲུང་དུ་གཡོ་ཞིང་རྒུད་པར་འགྱུར་བ་དང་། ས་གཞི་དང་དེའི་སྟེང་དུ་གནས་པ་ཐམས་ཅད་ཀྱང་དེ་བཞིན་ཡིན་ནོ། ། 
ཁོང་གི་ཁྲོ་གཏུམ་འོག་ཏུ་སུ་ཞིག་ཚུགས་ནུས་སམ། ཁོང་གི་ཐུགས་ཁྲོ་སུ་ཞིག་གིས་བཟོད་ཐུབ་བམ། ཁོང་གི་ཐུགས་ཁྲོ་ཆེན་པོ་ནི་མེ་ལྟར་འཕྱུར་བ་དང་། བྲག་རྡོ་ཡང་ཁོང་གི་དྲུང་དུ་གས་པར་གྱུར། 
དཀོན་མཆོག་ཡ་ཝཱེ་ནི་ལེགས་པོ་ཡིན་ཏེ། དཀའ་སྡུག་གི་དུས་སུ་ཁོང་ནི་མི་རྣམས་ཀྱི་སྐྱབས་གནས་ཡིན་ལ། ཁོང་ལ་བརྟེན་པའི་མི་རྣམས་ཁོང་གིས་མཁྱེན་ནོ། ། 
ཡིན་ན་ཡང་ཁོང་གིས་ཆུ་ལོག་ཆེན་པོས་ནིན་ཝེ་བསྣུབ་པར་མཛད་ཅིང་། ཁོང་གི་དགྲ་བོ་རྣམས་མུན་པའི་ནང་དུ་སྐྲོད་པར་འགྱུར། 
ཀྱེ་ནིན་ཝེ་པ་རྣམས། ཁྱོད་རྣམས་ཀྱིས་ཇུས་ངན་གང་ཞིག་བཤམས་ནས་དཀོན་མཆོག་ཡ་ཝཱེར་རྒོལ་བ་ཡིན་ནམ། ཁོང་གིས་ཡོངས་སུ་མེད་པར་མཛད་ཅིང་། དཀའ་སྡུག་ཡང་བསྐྱར་འབྱུང་བར་མི་འགྱུར། 
དེ་དག་ནི་དཀྲིས་ནས་མདུད་པ་བརྒྱབ་པའི་ཚེར་མ་བཞིན་དང་། ཆང་གིས་ར་བཟི་བའི་མི་དང་སོག་མ་སྐམ་པོ་ཡོངས་སུ་མེར་བསྲེགས་པ་དང་མཚུངས། 
ངན་པ་འགོད་མཁན་ཏེ་ཇུས་ངན་བཤམས་ནས་དཀོན་མཆོག་ཡ་ཝཱེར་རྒོལ་བའི་མི་ནི་ཁྱོད་ལས་ཕྱི་རུ་ཐོན་ནོ། ། 
ཡང་དཀོན་མཆོག་ཡ་ཝཱེས་འདི་སྐད་དུ། ནིན་ཝེ་པའི་དམག་ཆས་ཆ་ཚང་ཞིང་མི་གྲངས་མང་མོད། འོན་ཀྱང་དེ་དག་ཚར་དུ་བཅད་ནས་མེད་པར་འགྱུར། ཀྱེ་ཡ་ཧུ་དཱ། ངས་ཁྱོད་ལ་སྡུག་བསྔལ་མྱང་དུ་བཅུག་ན་ཡང་ད་ཕྱིན་ཆད་ཁྱོད་རང་སྡུག་ལ་མི་སྦྱར་རོ། ། 
དེས་ཁྱོད་ཀྱི་མཇིང་ལ་བཀལ་བའི་གཉའ་ཤིང་ནི་ངས་ད་ལྟ་གཅོག་ཅིང་། ཁྱོད་ཀྱི་ལྕགས་ཐག་རྣམས་དུམ་བུར་གཅོད་པར་འགྱུར་ཞེས་གསུངས་སོ། ། 
ནིན་ཝེའི་སྐོར་ལ་དཀོན་མཆོག་ཡ་ཝཱེས་བཀའ་བབས་པ་སྟེ། ཁྱོད་ཀྱི་མི་རབས་ཆད་དེ་མིང་ཙམ་ཡང་ལུས་པར་མི་འགྱུར་ལ། ངས་ཁྱོད་ཀྱི་ལྷ་ཁང་ནང་གི་སྐུ་འདྲ་བརྐོས་མ་དང་བླུག་སྐུ་རྣམས་མེད་པར་བཟོ་ཞིང་། ཁྱོད་ནི་ཐ་ཤལ་ཡིན་པས། ངས་ཁྱོད་ཀྱི་ཕྱིར་དུ་དུར་ས་གྲ་སྒྲིག་བྱེད་ངེས་ཡིན། 
ལྟོས་ཤིག འཕྲིན་བཟང་སྒྲོག་ཅིང་ཞི་བདེ་ཁྱབ་སྒྲོག་བྱེད་མཁན་གྱི་ཞབས་ནི་རི་བོ་སྟེང་དུ་འཛེགས་ནས་ན་རེ། ཀྱེ་ཡ་ཧུ་དཱ། ད་ནི་ཁྱོད་ཀྱིས་དུས་ཆེན་སྲུངས་ལ་རང་གི་དམ་བཅའ་སྒྲུབས་ཤིག ཅིའི་ཕྱིར་ཞེ་ན། ཕྱིན་ཆད་མི་ངན་དེ་ཁྱོད་ཀྱི་དཀྱིལ་ནས་མི་འགྲོ་ཞིང་། དེ་ནི་རྩ་བ་ནས་མེད་པར་བཟོས་པའོ་ཞེས་གསུངས་སོ། །