༄༅། །ལུང་སྟོན་པ་ཧག་གཱ་ཨིའི་མདོ།.
1.
དེ་ཡང་རྒྱལ་པོ་དར་ཡཱས་སྲིད་སྐྱོང་བའི་ལོ་གཉིས་པའི་ཟླ་དྲུག་པ་ཡི་ཚེས་གཅིག་ཉིན་ལ། དཀོན་མཆོག་ཡ་ཝཱེའི་བཀའ་ནི་ལུང་སྟོན་པ་ཧག་གཱ་ཨི་བརྒྱུད་དེ་ཞིད་ཨལ་ཐེ་ཨེལ་གྱི་བུ་སྟེ་ཡ་ཧུ་དཱའི་འགོ་དཔོན་ཟེ་རུ་པཱ་པེལ་དང་། ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨ་གཉིས་ལ་བྱུང་ནས་འདི་སྐད་དུ། 
དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། འབངས་མི་རྣམས་ཀྱིས་དཀོན་མཆོག་ཡ་ཝཱེའི་མཆོད་ཁང་ཡང་བསྐྱར་བཞེང་བའི་དུས་དེ་ད་དུང་སླེབས་མེད་ཟེར་ཞེས་གསུངས་པ་དང་། 
དེ་ནས་དཀོན་མཆོག་ཡ་ཝཱེའི་བཀའ་ནི་ལུང་སྟོན་པ་ཧག་གཱ་ཨི་ལ་བྱུང་ནས་འདི་སྐད་དུ། 
མཆོད་ཁང་འདི་སྔར་བཞིན་ཞིག་རོར་ལུས་ཡོད་ལ། ཁྱོད་རྣམས་ད་དུང་གནམ་གཅལ་ལྡན་པའི་ཁང་པར་སྡོད་པ་ཡིན་ནམ་ཞེས་གསུངས་ཤིང་། 
ད་ལྟ་དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཀྱིས་རང་གི་སྤྱོད་པར་རྟོགས་ཤིག 
ཁྱོད་རྣམས་ཀྱིས་ས་བོན་མང་པོ་བཏབ་ཀྱང་འབྲས་བུ་བསྡུ་བ་ཉུང་ལ། ཁྱོད་ཅག་གིས་ཟོས་ཀྱང་མ་འགྲང་། འཐུང་ཡང་མ་ཚིམ། གོས་གྱོན་ཡང་ལུས་མ་དྲོས། གླ་ཆ་ཐོབ་ཀྱང་ཁུག་མ་རལ་པོའི་ནང་དུ་བཅུག་ཅེས་གསུངས་སོ། ། 
དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། ཁྱོད་རྣམས་ཀྱིས་རང་གི་སྤྱོད་པར་རྟོགས་ཤིག 
ཁྱོད་རྣམས་རི་ལ་འཛེགས་ཏེ་ཤིང་ཆ་བླངས་ནས་མཆོད་ཁང་བཞེང་བར་གྱིས་དང་། ང་རང་དེའི་རྐྱེན་གྱིས་དགའ་ཞིང་གཟི་བརྗིད་ཀྱང་འཐོབ་པར་འགྱུར་ཞེས་དཀོན་མཆོག་ཡ་ཝཱེས་གསུངས། 
ཁྱོད་རྣམས་ཀྱིས་ལོ་ལེགས་འབྱུང་བར་རེ་སྒུག་བྱེད་ཀྱང་འབྲས་བུ་ཉུང་ངུ་བསྡུ་ཞིང་། ཁྱོད་ཚོས་ཁྱིམ་དུ་བསྡུས་པ་རྣམས་ངས་རླུང་ལ་བསྐུར། ཅིའི་ཕྱིར་ཞེ་ན། དཔུང་ཚོགས་ཀུན་གྱི་དཀོན་མཆོག་ཡ་ཝཱེས་འདི་སྐད་དུ། བདག་གི་མཆོད་ཁང་ཞིག་རོར་ལུས་ཀྱང་ཁྱོད་རྣམས་རང་རང་གི་ཁང་པའི་ཆེད་དུ་འདུར་བའོ། ། 
དེ་བས་ཁྱོད་ཅག་གི་རྐྱེན་གྱིས་གནམ་ནས་ཟིལ་ཆར་མི་འབབ་ལ། ས་ནས་ལོ་ཏོག་མི་འབྱུང་ངོ་། ། 
ངས་ས་གཞི་དང་རི་སྒང་། འབྲུ་རིགས། རྒུན་ཆང་གསར་པ་དང་སྣུམ། ས་ཡི་ཐོན་རྫས་ཐམས་ཅད། མི་དང་ཕྱུགས། མིའི་རྩོལ་བ་ལས་ཐོབ་པ་ཐམས་ཅད་ཀྱི་སྟེང་དུ་ཐན་པ་བྱུང་དུ་བཅུག་པ་ཡིན་ཞེས་གསུངས་སོ། ། 
དུས་དེར་ཞིད་ཨལ་ཐེ་ཨེལ་གྱི་བུ་ཟེ་རུ་པཱ་པེལ་དང་། ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨ་དང་ལྷག་ལུས་ཐམས་ཅད་ཀྱིས་རང་གི་དཀོན་མཆོག་ཡ་ཝཱེའི་གསུང་དང་། ཁོ་ཚོའི་དཀོན་མཆོག་ཡ་ཝཱེས་མངགས་པའི་ལུང་སྟོན་པ་ཧག་གཱ་ཨིའི་བཀའ་ལ་མཉན་ནས། མི་རྣམས་ལ་དཀོན་མཆོག་ཡ་ཝཱེའི་དྲུང་དུ་གུས་ཤིང་འཇིགས་པའི་སེམས་དང་ལྡན་ནོ། ། 
དཀོན་མཆོག་ཡ་ཝཱེའི་ཕོ་ཉ་ཧག་གཱ་ཨི་ཡིས་ཁོང་གི་བཀའ་བཞིན་དུ་མི་རྣམས་ལ་ན་རེ། ང་ཁྱོད་རྣམས་དང་མཉམ་དུ་ཡོད་ཅེས་དཀོན་མཆོག་ཡ་ཝཱེས་གསུངས་སོ་ཞེས་སྨྲས། 
དེ་ནས་དཀོན་མཆོག་ཡ་ཝཱེས་ཞིད་ཨལ་ཐེ་ཨེལ་གྱི་བུ་སྟེ་ཡ་ཧུ་དཱའི་འགོ་དཔོན་ཟེ་རུ་པཱ་པེལ་གྱི་སེམས་དང་། ཡེ་ཧོ་ཙ་དག་གི་བུ་སྟེ་མཆོད་དཔོན་ཆེན་པོ་ཡོ་ཤུ་ཨའི་སེམས་དང་། ལྷག་ལུས་ཐམས་ཅད་ཀྱི་སེམས་ལ་སྐུལ་སློང་མཛད་པས། དེ་དག་འོངས་ནས་རང་གི་དཀོན་མཆོག་སྟེ་དཔུང་ཚོགས་ཀུན་གྱི་དཀོན་མཆོག་ཡ་ཝཱེའི་མཆོད་ཁང་ནང་དུ་ལས་ཀ་བྱེད་འགོ་བརྩམས་པ་དང་། 
དེ་ནི་རྒྱལ་པོ་དར་ཡཱས་སྲིད་སྐྱོང་བའི་ལོ་གཉིས་པའི་ཟླ་དྲུག་པ་ཡི་ཚེས་ཉེར་བཞི་ཉིན་ཡིན་ནོ། །