༄༅།།ཨིབ་རི་པ་རྣམས་ལ་སྤྲིངས་པའི་འཕྲིན་ཡིག.
1.
དེ་ཡང་དཀོན་མཆོག་གིས་གནའ་བོའི་དུས་སུ་ལུང་སྟོན་པ་རྣམས་བརྒྱུད་ནས་ཐེངས་དུ་མ་དང་ཐབས་ཤེས་སྣ་ཚོགས་ཀྱི་སྒོ་ནས་མེས་པོ་རྣམས་ལ་བཀའ་གསུངས་པ༌དང༌། 
མཐའ་མའི་ཉིན་མོ་འདི་དག་ལ་ཡང་ཁོང་གི་སྲས་བརྒྱུད་ནས་བདག་ཅག་ལ་བཀའ་གསུངས༌ཤིང༌། སྔ་མོ་ནས་ཁོང་ནི་དངོས་པོ་ཐམས་ཅད་ཀྱི་རྒྱུད་འཛིན་མཁན་དུ་བསྐོས་པ༌དང༌། ཁོང་ཉིད་བརྒྱུད་ནས་འཇིག་རྟེན་ཁམས་ཐམས་ཅད་ཀྱང་བཀོད་པ་ལགས་སོ།། 
ཁོང་ནི་དཀོན་མཆོག་གི་གཟི་བརྗིད་ལས་འཕྲོས་པའི་འོད་ཟེར་ཡིན༌ལ། དཀོན་མཆོག་གི་ངོ་བོའི་སྣང་བརྙན་དངོས་མའང་ལགས་ཤིང་། ཁོང་གི་ནུས་མཐུ་ཆེ་བའི་བཀའ་ཡིས་རྟག་ཏུ་དངོས་པོ་ཐམས་ཅད་སྐྱོར་བའོ།། ཁོང་གིས་མིའི་རིགས་ཀྱི་སྡིག་པ་དག་པར་མཛད༌རྗེས། ནམ་མཁའི་ཞིང་ཁམས་ཀྱི་གཟི་བརྗིད་བླ་ན་མེད་པ་དེ་ཉིད་ཀྱི་གཡས་ཕྱོགས་སུ་བཞུགས༌ལགས་སོ།། 
ཁོང་ལ་ཐོབ་པའི་མཚན་སྙན་ནི་ཕོ་ཉ་རྣམས་ལས་མཆོག་ཏུ་གྱུར་པ་ཡིན་པས་ཁོང་ཉིད་དེ་རྣམས་ལས་ཀྱང་ཁྱད་དུ་འཕགས༌པའོ།། 
ཅིའི་ཕྱིར་ཞེ་ན། དཀོན་མཆོག་གིས་ཕོ་ཉ་རྣམས་ལས་སུ་ལའང་འདི་སྐད༌དུ། ཁྱོད་ནི་བདག་གི་སྲས་ཡིན༌ཞིང༌།། དེ་རིང་བདག་ལ་འཁྲུངས་པ་ཡིན།། ཞེས༌དང༌། ཡང་འདི་སྐད༌དུ། བདག་ནི་ཁོ་ཡི་ཕ་ཡིན༌ཞིང༌།། ཁོ་ནི་བདག་གི་བུ་རུ༌འགྱུར།། ཞེས་གསུངས་མ་མྱོང་བའི་ཕྱིར༌རོ།། 
དཀོན་མཆོག་གིས་རང་གི་སྲས་ཐོག་མ་དེ་ཉིད་འཇིག་རྟེན་དུ་ཡང་བསྐྱར་བསྐྱལ་ཡོང་བའི་དུས་སུ་འདི་སྐད༌དུ། དཀོན་མཆོག་གི་ཕོ་ཉ་ཐམས་ཅད་ཀྱིས་ཁོང་ལ་ཕྱག་འཚལ་བར་བྱའོ་ཞེས་གསུངས་སོ།། 
ཡང་དཀོན་མཆོག་གིས་ཕོ་ཉ་རྣམས་ཀྱི་སྐོར་ལ་འདི་སྐད༌དུ། ཁོང་གིས་རང་གི་ཕོ་ཉ་རླུང་བཞིན༌དང༌།། ཞབས་ཕྱི་པ་ནི་མེ་ལྕེ་བཞིན་དུ༌མཛད།། ཅེས་གསུངས༌སོ།། 
འོན་ཀྱང་། དཀོན་མཆོག་གིས་སྲས་ཀྱི་སྐོར་ལ་འདི་སྐད༌དུ། དཀོན་མཆོག་ཁྱེད་ཀྱི་བཞུགས་ཁྲི་རྟག་ཏུ༌གནས།། འཁར་བ་དྲང་པོ་ཁྱེད་ཀྱི་སྲིད་འཁར་ཡིན།། 
ཁྱེད་ནི་དྲང་པོར་དགྱེས་ཤིང་ཉེས་པར༌སྡང༌།། དེའི་ཕྱིར་དཀོན་མཆོག་ཁྱེད་ཀྱི་དཀོན་མཆོག༌གིས།། ཁྱེད་ཀྱི་གྲོགས་པོ་དག་ལས་ཁྱད་པར༌དུ།། དགའ་སྤྲོའི་སྣུམ་གྱིས་ཁྱེད་ལ་བྱུགས་པར༌མཛད།། ཅེས་གསུངས༌སོ།། 
ཡང་ཁོང་གིས་འདི་སྐད༌དུ། གཙོ་བོས་ཐོག་མར་ས་གཞིའི་རྨང་བཏིངས་ཤིང་།། ནམ་མཁའ་འདི་ཡང་ཁྱེད་ཀྱི་ཕྱག་གིས༌མཛད།། 
གནམ་ས་འཇིག་ཀྱང་ཁྱེད་ནི་རྟག་ཏུ༌བཞུགས།། གནམ་ས་གཉིས་ནི་གོས་ལྟར་རྙིང་བར༌འགྱུར།། 
ཁྱེད་ཀྱིས་གནམ་ས་གཉིས་ནི་གོས་བཞིན༌བསྒྲིལ།། གོས་བཞིན་དེ་ནི་ཡོངས་སུ་བསྒྱུར་པ་ཡིན།། འོན་ཀྱང་ཁྱེད་རང་ནམ་ཡང་འགྱུར་བ༌མེད།། ཁྱེད་ཀྱི་ལོ་ཟླ་ནམ་ཡང་རྫོགས་མཐའ༌བྲལ།། ཞེས་གསུངས༌སོ།། 
དཀོན་མཆོག་གིས་ཕོ་ཉ་སུ་ལའང་འདི་སྐད༌དུ། བདག་གིས་ཁྱོད་ཀྱི་བསྟན་དགྲ་ཐམས་ཅད༌ཀུན།། ཁྱོད་ཀྱི་ཞབས་ཀྱི་སྟེགས་སུ་བསྒྱུར་བའི༌བར།། བདག་གི་གཡས་སུ་བཞུགས་ཤིང་སྒུག་པར༌བྱའོ།། ཞེས་གསུངས་མ་མྱོང༌། 
ཕོ་ཉ་ཐམས་ཅད་ནི་ཞབས་ཕྱི་སྒྲུབ་པའི་སེམས་ཉིད༌དང༌། ཐར་པ་འཐོབ་ངེས་པའི་མི་རྣམས་ལ་ཞབས་ཕྱི་སྒྲུབ་མཁན་དུ་མངགས་པ་མ་ཡིན་ནམ།