མངོན་པ།.
18.
དེའི་རྗེས་སུ། བདག་གིས་དབང་ཐང་ཆེན་པོའི་ཕོ་ཉ་གཞན་ཞིག་ནམ་མཁའི་ཞིང་ཁམས་ནས་མར་ཕེབས་པ་མཐོང་ཞིང་། ཁོང་གི་གཟི་བརྗིད་ཆེན་པོའི་གཟི་འོད་ས་གཞི་ཡོངས་ལ་ཁྱབ་བོ།། 
ཁོང་གིས་གསུང་སྐད་དྲག་པོས་འདི་སྐད་དུ། འཇིག་པར་གྱུར་ཏོ་པཱ་པེལ་ལོན།། ཆེན་པོ་དེ་ནི་འཇིག་པར་གྱུར།། དེ་ནི་གདོན་གྱི་སྡོད་གནས་དང་།། མི་གཙང་གདོན་དང་བྱེའུ་ཚང་དང་།། མི་གཙང་སྐྱུག་བྲོ་སྣ་ཚོགས་ཀྱི།། གཅན་གཟན་འགྲོ་སའི་གནས་སུ་གྱུར།། 
རྒྱལ་ཁབ་སོ་སོས་ཁོ་མོ་ཡི།། གཡེམ་གྱི་འདོད་ཆགས་ཆེན་པོའི་ཆང་།། འཐུང་ཞིང་ས་སྟེང་རྒྱལ་པོ་རྣམས།། ཁོ་མོ་ལ་ནི་ལོག་གཡེམ་བྱས།། ས་སྟེང་ཚོང་པ་དག་གིས་ཀྱང་།། ཁོ་མོར་ལོག་གཡེམ་བྱས་པའི་ཕྱིར།། ས་སྟེང་ཚོང་པ་ཐམས་ཅད་ནི།། ཁོ་མོའི་འདོད་ཡོན་ལོངས་སྤྱོད་ལ།། བརྟེན་པའི་དབང་གིས་འབྱོར་བ་རྒྱས།། ཞེས་གསུངས་སོ།། 
ཡང་བདག་གིས་ནམ་མཁའི་ཞིང་ཁམས་ནས་སྐད་གཞན་ཞིག་གིས་འདི་སྐད་གསུངས་པ་ཐོས་ཏེ། ཀྱེ་ཀྱེ་ང་ཡི་མི་སྡེ་རྣམས།། ཁོ་མོ་མཉམ་དུ་སྡིག་པ་དང་།། ཁོ་མོས་མྱོང་བའི་ཆག་སྒོ་དེ།། ཁྱོད་ལ་འབྱུང་བར་མི་བྱ་ཕྱིར།། གྲོང་ཁྱེར་དེ་ནས་ཕྱིར་ཐོན་ཤོག ། 
ཁོ་མོའི་སྡིག་ཕུང་ནམ་མཁར་གཏུགས༎ དཀོན་མཆོག་ཉིད་ཀྱིས་ཁོ་མོ་ཡི།། སྡིག་པ་དག་ནི་ཐུགས་ལ་དྲན།། 
ཁོ་མོས་མི་ལ་ཅི་བྱས་ན།། ཁོ་མོ་ལ་ཡང་དེ་ལྟར་བྱ།། ཁོ་མོས་ཅི་ལྟར་བྱས་པ་ལ།། ཁོ་མོར་ཡ་ལན་ལྡབ་གཉིས་སྩོལ།། ཁོ་མོས་བསྡེབས་པའི་ཕོར་བ་ལ།། ཁོ་མོར་ལྡབ་གཉིས་བསྡེབ་པར་གྱིས།། 
ཁོ་མོས་ཇི་ལྟར་རང་བསྟོད་དང་།། འདོད་ཡོན་ལོངས་སྤྱོད་རྫོགས་པ་བཞིན།། དེ་ལྟར་ཁོ་མོར་མནར་གཅོད་དང་།། མྱ་ངན་ཆེན་པོ་མྱང་བར་གྱིས།། ཁོ་མོའི་སེམས་སུ་འདི་བཞིན་དུ།། ང་ནི་བཙུན་མོའི་ཁྲི་ལ་བསྡད།། ཡུགས་མོ་ལ་ནི་མ་ཡིན་ཏེ།། མྱ་ངན་གནས་སུ་མི་ལྷུང་སྙམ།། 
དེའི་ཕྱིར་ཉིན་གཅིག་དུས་ཡུན་ལ།། འཆི་བ་མྱ་ངན་མུ་གེ་བཅས།། ཁོ་མོའི་ཆག་སྒོ་མཉམ་དུ་འབྱུང་།། མེ་ཡིས་ཁོ་མོ་བསྲེག་འགྱུར་ཞིང་།། ཁོ་མོར་ཉེས་ཆད་གཅོད་མཁན་ཏེ།། གཙོ་བོ་དཀོན་མཆོག་ཁོང་ཉིད་ལ།། ནུས་མཐུ་ཆེན་པོ་ལྡན་པས་སོ།། ཞེས་པའོ།། 
ཡང་འདི་སྐད་དུ། ཁོ་མོར་ལོག་གཡེམ་བྱེད་ཅིང་མཉམ་དུ་འདོད་ཡོན་ལོངས་སྤྱོད་ལ་རོལ་བའི་ས་སྟེང་གི་རྒྱལ་པོ་རྣམས་ཀྱིས། ཁོ་མོ་མེར་བསྲེག་པའི་དུ་བ་མཐོང་སྟེ་ཁོ་མོའི་ཆེད་དུ་ངུ་ཞིང་མྱ་ངན་བྱེད་པར་འགྱུར་བ་དང་། 
ཁོ་མོའི་མནར་གཅོད་ལ་འཇིགས་པས་རྒྱང་རིང་དུ་ལངས་བསྡད་དེ་ན་རེ། ཆག་སྒོ་བྱུང་ངོ་ཆག་སྒོ་བྱུང་།། སྲ་མཁྲེགས་ལྡན་པའི་པཱ་པེལ་ལོན།། གྲོང་ཁྱེར་ཆེན་པོ་ཁྱོད་ཉིད་ལ།། ཆུ་ཚོད་གཅིག་གི་དུས་ཡུན་དུ།། ཁྱོད་ཀྱི་ཉེས་ཆད་སླེབས་ཟིན་ཏོ།། ཞེས་སྨྲས་པའོ།། 
ཡང་འདི་སྐད་དུ། ཁོ་རྣམས་ཀྱི་ཚོང་ཟོག་ཉོ་མཁན་མེད་པས། ས་སྟེང་གི་ཚོང་པ་ཡང་ཁོ་མོའི་ཕྱིར་ངུ་ཞིང་མྱ་ངན་བྱེད་པའོ།། 
ཚོང་ཟོག་ནི་གསེར་དང་། དངུལ། རིན་པོ་ཆེ། མུ་ཏིག སོ་རས་སྲབ་བུ། རས་རྒྱ་སྨུག དར་སིལ། རས་དམར་པོ། ཤིང་དྲི་ཞིམ་ཅན་སྣ་ཚོགས། བ་སོའི་སྣོད་ཅ་ལག་སྣ་ཚོགས། རིན་ཐང་ཤིན་ཏུ་ཆེ་བའི་ཤིང་དང་ལི། ལྕགས། རྡོ་ཀ་མ་རུའི་སྣོད་ཅ་ལག་སྣ་ཚོགས། 
ཤིང་ཚ། བསུང་རྫས། བདུག་སྤོས། གུ་གུལ། སྤོས་དཀར། རྒུན་ཆང་། སྐྱུ་རུ་རའི་འཚིར་སྣུམ། ཕྱེ་ཡག་པོ། གྲོ། བ་གླང་། ལུག རྟ། ཤིང་རྟ། གཡོག་པོ། མིའི་སྲོག་དང་བཅས་སོ།། 
ཀྱེ་པཱ་པེལ་ལོན། ཁྱོད་རང་ཞེན་ཆགས་པའི་འབྲས་བུ་ཁྱོད་དང་བྲལ་ཞིང་། ཁྱོད་ཀྱི་རོ་བརྒྱའི་ཟས་མཆོག་དང་ཡིད་དུ་འོང་བའི་དངོས་པོ་དག་ཀྱང་ཁྱོད་ལས་རྩ་མེད་བཏང་བས་ནམ་ཡང་སླར་མཐོང་བར་མི་འགྱུར་རོ།། 
ཚོང་རྫས་འདི་རྣམས་འཚོང་མཁན་ཏེ། ཁོ་མོར་བརྟེན་ནས་ཕྱུག་པོར་གྱུར་པའི་ཚོང་པ་རྣམས་ཁོ་མོའི་མནར་གཅོད་ལ་འཇིགས་པའི་རྐྱེན་གྱིས། རྒྱང་རིང་དུ་ལངས་ནས་བསྡད་དེ་ངུ་ཞིང་མྱ་ངན་བྱས་ཏེ་ན་རེ། 
ཆག་སྒོ་བྱུང་ངོ་ཆག་སྒོ་བྱུང་།། གྲོང་ཁྱེར་ཆེན་པོ་འདི་ལ་བྱུང་།། སོ་རས་སྲབ་བུ་གྱོན་པ་དང་།། ཁ་དོག་རྒྱ་སྨུག་དམར་པོ་ཡི།། གོས་ནི་གྱོན་ཞིང་གསེར་རྒྱན་དང་།། རིན་པོ་ཆེ་དང་མུ་ཏིག་གི ། རྒྱན་ཆས་ལེགས་པར་བརྒྱན་པ་འོ།། 
ཆུ་ཚོད་གཅིག་གི་དུས་ཡུན་ལ།། དེ་འདྲའི་འབྱོར་ཕྱུག་ཆེན་པོ་ཞིག ། ཅི་ཡང་མེད་པར་གྱུར་པ་འོ།། ཞེས་སྨྲས་པའོ།། ཡང་འདི་སྐད་དུ། གྲུ་དཔོན་དང་གྲུ་གཟིངས་ལ་བསྡད་ནས་ཕྱོགས་བཞིར་འགྲིམ་མཁན་དང་། གྲུ་པ་དང་། རྒྱ་མཚོར་བརྟེན་ནས་འཚོ་བ་རོལ་མཁན་ཐམས་ཅད་རྒྱང་རིང་དུ་ལངས་ནས་བསྡད་དེ། 
ཁོ་མོ་མེ་ལ་བསྲེག་པའི་དུ་བ་མཐོང་ནས་སྐད་ཆེན་པོས་འདི་ལྟར་སྨྲས་པ། གྲོང་ཁྱེར་གང་ཞིག་གྲོང་ཁྱེར་ཆེན་པོ་འདི་དང་བསྡུར་ནུས་སམ་ཞེས་པའོ།། 
ཡང་དེ་རྣམས་ཀྱིས་རང་གི་མགོ་ལ་ས་རྡུལ་གཏོར་བ་དང་། ངུ་ཞིང་མྱ་ངན་བྱེད་ཀྱིན་སྐད་ཆེན་པོས། ཆག་སྒོ་བྱུང་ངོ་ཆག་སྒོ་བྱུང་།། གྲོང་ཁྱེར་ཆེན་པོ་འདི་ལ་བྱུང་།། རྒྱ་མཚོར་གྲུ་གཟིངས་ཡོད་པ་དང་།། ཁོ་མོའི་རིན་པོ་ཆེ་རྣམས་ལ།། བརྟེན་མཁན་ཐམས་ཅད་ཕྱུག་པོར་གྱུར།། ཆུ་ཚོད་གཅིག་གི་དུས་ཡུན་ལ།། ཁོ་མོ་གཞི་ནས་མེད་པར་གྱུར།། ཞེས་སྨྲས་སོ།། 
ཡང་འདི་སྐད་དུ། ཀྱེ་ནམ་མཁའི་ཞིང་ཁམས་དང་། དད་ལྡན་དམ་པ། སྐུ་ཚབ་པ། ལུང་སྟོན་པ་རྣམས། ཁོ་མོའི་དབང་གིས་དགའ་བར་གྱིས། ཅིའི་ཕྱིར་ཞེ་ན། དཀོན་མཆོག་གིས་ཁྱོད་རྣམས་ཀྱི་ཆེད་དུ་ཁོ་མོར་ཉེས་ཆད་བཅད་པས་སོ་ཞེས་གསུངས་སོ།། 
ཡང་ཕོ་ཉ་སྟོབས་ཆེན་ཞིག་གིས་རྡོ་ཕ་བོང་རང་འཐག་གི་རྡོ་ཆེན་པོ་དང་འདྲ་བ་ཞིག་ཡར་བཀྱགས་ནས་རྒྱ་མཚོར་འཕངས་ཏེ་འདི་སྐད་དུ། གྲོང་ཁྱེར་ཆེན་པོ་པཱ་པེལ་ལོན།། འདི་བཞིན་ཤུགས་ཀྱིས་གཡུག་པར་ངེས།། སླར་ཡང་མཐོང་བར་མི་འགྱུར་རོ།། 
རོལ་དབྱངས་ཀྱང་ནི་དཀྲོལ་བ་དང་།། གླུ་གཞས་ཀྱང་ནི་གཏོང་བ་དང་།། གླིང་བུ་ཡང་ནི་འབུད་པ་དང་།། དུང་དཀར་ཡང་ནི་འབུད་པ་བཅས།། ཁྱོད་ཀྱི་ཁྲོད་ནས་ཐོས་མི་འགྱུར།། ལས་རིགས་སོ་སོའི་ལག་རྩལ་ཡང་།། ཁྱོད་ཀྱི་ཁྲོད་ནས་མཐོང་མི་འགྱུར།། རང་འཐག་སྒྲ་ནི་ཁྱོད་ཀྱི་ཁྲོད།། ནམ་ཡང་ཐོས་པར་མི་འགྱུར་རོ།། 
སྒྲོན་མེའི་འོད་ནི་ཁྱོད་ཀྱི་ཁྲོད།། ནམ་ཡང་འཕྲོ་བར་མི་འགྱུར་རོ།། མག་པ་བག་མའི་སྐད་སྒྲ་ཡང་།། ཁྱོད་ཀྱི་ཁྲོད་དུ་ཐོས་མི་འགྱུར།། དེ་ནི་ཁྱོད་ཀྱི་ཚོང་པ་རྣམས།། ས་སྟེང་འདི་ཡི་མི་ཆེན་ཡིན།། འཇིག་རྟེན་རྒྱལ་ཁབ་སོ་སོ་ཡང་།། ཁྱོད་ཀྱི་སྒྱུ་མས་བསླུས་ཕྱིར་རོ།། 
ལུང་སྟོན་པ་དང་དད་ལྡན་དམ་པ་དང་།། ས་སྟེང་འདི་ནས་བསད་པའི་མི་ཚང་མའི།། ཁྲག་དམར་གྲོང་ཁྱེར་འདི་རུ་རྙེད་པ་ཡིན།། ཞེས་གསུངས་སོ།།