HIBRU
O kiun vëh to nö non po Jiuꞌ varih to vaman ne e Ieesuꞌ Kristo. A ëhnan o to pee, nee to pokaꞌ ne o Hibru. Ivëh, ka se popokaꞌ no raoe a napan va Hibru, pa ö na se keh vavato suk no raoe. Ivëhkëk, manih po kiun pamëh na to hikta nat no pa teꞌ to kiun voh.
A napan va po vaman varih Hibru to iu hah voh e ne pa ö hinhin moaan vavoh pee, suk eꞌe to tataum voh ne a ma punis manih pa ma vakihat pe Ieesuꞌ. Ivëh, ke tökiun po kiun vëh to vavaasis non na raoe pan, eꞌ to vih non, pee se koe a ö hinhin moaan vavoh pee. Ka manih pe Ieesuꞌ varoe kuru, nee se tavus o teꞌ totoopin manih pa matan e Sosoenën. E Ieesuꞌ rakah e Koaꞌ apuh pe Sosoenën. Ivëhkëk, manih po ankeroꞌ, me a ma teꞌ vanënën soe pe Sosoenën, me e Mosës, ee to hikta teꞌ apuh tiroëꞌ ne. Me eꞌ to vavaasis non raoe pan, a napan hikta antoen ne a tavus o teꞌ totoopin manih pa matan e Sosoenën, manih pa ma taateꞌ vapenpen, keꞌ, manih pa ma vu taateꞌ va pa ësës a ma heꞌ. Manih pe Ieesuꞌ varoe kuru, ne Sosoenën se hiuk a ma hat pea. Suk eꞌ to vaꞌaus a ra, pa ö neꞌ to tavus vamanih pa teꞌ ësës heꞌ, pareꞌ teꞌ tamoaan non manih pa papmatö pe Sosoenën, Eꞌ to vih non, pea se këh a ma taateꞌ moaan pea, ko vahoꞌ ovoes rakah o vaman pea manih pe Ieesuꞌ.
A ma kiun varih to tataki va ne manih pan,
E Sosoenën to vateeraꞌ koe voh ea manih pe koaꞌ peꞌ, 1:1-4
A tasun pe Kristo to apuh oah e non pa tasun pa ma ankeroꞌ pe Sosoenën, 1:5-14; 2:1-18
A tasun pe Kristo to apuh oah e non pa tasun pe Mosës, pen Josuaꞌ, 3:1-19; 4:1-13
A tasun pe Kristo to apuh oah e non pa tasun po teꞌ ësës heꞌ, 4:14-16; 5:1-14; 6:1-20; 7:1-28
Manih pe Ieesuꞌ, o vatompoan voon to apuh oah e non po vatompoan vamoaan, 8:1-13; 9:1-28
O eraꞌ pe Kristo to kikis oah e non po eraꞌ po vönaꞌ, o eraꞌ pamëh se hiuk rakah en pa ma hat pea, 10:1-39
Manih po vaman varoe ne ea se tavus o teꞌ totoopin pa matan e Sosoenën, 11:1-40
Manih pa taateꞌ teꞌ vaes pea, ea se vaman no e Kristo, ko pënton no eah. 12:1-29; 13:1-19
A soe ataaton pe tökiun po kiun vëh, 13:20-25.
1
A Soe Pe Sosoenën To Koe Maꞌ Pe Koaꞌ Peꞌ
1 Moaan voh ne Sosoenën to vavaato koe me voh non a kën sipuura manih po teꞌ vanënën soe. Pa ma poen peo neꞌ to vavataare koe voh non ea pa taateꞌ tata me a taateꞌ vaato. 2 Ivëhkëk, manih pa ma poen to oah ee, eꞌ to vavaato koe me a rora pe Sunaiꞌeah. E Sosoenën to vaneah voh e Sunaiꞌeah a ma tah kurus. Ee pon to teꞌ vaꞌpeh ne, pare soe, ko oeh me akis tavus me a ma moeh tah kurus to teꞌ hop ne nën. 3 E Koaꞌ to matan va e non manih pe Tamaneah, pareꞌ vapeaapen non o maaka peꞌ. O kikis pa soe peꞌ to vatoe me non pe Tamaneah, pare öt ne pon a ma moeh tah kurus pa soe kikis pamëh. Vasuksuk neꞌ to mët, ko eraꞌ peꞌ pupui a ra ko vahik a ma hat pea, ka voon rakah ee. Manuh pa vöön va kin, neꞌ to ihoꞌ non pa papmatö pe Tamaneah a Kikis Vi. 4 A tasun pe Ieesuꞌ to apuh oah e non pa tasun po ankeroꞌ. E Sosoenën to heꞌ voh poan o ëhnan to apuh oah e non pa ma ëhnëëre.
A Tasun Pe Koaꞌ To Apuh Oah E Non Pa Tasun Po Ankeroꞌ
5 Ivëh, ke Sosoenën hikta soe ke voh ta pah ankeroꞌ a soe neꞌ to heꞌ e Ieesuꞌ to soe non pan,
“Kuru, eën e Koaꞌ peöꞌ, keöꞌ e Tamömah.” Sng 2:7
Ahik to pöh poen ne Sosoenën to soe ke ro ankeroꞌ, ivëhkëk, eꞌ to soe ke Ieesuꞌ pan,
“Eöꞌ se teꞌ noꞌ e Tamömah, kën teꞌ nom e Koaꞌ peöꞌ.” 2 Sml 7:14
6 Ivëhkëk, o poen neꞌ se vanö hah maꞌ a pah Koaꞌ ro peꞌ manih po oeh, pareꞌ soe pan,
“A ma ankeroꞌ pe Sosoenën se vasunön eah.” Sng 97:7
7 Ke Sosoenën to sosoe suk voh non o ankeroꞌ, pareꞌ soe pan,
“Eöꞌ to nok voh raoe, kee teꞌ ne a nap kiu peöꞌ,
pare teꞌ va ne manih pa tuvuh me o tëkrea.” Sng 104:4
8 Ivëhkëk, manih pe Koaꞌ, ne Sosoenën to soe pan,
“Sosoenën, a ma tamoaan rakah nën se teꞌ nom a teꞌ Sunön,
parën matop nom a ma napan pën pa taateꞌ totoopin.
9 Eën to iu nom a taateꞌ vih totoopin,
parën rës nom a taateꞌ hat.
Ivëh, ke Sosoenën e Topoan pën to kon voh oah, ko heꞌ oah o vaeö, me a tasun to teꞌ oah e non pa ö neꞌ to heꞌ vavoh a ma vakamöꞌ pën.” Sng 45:6-7
10 Ke Sosoenën sosoe suk voh non e Ieesuꞌ, pareꞌ soe pan,
“Eën e Sunön, po vamomoaan eën to nok o oeh me akis pa koreomah.
11 O oeh me a akis se hat vamanih po rara vamoaan, pare hik ee.
Ivëhkëk, eën to teꞌ tamoaan e nom.
12 Eën se nikun raoe vamanih po rara,
parën panih raoe pon vamanih pa teꞌ to panih o rara,
ivëhkëk, eën se vatoe tamoaan e nom,
parën hikta se manot nom.” Sng 102:25-27
13 E Sosoenën to hikta soe ke voh ta ankeroꞌ a soe neꞌ to heꞌ voh e Ieesuꞌ, to soe non pan,
“Ihoꞌ manih pa papmatö peöꞌ,
keꞌ antoen pa ö nöꞌ se vahoꞌ a teꞌ to vakihat me a nom oah manih paan in eën.” Sng 110:1
14 O ankeroꞌ to kiu ne paan e Sosoenën, keꞌ vavanö non raoe pa vaꞌaus o teꞌ varih neꞌ se kon hah.