5
Mamt has wo masmak mam d Jiosh hemajkamga
1 Ahni ani wa g ni‑wuhpuikaj neid mad wa muꞌi e shoꞌigch g Jesus Christ. Jiosh o ab si has elid ch wehmaj ab si has t‑elid ch id am wo maskogi mat hekid ia ep wo jiwia g Christ jewed dahm. K ab ni‑ab mant wo ahgahid ab amjed. Dani hema ha wanimeddam g Jiosh hemajkamga ch heg hekaj am i em‑gewkemhun ahpim mam hab waꞌap d ha wanimeddam. 2-3 Am o haꞌi em‑nuhkudachud g Jiosh g hemajkam. Kumt wo si s‑ap ha nuhkudad hab masma mat g kahwal ha nuhkuddam hab wo ha juh g e‑kahwaliga. S‑mahch am mo pi ha shahdahim ch wabshaba s‑ap ha wanimed. Kumt ahpim hab waꞌap wo ha wanimedad g hemajkam ch am wo ha chehgi g e‑doakagkaj mat has wo chum masmak. Pi o hab chum chuꞌig mams ab wo haꞌichu si i ha chehanid. K pi hab chum chuꞌig mams wo si tatchuad g e‑namkidadag heg hekaj chikpan. Mt wo chum si tatchuad mamt si s‑ap wo ha nuhkudad. 4 T g Jesus Christ ab wo em‑mah g pi ha huhugedam si has elidadag mat hekid ia ep wo jiwia jewed dahm no pi heg wehsijj d t‑nuhkuddam.
5 Ab amt wo ha kaihamad g e‑wanimeddam. Wehsijj amt wabsh wo i e shoꞌigchudad. Neh, bo chuꞌig g Jiosh oꞌohana:
Jiosh at ab ha wui wo kekiwua hegam mo chum si e haschud k wabshaba wo ha mah g hoꞌigeꞌidalig hegam mat ab wo i e shoꞌigch. Proverbs 3:34
6 Pegih, mt ab wabsh wo i e shoꞌigch Jiosh wui. Kut heg ab haha wo si em‑haꞌichuch mat hekid am wo s‑apꞌet. 7 Ab g wehs wo i dagito g e‑kudutadag Jiosh wui no pi ab si em‑tatchua.
8 Si g wo s‑e tahtkkad ch wehs haꞌichu wo si nenashanad. Jiawul o chum s‑t‑uꞌimk ch s‑koꞌokam s‑t‑junimk hab masma matp g mawid wo sha t‑be k hab waꞌap wo s‑koꞌokam t‑juh. 9 Wehsijj g em‑wehm wohochuddam o ab nakog ihda hab mahs shoꞌigdag. Kumt heg hekaj s‑wihnam wo gegokkad e‑wohochudadag ed ch ab wui wo gegokkad g Jiawul. 10 Jiosh at ab i em‑gawulkai mamt ab wo i s‑wohoch g Jesus Christ k chum hekid wehmaj wo edgidad g si s‑kehg apꞌedag. Kumt al haꞌas wo i taht g shoꞌigdag. T g Jiosh ab wo em‑mah g gewkdag k hab wo em‑juh mamt wo geꞌegeꞌehogat k s‑wihnam wo gegokkad. 11 Jiosh o d gewkdag chum hekid. Kutt chum hekid ab wo hehgchulidad.
Mat ia i kuhgi g e‑oꞌohana g Peter
12 Ia o ni‑wehmaj g Silas ch am oꞌoha ihda al haꞌichu ni‑ahga k am wo i bei em‑wui. Ab ani si hiwig g Silas am eda ihda chikpan.
Jiosh o si s‑hemajim ab i em‑wehmt. Kuni am i em‑gewkemhun mamt pi hekid wo pi chegito g i wehmtadaj.
13 Idam t‑wehm wohochuddam mo ia d kihkam Rome t am o s‑em‑ahgidamk mamt ab wo i s‑ha hoꞌigeꞌel.
Ia o ep ni‑wehmaj g t‑wehnag Mark ch hab waꞌap s‑em‑ahgidamk mamt ab wo s‑hoꞌigeꞌel.
14 Ab g wo aꞌai si e ihmad, ahpim e wehm wohochuddam.
Ab at wo wa baꞌich i em‑mah g Jiosh g s‑ap tahhadkam.