1 Pegih neh, ni‑wepnag, id o d waꞌi gokkokam mant am i em‑oꞌohanid k am i em‑chegitol idam haꞌichu. 2 Chum ani si em‑tatchuid mamt wo s‑chegitok g haꞌichu ha‑ahga g Jiosh haꞌichu i tashogiddam ch ep wo s‑chegitok hegai chehanigaj g t‑doꞌibiakam kownal Jesus mo g am chuhchaij am wa em‑ahgid.

3 Mt wo s‑mahchkad mat am wo i e aihi mat ep wo jiwia g Jesus, t an haꞌi wo i wuwha mo heg waꞌi hejel e‑tatchui am hab s‑junimk. Idam at wo has em‑ahgad 4 ch pi ab hu has wo elidad g wohokam ch hab wo kaijjid, “Mki wabsh hejel e iattogid mam hab chechꞌe matsh ep wo uhpam jiwia g Jesus. T eda pi jiwia. T muꞌijj heki hu waꞌi koi g t‑shohshon. Wehs haꞌichu o am hab wabsh i e junihim mo has i e junihim ga hu hebai i amjed mashp hekid in i e nahto g jewed.” 5 Idam o hab s‑e junimk mo pi mahch mo id d wohokam matsh wa g Jiosh am neok k am nahto g dahm kahchim ch jewed. Ihda jewed atsh ab i wuhsh shuhdagi t amjed k g shuhdagikaj e nahto. 6 K am i himdam, sh d wa ep shuhdagi mat ha wiꞌin k ha hugio g hemajkam. 7 K hab wa masma wabsh g e‑neꞌokikaj an uꞌukch g Jiosh g dahm kahchim ch jewed ch ab wo ai mat wo ha lodai g pi ap hemajkam k im hu hab wo i ha juh mei ch ed.

8 Id amt ep wo s‑chegitok mo g mihl aꞌahidag hab waꞌi masma mo g hemako tash am wehhejed g Jiosh. 9 K wabshaba am hemajkam t‑wehhejed shahag wepo mo si chewaj g tash mat g Jiosh am hab wo juh hegai mash hab s‑t‑junidamk. K eda g Jiosh si s‑ha bahbgi g hemajkam ch ab chum ha nenida no pi pi hab chum shaꞌi elid mas hedai wo huhug am pi apꞌekam ch e d pi gam hu s‑ohhodk g pi ap e‑chegitoi.

10 Neh, no hig pi woho mo pi ta machima mas hekid g s‑chu ehskam am wo wah em‑kih ed? Pegih, k hab waꞌap pi ta machima mas hekid ep wo jiwia g t‑kownalig Jesus. S‑hohtam atsh wo jiwia. Kutsh wo si s‑kaidam huhug g dahm kahchim k wo meitto g tash ch huhuꞌu ch jewed. 11 Wehs haꞌichu atsh wo huhug. Mt heg hekaj ab wo chum si i e dagitokch Jiosh wui 12 ch ab wo nenidad hegai tash ch am wo e nakogad mat hems s‑hohtam wo e ai.

Tsh hi wo wa chum meitto g dahm kahchim ch jewed. 13 Sh wabshaba g Jiosh hab kaij mat heg i dahm am haha wo nahto g wechij dahm kahchim ch wechij jewed. Tsh g s‑apꞌekam an hab wo waꞌi e junihid anai. Neh, id ach ab si nenida.

14 Pegih oi g wo, tt hig am wo si i t‑nako matt wo si s‑apꞌek am Jiosh tahgio k wo si s‑ap t‑tahtkkad ab aꞌai t‑wui. T g Jiosh s‑ap ab wo t‑neidad. 15 Am g wo s‑amichudad mo g Jiosh am wabsh s‑t‑bahbgi mattp hems wehsijj wo t‑doꞌibia. Paul at wa am hab waꞌap em‑oꞌohani ihda heg hekaj amichudadag mo g Jiosh ab mahkch. 16 Bo wa masma hab chuꞌig wehs oꞌohanaj ed mo am ha oꞌohanid g aꞌai hemajkam id amjed. Hahasko o s‑hasigam hab kaidag g oꞌohanaj. K pi ap am hu i tashogid hegam mo pi amichud g e‑wohochudadag ch pi wihnam gegok heg eda mo hab wa masma hab ep wua g heki hu oꞌohanaj g Jiosh. Ho o wabsh hejel ab e mohtoꞌid g pi ap chuꞌijig. T im hu hab wo i ha juh g Jiosh.

17 Am am wa heki hu s‑mahch wehs ihda, ni‑wepnag. Hegam mat pi ab hu wo wohog elidad g Jiosh at gam hu hab wo i e juh ab amjed. Kumt wo s‑e nenꞌoidad mamt pi am hu ha oidk hab wo e junihid. 18 Am att hig wo i t‑nako matt ab baꞌich wo i mahchid g t‑doꞌibiakam kownal Jesus Christ ch baꞌich wo i bei g i wehmtadag ab amjed. Heg ach ab si hehgchulid ch chum hekid ab wo si ihmad.