1 Am atsh wo i em‑chehgim ihda t‑wehm wohochuddam mo hab chehgig Phebe ch am i ha wehmt g t‑wehm wohochuddam Cenchrea kihhim t am. 2 Mt s‑ap ab wo i nei am wehhejed g t‑kownalig Jesus. Ab o d t‑wuikam matt ab wo i ha wahpki hegam mo an oiopod ch chikpan g Jiosh haꞌichu ahga. Geꞌe haꞌichu o am hab junihim ihda Phebe muꞌi t‑wehhejed. Kumt am wo i wehmt heg hekaj mat haschu wo i tatchua.

3 Am g wo ha ahgid g ni‑machiga amai mat ab wo i s‑ni‑hoꞌigeꞌel. Kah ani mash am dadha g Priscilla ch Aquila. Idam o wa am ni‑wehm chikpanahim 4 ch chum alo e koꞌij ni‑wehhejed. Kuni ab si s‑ha hoꞌigeꞌid. K hegam gawul mahs hemajkam mo ab ni‑ab kah g Jiosh haꞌichu ahga hab waꞌap ab s‑ha hoꞌigeꞌid mat ni‑doꞌibia.

5 Kah ani mash am haꞌi e hehemapad ch e mihshmad ha‑kih am idam Priscilla ch Aquila. Kumt am wo ha ahgi mat ab wo i s‑ni‑hoꞌigeꞌel.

Am g ep wo ahgid g ni‑nawoj Epanetus mat ab wo i s‑ni‑hoꞌigeꞌel. Heg o wud mat si wehpeg ab i s‑wohoch g s‑kehg haꞌichu ahgaj g Jiosh amai Asia jewed ch ed.

6 Sh am si i em‑wehmt g ni‑machiga Mary. Kumt am wo ahgi mat ab wo i s‑ni‑hoꞌigeꞌel.

7 Sh g ni‑hajuni Andronicus ch Junia am ep em‑wehmaj. Idam at wa wehpeg ab i s‑wohoch g s‑kehg haꞌichu ahgaj g Jiosh. Nt ab hahawa i s‑wohoch. S‑ap o ahgachug g Jiosh haꞌichu ahga mo heg hekaj ab gawulkdas. Kum wa hab waꞌap ha kuhpchkahim. Am g wo ha ahgid mat ab wo i s‑ni‑hoꞌigeꞌel.

8 Kush g Ampliatas am ep dak ch d si ni‑nawoj am Christ himdag ed. 9 Sh am ep em‑wehmaj hegai Urbanus mo wa am ni‑wehm ahgachug g Jiosh haꞌichu ahga. Sh g Stacas am ep em‑wehmaj ch d si ni‑nawoj. 10 Sh g Apelles am ep em‑wehmaj ch hab waꞌap e chehgidch mo am hab waꞌap haꞌichu hab junihim wehhejed g Christ. 11 Sh g Herodion am ep em‑wehmaj ch d ni‑hajuni. Idam g wo ha ahgid mat ab wo i s‑ni‑hoꞌigeꞌel.

Am g wo ha ahgid hegam Aristobulus ch hegam Narcissus mat ab wo i s‑ni‑hoꞌigeꞌel.

12 Sh am ep em‑wehmaj g Tripina ch Triposa ch am chikpan g Jiosh haꞌichu ahga. Sh g Persis am ep si chikpan. 13 Sh g Rufus g si geꞌe chikpan am hab waꞌap junihim. Rufus jeꞌe o hab masma ab ni‑neid mani d madaj. Kumt wehs am wo ha ahgi idam mat ab wo s‑ni‑hoꞌigeꞌel.

14 Sh am e wehm ab ihm g Jiosh hegam Asincritas ch Plegon ch Hermes ch Patrobas ch Hermas ch haꞌi ehp. Kumt am wo ha ahgi mat ab wo i s‑ni‑hoꞌigeꞌel.

15 Sh am e wehm ab ihm g Jiosh hegam Philologas ch Julia ch hegam Nerias g e‑uwiga wehm ch Olimpas ch haꞌi ehp. Kumt am wo ha ahgi mat ab wo i s‑ni‑hoꞌigeꞌel.

16 Ab g wo e chehgid mam aꞌai s‑e hoꞌigeꞌelid. Wehsijj hegam mo an aꞌai e nanmek ch ab ihm g Jesus Christ o ab s‑em‑hoꞌigeꞌid.

17 Neh, am ant haꞌichu wo em‑ahgi, ni‑wepnag. An o haꞌi oiopod ch am gawul junihim g Jiosh haꞌichu ahga ch am haꞌichu hab ahg mat hekaj wo e kudu g t‑wehm wohochuddam k ab e wui wo gegokiwua. Kumt wo si s‑e nenꞌoidk ab ha amjed k pi ab hu wo i ha miabi. 18 Idam o wabsh hejel e wehhejed hab wua g pi ap e‑tatchui ch pi ab hu chikpanid g t‑kownalig Jesus Christ. Ho o iattogid hegam mo pi ap mahch g wohokam wabsh si s‑kehg neneokch ch s‑ap has ha ahg.

19 Kumsh eda ahpim ab si s‑wohog elid g s‑kehg haꞌichu ahga ab amjed g Christ. Kuni heg hekaj ab si s‑hehgig em‑hekaj ch am s‑em‑ahgidamk mamt wo s‑ap s‑mahchk g s‑apꞌekam ch pi wo mahchk g pi apꞌekam. 20 Jiosh o ab t‑mahkch g s‑ap tahhadkam ch s‑hohtam wo em‑mah g gewkdag mamt wo gewito g Jiawul.

Ab ani tahni g t‑kownalig Jesus mat wo em‑wehmajk ch baꞌich ab wo i em‑mah g hoꞌigeꞌidadag.

21 Ia o ni‑wehm chikpan g Timothy ch hab kaij mamtsh ab wo i s‑hoꞌigeꞌel. K idam ab s‑em‑hoꞌigeꞌid ni‑wehm oꞌodham mo hab chechgig Lucius ch Jason ch Sosipater.

22 Ia o ni‑wehhejed em‑oꞌohanid ihda g Tershus ch hab ep kaij mamtsh ab wo i s‑hoꞌigeꞌel.

23 Ia ani da kihj am g Gaius. K id ab ep s‑em‑hoꞌigeꞌid. Ia kihj am o e nanmek g Christ wohochuddam. Hegai mo d lial nuhkuddam am wehhejed g kownal id eda kihhim o hab chehgig Erastus ch ab s‑wohochud g Jiosh ch hab waꞌap am em‑hoꞌigeꞌelid. K g Quartus hab waꞌap am em‑hoꞌigeꞌelid. [ 24 Neh, ab at wo wa baꞌich i s‑em‑hoꞌigeꞌel g t‑kownalig Jesus Christ.]

25 Nt am haha wo i em‑dagito Jiosh wui. Heg at wo e nako mat wo i em‑gewpkai. Mt hahawa s‑wihnam ab wo s‑wohochudad g Jiosh haꞌichu ahga. Heg ani hekaj ahgachug ihda s‑kehg haꞌichu ahgaj ab amjed g Jesus Christ. Kekelibad Jiosh haꞌichu i tashogiddam at wa heki hu an oꞌoha ihda s‑kehg haꞌichu ahgaj ab amjed g Jesus Christ. 26 T g Jiosh hemu mahsko wua mo has d ahga k am tashogi mat am wo e ahgahid wehs ha wui g nahnko mahs hemajkam matp hems ab wo i s‑wohochud k ab wo s‑wohog i el.

Pi o hebai ha hug g Jiosh 27 ch wehs haꞌichu s‑mahch ch ab i e maskogid am gahi wuhshanim g Jesus Christ. Kutt heg gahi wuhshanim ab wo si ihmad g Jiosh ch ab wo si has elidad chum hekid.

Neh, id ant am wo waꞌi em‑oꞌohani.