MATTHEW.
19.
Am ad i haꞌasa ha mashcha g Jesus k am i dagito g Galilee chekshani. Kuchd gam hu aigo hihi Jordan akimel haꞌabjed k am hihim k am dada Judea chekshani ch ed. 
D muꞌi hemajkam an oidahim g Jesus. Kud ha doajid. 
D am haꞌi dada g Palasi hab chum ahgk mat ab wo haꞌichu kakke k hekaj wo heki himch. K g ha‑kakkei hab chuꞌig, “No hiwgidas an t‑chehanig ed mat g oꞌodham wo s‑ohhod g e‑hohnig?” 
D hab kaij g Jesus, “An o hab chuꞌig Jiosh oꞌohana ed: Ga hu i wehpeg at am ha nahto g Jiosh g cheoj ch uwi mat d wo e wehhejedkamk 
k hab kaij: Iꞌajed at g oꞌodham wo ha dagito g e‑ohg ch e‑jeꞌe k ab wo i wehmt g e‑wehm kihkam. T idam d haha wo hemakok. 
Neh, bo kaij g Jiosh. K pi hab chum mahs mas g oꞌodham ab aꞌai wo i ha gawulkai hegam mat g Jiosh ab i ha hemakoch.” 
D hab kaij g Palasi ab wui, “K wabshaba an oꞌohanas t‑chehanig ed matsh g oꞌodham wo mah g e‑hohnig g ohhoda tapial k wo s‑ohhod.” 
D hab kaij g Jesus, “Heuꞌu, bo chuꞌig mamt wo ha mah g ohhoda tapial mamtp pi ab hu wo kaihamad g Jiosh ch pi wo pihk e elidad ha hekaj. K wa eda chum pi hab masma ga hu i wehpeg mat in ha nahto g Jiosh g hemajkam. 
Kunt id hab wo em‑ahgi mat d wo pi apꞌekamk mamt wo s‑ohhod g e‑wehm kihkam k hema ep wo hohnt, heg hi wa mamt wo s‑mai am i chum hohntk matki heki hu ha wehm woꞌiwua.” 
Kuchd hab kaij ab wui, “Kuki heg hekaj baꞌich i chum s‑apꞌe mat g oꞌodham pi wo ha hohnt.” 
D hab kaij g Jesus, “Pi at wehsijj wo e nako hab masma, heg hi wa mat g Jiosh am wo i ha wehmt. 
Haꞌijj at pi wo hohont no pi hab masma d mahsikam mo pi tatchua g hohnig ch haꞌijj d hegam mamt hab wabsh ha juh mat pi ap wo hohont. Haꞌijj o ep pi hohont heg hekaj mo g Jiosh kownaltalig baꞌich hab i elid. Kumt id am hab wo juh mamtp wo e nako.” 
Kud haꞌi am ha uꞌapa g e‑aꞌaliga mat ab wo ha taht g Jesus k wo e hoꞌigeꞌidahu ha wehhejed. Kuchd chum s‑ha kehꞌid mo hab e wua. 
D hab kaij g Jesus, “Ab g wabsh wo i ha hiwgid g aꞌal mat ab wo i hihi ni‑wui k pi an hu wo shaꞌi ha shohbi. Am at wabsh s‑moimam wo i wahp Jiosh kownaltalig ed ab ni‑hiwigch. Kumt hab waꞌi masma am wo i wahp.” 
Neh, bad kaij ch ab hahawa ha tahtam k amjed gam hu hih. 
D am hu hebai am hema jiwia g wechij oꞌodham Jesus wui k hab kaij, “Ha mashchamdam, shahchu ant am hab wo juh g s‑apꞌekam mant ab wo bei g pi ha huhugedam doakag?” 
K hab kaij g Jesus, “Ab ap ni‑kakke ab amjed g s‑apꞌekam. K eda heg waꞌi Jiosh d s‑apꞌekam. Am g hab junihid g Jiosh chehanig maptp wo tatchuad mapt wo bei g pi ha huhugedam doakag.” 
D hab kaij g oꞌodham, “Hedai hegam chehanig?” D hab ep kaij g Jesus, “Idam mo hab chuꞌig: Pi g am hu ha muaꞌi g oꞌodham. Pi g am hu ha ehsidad g ha‑wehm kihkam. Pi g am hu haꞌichu ha ehsidad. Pi g am hu haꞌichu ha iattogidad. 
Ab g si has ha elidad g e‑ohg ch e‑jeꞌe. Ab g i pihk e elidad ha wui g hemajkam hab masma map hab masma hejel pihk e elid.” 
D hab kaij g oꞌodham, “Wehs ani am hab wa chum ha junihim idam chehanig. Shahchu ant hab ep wo juh?” 
D hab kaij g Jesus ab wui, “Pegih, pt am wo him k wo gagda wehs haꞌichu map haschu i eniga k wo ha mah g namkigaj g shoꞌigkam k ab wo i him k wo ni‑oidad maptp woho s‑behimk hegai map chum e gahgid.” 
Kud si pi ap e taht am i kaiok k gam hu hih no pi d shaꞌi si s‑kais ch si s‑huwid g e‑kaisdag. 
D hab hahawa ep kaij g Jesus ab t‑wui, “Neh, nt wo si shel em‑ahgi mat wo shaꞌi si s‑hasigk mas g s‑kakais am wo i wahp Jiosh kownaltalig ed. 
Mam hig hab elid mat wo e nako g ka‑mihyo mas am wo gahi wuhsh hoꞌipad jeg ed? Pegih, t hab wa masma pi wo e nako hegam mo hiwig g haꞌichu e‑eniga mas am wo i wahp Jiosh kownaltalig ed.” 
Kuchd am wabsh i pi amichud k hab kaij ab wui, “A t hedai hig wo e doꞌibia.” 
D g Jesus ab si shel i t‑neid k hab kaij, “Pi at wo e nako wabsh g oꞌodham. T wabshaba g Jiosh wo e nako mat wabsh chum haschu am hab wo juh.” 
D g Peter hab kaij, “Nehꞌe, ahchim att wehs haꞌichu dagito k am i m‑oi. Tt haschu ab wo bei heg hekaj?” 
D g Jesus hab kaij ab t‑wui, “Woho o wa mamt ab si i ni‑oi. Kunt am wo si shel em‑ahgi mant an wo dahiwua s‑kehg ni‑kownal daikud ed ahni Jiosh si Kehsha. Kumt ahpim an hab waꞌap wo dadhaiwua gamai gohk kownal dadaikud an k d wo uꞌusagakamk am ha dahm hegam gamai gohk dakam e‑wehm Tutuligo. 
Matp hedai am wo i dagito g e‑kih o g e‑wepnag o g e‑jehj o g e‑aꞌaliga o g e‑oidag at ab wo ui siant e dahm baꞌich i muꞌi k ab wo bei g pi ha huhugedam doakag. 
Muꞌijj hegam mo d wehpegkam hemu at d wo si ha oidchkamk ch muꞌijj hegam mo ga hu si ha oidch hemu d wo wehpegkamk.