ACTS.
8.
Sh g Saul am wabsh apꞌechud mamt mua. Sh amai i amjed mamtsh ab si s‑gewkam i ha shoꞌigch g Jesus ihmdam amai Jerusalem t am. Kutsh aꞌai ahhio g e shoꞌigchuddam amai Judea ch Samaria chechkshani ch ed. Tsh wabshaba hegam Jesus chuhchai pi hasko ahhio. 
Tsh haꞌi hegam mo ab d si ihmdam g Jiosh ged hu cheh g Steven k si s‑kaidam shoani wehhejed. 
Kush g Saul chum s‑padchudamk g ha‑mihshmda g Jesus ihmdam ch hekaj an wahkhim ha‑kihki oidch ch ab i ha chewaimed ch ged hu si ha kuhpahim, chum wa g uꞌuwi. 
Kush wa an wehsko ahgahim g Jesus hegam matsh wa e gantad. 
Hegai Philip mash wa am d ha‑kehsha atsh am hih Samaria kihhim wui k am ha mihshmad ch am ha ahgid mat heki hu an i wuhsh g Jiosh si Kehsha. 
Kush ab si kaiham hegam hemajkam mo haschu i ha ahgid ch am neid mo s‑hasigam haꞌichu hab junihim g Jiosh gewkdagkaj. 
Muꞌijj ash e dodajid hegam mash g jijawul an ha uꞌukch. Kush si hihnk g jijawul gam hu hihimadch. Kush muꞌijj ha dodajid hegam mo pi hihimdag ch hegam mo pi ab hu gewpk. 
Sh si s‑hehgig g hemajkam amai. 
Sh am hema kih g oꞌodham mash hab chehgig Simon ch heki hu waꞌi amjed am hab junihim g s‑hasigam haꞌichu ch hab chum e wua mo d ge mahkai. 
Kush wehs g hemajkam am si neidachug ch ab si has elid, chum wa hegam mo d s‑chu aꞌamichuddam. Kush wehsijj hab kaij, “Heg oki d ge mahkai ch ab uꞌukch g e‑gewkdag Jiosh t amjed.” 
Bash kaij ch ab si kaiham nash pi heki hu waꞌi amjed hab junihim g s‑hasigam haꞌichu. 
Tsh wabshaba am hahawa ha mihshmad g Philip ab amjed g Jiosh kownaltalig ch ab amjed g Jesus Christ. Kutsh ab i s‑wohochud k e pahl wapko. 
Tsh hab waꞌap ab i s‑wohoch g Simon k e pahl wakon k amjed pi hebai dagito g Philip k ab si has elid am i neidok mo hab junihim g s‑hasigam haꞌichu. 
Tsh am i ha ai hegam Jesus chuhchai ab Jerusalem t ab matsh idam Samaria t am oꞌodham ab bei g Jiosh haꞌichu ahga. Kush am ha chehani g Peter ch John matsh am wo ha mihshmedo. 
Tsh am hihi idam k ged hu dada k am ha wehm e hemapai. Kutsh eda pi koi bei g gewkdag ab amjed g Hekia S‑apꞌekam Gewkdag hegam matsh e pahl wapko. Kutsh am e hoꞌigeꞌidahun k ab tai g Jiosh mat hab wo wa e juh am ha tahgio 
k amjed an i ha tahtamahi ab ihmch g Jiosh. Tsh g Hekia S‑apꞌekam Gewkdag ab hahawa ha mah g gewkdag. 
Tsh g Simon am i nei ihda k chum s‑ha namkidam 
k hab kaij, “Ab g i ni‑mahki ihda gewkdag mant hedai ab wo i taht, t wo bei g gewkdag ab amjed g Hekia S‑apꞌekam Gewkdag.” 
Sh wabshaba hab kaij g Peter ab wui, “T wabsh wo huhug g s‑m‑kaischuda hab wa masma mapt ahpi wo huhug. Pi o hab chum chuꞌig mapt hekaj wo nolawt g Jiosh mahkigdag. 
Pi o shaꞌi apꞌe g m‑chegitoi am Jiosh tahgio. K heg hekaj pi ab hu d shaꞌi m‑wuikam ihda chikpan. 
Gan o hu wabsh i si m‑uꞌukch g pi apꞌekam napki pi s‑chu hehgamk. Pt gam hu wo s‑ohhod g pi ap e‑chegitoi k ab wo i e hoꞌigeꞌidahu Jiosh wui. Tp hems gam hu hab wo i juh g m‑chuꞌijig.” 
Sh hab kaij g Simon ab ha wui, “Ab g wo si i s‑ni‑hoꞌigeꞌid k am wo e hoꞌigeꞌidahu Jiosh wui ni‑wehhejed mat pi gam hu hab wo ni‑juh.” 
Tsh am hahawa ha mihshmad g Peter ch John ab amjed g Jesus k am ha ahgi mo haschu g e‑wuhpuikaj neid. Tsh am hebai i cheka. Kutsh gam hu uhpam hihi Jerusalem wui am ahgachugch g s‑kehg haꞌichu ahgaj g Jiosh am aꞌai kihhim ch ed heg eda Samaria chekshani. 
Kush g anghil am hema neok ch hab kaij ab Philip wui, “Am g i e nakog k gam hu hihm k am wo i ai hegai wohg m an hims tohono jewed ch ed am ha shahgid g Jerusalem ch Gaza.” 
Tsh wa woho am i e nako g Philip k gam hu hih. Sh eda am hema med g e‑kalitkaj ch d Ediopia jewed t am oꞌodham. Id ash g kownaligaj am kehshch mash d lial nuhkuddam. Kush am e mihshmdahim Jerusalem t am ch hemu am uhpam ep wo chihpia Ediopia wui. 
Kush hab kaij g Hekia S‑apꞌekam Gewkdag ab wui g Philip, “An g i miabid hegai kalit k gan hu hugidaj an wo i hih.” 
Tsh am hahawa si meh g Philip k an i miabi g kalit. Kush ihda am neꞌokchulid hegai matsh g Isaiabad an oꞌoha. Kush am kah g Philip ch ab kakke, “Nap s‑amichud hegai map an neꞌokchulid?” 
Sh hab kaij ihda s‑has haꞌichu, “Pi ant has masma wo s‑amich, heg hi wa matp am hema wo i ni‑tashogi,” ch amjed ab i wai g Philip mat gan hu wehmaj wo dahiwua kalit ch ed. T wa woho an i chesh. 
Kush eda id an neꞌokchulid mo hab chuꞌig an Jiosh oꞌohana ed: T am hema wo i wuhsh g oꞌodham mat wo e wepogi g kahwal. Neh, pi at wo shosha g kahwal mamt hekid wo shoꞌigchud k wo mua. Pegih, t hab wa masma pi has wo shaꞌi chei ihda oꞌodham 
mamt hekid pi ap wo lodait k wo mua. T hab pi hedai wo e nako mas wo ah Mamt heꞌes i geꞌe pi apꞌekam hab juh ab wui. 
Sh hab kaij g s‑has haꞌichu ab Philip wui, “Am g ni‑ahgid. Dohꞌo hab ahg g Jiosh haꞌichu i tashogiddam? No hejel hab e ahg aha no wabsh hema hab ahg?” 
Tsh g Philip amjed am i shonch id ab mash am neꞌokchulid k am ahgid g s‑kehg haꞌichu ahga ab amjed g Jesus. 
Sh am wabsh kia wohpo wohg oidch ch am hu hebai neꞌibij mash am ge shuhdagi. Sh hab kaij g s‑has haꞌichu, “Neh, m ia ge shuhdagi. No am hig haꞌichu ehp manis heg hekaj pi wo ni‑pahl wako?”  
Sh am hahawa ahgid g Philip, “Bapt waꞌi masma wo e pahl wako mapt wehskaj am wo i e dagito Jesus wui.” Sh hab kaij, “Heuꞌu, wehskaj ant am wo i ni‑dagito wui.” 
Sh am hahawa i ahgid hegai e‑pionag mo melchudahim g kalit mat wo keshwua. Tsh am huhud ab kalit t ab k am i huhud shuhdagi ch ed. Tsh am pahl wako g Philip ihda oꞌodham. 
Tsh g Hekia S‑apꞌekam Gewkdag gam hu wa hekaj i bei g Philip. Sh amjed si s‑hehgig ihda s‑has haꞌichuch gam hu uhpam meh pi hekid ep shaꞌi neidk g Philip. 
Tsh g Hekia S‑apꞌekam Gewkdag gam hu uꞌapa g Philip Ashdod kihhim t am. Tsh am i ahgahi g haꞌichu ahga ab amjed g Jesus k ga hu ai g Cesaria kihhim.