HEBREWS.
5.
Jiosh atsh am i apꞌech matsh hema g t‑wehm oꞌodham d wo uhgchu t‑pahligk ch ab wui hab wo junihid g iagchulida ch hoꞌigeꞌidahuna am t‑wehhejed ch hejel e wehhejed. Kut id hemho wo wa chum s‑hemajimak ab t‑wui no pi hab waꞌap d oꞌodham ch hebai hab wua g pi apꞌekam. 
Pi atsh hedai am wabsh wo hejel i e kei mat d wo uhgchu pahlk. Jiosh atsh am wo i kei hab masma matsh wa hab juh g Aaronbad ged hu i heki hu matsh g amjedkamaj d wo papalk. 
Tsh hab wa masma pi am hu wabsh hejel i e kei g Christ. Jiosh atsh wa am i kehsh k ab wui hab kaij: Ni‑alidag, hemu ant am wo ha chehgi g hemajkam map ahpi d waꞌi ni‑alidag. 
An o hebai hab ep chuꞌig mash hab ep kaij ab wui: Dapt wo pahlk heg hekaj mant am i m‑kei hab masma mant g Melkisedekbad ch pi heg hekaj maps d Aaronbad amjedkam. Kupt chum hekid d wo pahlk. Neh, bash kaij g Jiosh ab wui. 
Kush g Jesus ab wui e hoꞌigeꞌidahun ch shoak ch iawua g e‑ohꞌog mash eda ia oimmed ch ab aihim g muhkig. Kush g Jiosh ab kaiham nash pi heg si s‑hemajima ch ab si has elid. 
Dash Jiosh hab elida matsh wo e shoꞌigchud k wo e muhkid am t‑wehhejed. Kutsh wa woho hab e juh k hab masma s‑mai g wohog elidadag, chum as d Jiosh alidag. 
Bat wa masma am i apꞌech g Jiosh mat hab wo juh g pi ha huhugedam doꞌibiadag wehsijj t‑wehhejed mattp hedai ab wo s‑wohog el. 
Kush hab kaij g Jiosh mat am i kei mat d wo uhgchu pahlk hab masma mat am i kei g Melkisedek. 
Muꞌi ani haꞌichu chum s‑em‑mashchamimk ab amjed g Christ id hekaj Melkisedek. Mt wabshaba pi wo amich. 
Idani amki tash d Jiosh wohochuddam ch hab wo chum chuꞌigk mamt haꞌi ep wo ha mashcha. Kumtki eda koi si s‑ap s‑mai g wehpeg mashchama. Bam sha masma mam d wabsh kia al hahaꞌas aꞌal ch hegai waꞌi wihbi ihꞌe 
nam pi pi amichud g Jiosh neꞌoki ab amjed g s‑apꞌekam. 
Hegam mat wo geꞌegeꞌehogat e‑wohochudadag ed at wo s‑amich g Jiosh neꞌoki k wo s‑mahchk mo haschu d s‑apꞌekam ch haschu d pi apꞌekam.