REVELATION.
18.
Am i dahm, ni hahawa ep neid g anghil. Tki id ab i hud dahm kahchim t amjed k geꞌe uꞌukch g gewkdag. K ab amjed g tonlig wabsh wehsko tonod an jewed dahm. 
K am si s-kaidam neok ch hab kaij: “I at gei ihda geꞌe kihhim mo hab masma mo g chehpaꞌawi. Jijawul o ebkiod. Nahnko mahs s-uꞌamakam ch pi aꞌamkam uꞌuwhig o am kih eda. 
Bat wa masma e padch g kihhim nat pi muꞌi ha padch g hemajkam g pi apꞌekamkaj. Heg o wa wepo mat ha nawkkoich. T am wehmaj ab wo bei g s-koꞌok namkidadag. T g kokownal wehsko hab juh g pi apꞌekam id hekaj kihhim mo g chehpaꞌawi wepogidas. T g s-kakais wehsko jewed dahm baꞌich i s-e kakaisch heg hekaj pi apꞌekam mo am hab e wua.” Neh, bo kaij g anghil. 
Ni hahawa ep kah mo ab neok g Jiosh dahm kahchim amjed ch hab kaij: “Ab g wo i wuwhaki, ni-hemajkamga. Ab g wo i wuwhaki ab amjed ihda kihhim mo hab sha masma mo g chehpaꞌawi. Pi g am hu wo wehmajk heg eda pi apꞌekam. Pi g ab hu wo wehmaj behꞌi g s-koꞌok namkidadaj. 
Pi ap chuꞌijigaj o shaꞌi si uhgk sipulkas. Kuni s-chegito g pi ap chuꞌijigaj. 
S-koꞌokam at hab em-juh. Kumt uhpam s-koꞌokam hab wo juh. Ab g baꞌich wo i nodgid g chuꞌijigaj wui. Heg at wo wa wepodagk mamt am wo i shuhdad g kohbaj heg hekaj iꞌidag mo e dahm baꞌich i s-gewk mat wa has i masma am hab em-juh. 
Ab g wo mahki g haꞌas shoꞌigdag ch pi ap tahhadkam mo wa heꞌes hejel ab e mahkch g ab si has e-elidadag ch kaisdag. T wo si e shoꞌigch hab masma mo g hejel wiꞌikam uwi k eda hab e elid mo d kownal ch pi hekid wo e shoꞌigch. 
Kut id hekaj g shoꞌigdaj wehs ab wo i shul dahm wabsh shel i e oidam. K g shoꞌigdaj d s-koꞌok mumkidag ch pi ap tahhadkam ch bihugig Am at wo meitto ihda kihhim. S-gewkdag ani ch wo lodait k s-koꞌokam wo namkid.” Neh, bo kaij g Jiosh. 
Hegam kokownal mo wehmaj hab junihim g pi apꞌekam at wo si shoanid wehhejed am i neidok mamt mei. 
Idam o ga hu wabsh mehk gegok no pi s-ehbid mat wo nei g shoꞌigdaj ch hab kaij: “Ih, shoꞌig! Ihda si geꞌe s-gewk kihhim mo e wepogid g Babylon at shaꞌi si s-hohtam ab bei g s-koꞌok e-namkidadag.” 
K g s-kakais id dahm jewed hab waꞌap si shoani ch pi ap e tahtk wehhejed no pi hahawa pi hedai ha nolawt g ha-gagli. 
Pi oki hedai ha nolawt g ha-ohlaga ch ha-plahdaga ch s-namkig hohodai ch g s-namkig ha-lohbaga ch g mamskal ch g s-namkig uhs. Nahnko haꞌichu oki hab wua g al-huandi aꞌagkaj ch s-namkig uhs ch kohwli ch wainomi k ch s-namkig hodaikaj. K oi wa pi hedai ha nolawt. 
Am o chum gagda hegai mo haschu am wehnads g haꞌichu hugi ch nahnko mahs s-ap uhwchu ch nawait ch e koꞌadam a-saidi ch chuꞌi ch pilkani ch haiwani ch kahwal ch kakawyu ch kakalit ch nenehol ch chum hems g oꞌodham dodakag. K pi hedai ha nolawt. 
K hab kaij idam s-kakais ab wui hegai kihhim: “Wehs hegai map ab si tatchua at huhug. M-kaisdag ch s-m-kehgdag at im hu hab i e juh. Kupt pi dahm ep wo ha edagi.” 
Hegam mat s-e kakaisch am haꞌichu gagdak atki ga hu wabsh mehk wo gegokk no pi s-ehbid g shoꞌigdaj. Idam at wo si shoanid ch wo pi ap e tahtkkad 
ch hab wo kaijchid: “Ih, shaꞌi si shoꞌig ihda si geꞌe kihhim mat wa eda ab wo si s-kehg e enigadadch g s-ihbhaimagi ch s-wegi lohbakaj k ab hab wo juhkchid g ohla hehosimhuna ch s-kehg hohodai. 
T eda shaꞌi si s-hohtam wehs heb hu shul g e-kaisdag.” Wehsijj oki ga hu wabsh mehk gegok hegam mo d ha-geꞌegeꞌejig an wapalko ch ed ch hegam mo an dadhaichug ch hegam mo d pion an wapalko ch ed ch wehs hegam mo ab behe g e-kihdag ab ge shuhdagi t amjed. 
Am o meihim g kihhim ch g kuhbs am wuhshani. K wehs idam am neid ch si hihnk ch hab kaij, “Pi o hekid hema kihhim hab shaꞌi masma d geꞌe kihhim.” 
T idam ab hahawa iawua g jewed e-moꞌo ab k si s-kaidam hihnk ch si shoani ch hab kaij: “Shoꞌig, shoꞌig, ihda si geꞌe kihhim. Ihda kihhim o wud mat ia s-e kakaisch hegam mo eꞌedgid g wapalko. Shaꞌi si s-hohtam at wehs haꞌichu heb hu shul ihda kihhim.” Neh, bo kaij idam pi apꞌekam hemajkam. 
Kut oi wa d wo si geꞌe s-hehgigk an dahm kahchim ch ed mat i gei ihda pi apꞌekam kihhim. Jesus chuhchai ch Jiosh haꞌichu i tashogiddam ch wehs g Jiosh hemajkamga at wo si s-hehgigk. Jiosh at ab wo abch ihda kihhim g chuꞌijig mo has ha juhkchkahim. 
Kut am hahawa hema i e chehgi g si s-gewk anghil k am hema bei g hodai. Ihda hodai oki haꞌas geꞌej mo g si geꞌe chuꞌikud. T g anghil am daꞌich ge shuhdagi ch ed k hab kaij: “Bat masma am wo si e daꞌich ihda geꞌe kihhim mat pi hekid hedai ep wo neidad. 
Hegam mumsigo mo ha gew g aꞌalpa ch uhs kukuikud ch kohwli kukuikud at pi hekid am hu ep wo piast amai. Pi at hekid am hu ep wo e chikp g nahnko mahs chikpan amai. Pi amt hekid am hu wo chuꞌad. 
Pi at hekid am hu ep wo e mehmheid g lalampa. Pi at hekid hedai am hu ep wo e hohont. Hegam mo d s-kakais iia o wa uꞌukch g gewkdag wehsko jewed dahm. K wa ia ge has e wuihim g mamakai ch hekaj ha iattogid g hemajkam an wehs jewed dahm. T eda wehs huhug ihda.” Neh, bo kaij hegai anghil. 
Kumtki s-koꞌokam wo namkid g kihhim nat pi ia e koꞌij g Jiosh haꞌichu i tashogiddam ch Jiosh hemajkamga. Chum o hems d chuꞌijigaj hegam mat gan hu aꞌai jewed dahm e koꞌij.